尤其係大贏家，香港頂流歌手，姜濤。
● 姜濤五連霸，追平兩代歌神
噚晚（1月1日），叱吒喺亞洲國際博覽館頒發咗樂壇第二份成績表。
總括嚟講，男團MIRROR絕對係大豐收之年。
除咗奪得「我最喜愛的組合」獎之外。
成員Ian（陳卓賢）就奪得包括「叱咤樂壇唱作人」金獎及「叱咤男歌手」金獎等4個個人獎項。
人氣王Anson Lo（盧瀚霆）憑《Hey Hey OK！》奪「叱咤十大」第八位。
而最重要嘅就係，姜濤，再度成為大贏家。
姜濤憑《好得太過份》奪得「我最喜愛的歌曲」。
呢個已經係佢連續5年奪得該項大獎，係「名副其實」嘅五連霸。
亦即係講——
佢獲得此獎項嘅次數，已經追平兩代歌神張學友及陳奕迅。
勁犀利！
● 再三奪冠，追平學友，超越Eason
正所謂沒有最犀利，只有更犀利。
但大獎以為咁樣已經好犀利嘅時候。
姜濤仲有更犀利嘅——
佢又榮獲「我最喜愛的男歌手」，係相隔兩年後重奪該項大獎。
計落嚟，就係第三度封王。
亦即係講——
佢獲得此獎項嘅次數，已經追平歌神張學友。
陳奕迅？算啦，佢都未攞過3次。
所以話，姜濤真係超級犀利！
● 姜濤又尷尬，希望口下留情
對於早前佢被粉絲「買獎」成為全球第二靚仔時。
佢都好謙虛咁話，唔好再將佢放上榜，令佢覺得好尷尬。
而今次獲得兩項大獎，追平張學友、超越陳奕迅，佢同樣有類似表達。
獲獎時，姜濤喺台上緊張到唞大氣，表情顯得有啲尷尬，又避免直視鏡頭。
佢獲獎時又話「thank you，完全估唔到，又要被人鬧啦，希望打緊字嘅人，口下留情。」
話說當年林峯都被TVB某高層硬捧，捧到高處不勝寒。
奪得2009年「十大勁歌金曲頒獎典禮」「亞太區最受歡迎香港男歌星」。
成為該頒獎禮史上年資最短，及最年輕嘅得主。
搞到之後林峯一直被笑係「亞皆老街至太子道西最受歡迎男歌星」。
令佢鬱悶多年，更喺不同訪問中含蓄表達無奈與苦笑。
造星嘅嘢，大家都明。
只不過造得太核突，就係另一回事。
● 不夠爆炸，怎麼有話題，讓我誇，做大娛樂家
一直以嚟，坊間都覺得姜濤嘅音樂實力、舞台經驗以及影響力。
唔好話同天王、歌神級歌手相媲美，就連以前二線歌手嘅水平都比唔上。
但而家竟然追平歌神。
難怪大家都覺得呢啲所謂頒獎禮，真係不知所謂。
雖然姜濤對獲獎表現尷尬，睇上去好似一切都係公司、頒獎機構，以及粉絲對佢嘅硬捧。
但直白啲講，無論邊個，身在其中，好多時候都係娛樂工業嘅合謀。
呢場大龍鳳，缺一不可。
最後，送上一條多年前陳奕迅揭穿「頒獎禮底褲」嘅評論。
◂ END ▸
