TVB呢個操作，勁抵讚
文摘
2024-12-31 23:04
广东
近年嚟，TVB喺公關策略上被人詬病嘅例子數之不盡。但今次新劇《奔跑吧！勇敢的女人們》開播前嗰個黑底白字聲明。由蕭正楠、吳若希、朱敏瀚、賴慰玲主演嘅新劇《奔跑吧！勇敢的女人們》噚日播出。而喺播出之前，TVB竟然罕有地發出一份黑底白字嘅聲明。原因係早前韓國濟州發生空難事件，而《奔跑吧！勇敢的女人們》首集劇情就有航空事故情節。為免引起觀眾情緒不安，所以劇集播出之前TVB特意提醒觀眾。並表示拍攝安排早於事件發生前完成，並不涉及任何敏感操作。要知道TVB一向被人批評「是是旦旦」以及「冇乜人情味」。但今次佢哋主動考慮觀眾情緒，仲願意以「提前告知」呢個方式畀大家選擇收唔收睇。今次終於意識到喺娛樂之餘，觀眾情緒都係需要「呵護」。更加重要嘅係，呢份聲明唔單止表達咗對罹難者嘅哀悼，更幫埋自己免去因劇情雷同而帶嚟嘅「網絡圍剿」。難怪有網民笑言：無綫終於識做 PR ，呢頂頭盔戴得唔錯！喺《奔跑吧！勇敢的女人們》首集中，吳若希同朱敏瀚嘅航空驚魂情節拍得相當逼真。機艙內人人面色蒼白、行李飛落嘅畫面，完全將觀眾代入一個隨時發生空難嘅現場。但就算情節張力十足，呢個提早預警嘅舉動，反而令觀眾多咗一層心理準備。主動建議觀眾唔睇，影響收視個喎，今次 TVB算係開咗個新例。睇返聲明嘅最後嗰句：「希望通過此劇為大家帶來正面能量。」雖然聽落「好行」，但放喺今次嘅情況下，反而顯得幾有人情味。空難事件令人唏噓，但劇集透過角色面對生死邊緣時刻，反而傳遞咗一種「活在當下」嘅積極態度。
