之前就一直有傳佢消失咁耐，係因為要去生B。
不過近日終於被網民「野生捕獲」，佢唔單止瘦咗，仲靚咗。
睇嚟佢好可能重返樂壇，又有新搞作。
● 復出在即，畀啲時間
鄭欣宜舊年3月完成紅館《Believe Us 鄭欣宜演唱會2023》之後，就似乎徹底神隱。
之後只係幫過圈中好友許廷鏗拍過《一場同學》嘅MV，以及為迪士尼動畫電影配音。
到今年9月，有網民分享偶遇佢嘅合照，當時佢笑容滿面，一頭金髮，素顏示人。
最近更有粉絲喺西貢捕獲佢現身餐廳，與Fans親切合照。
冇見一排嘅鄭欣宜，皮膚白滑緊緻，甚至被讚有啲「瓜子面」。
好友許廷鏗更加插嘴幫口：「佢狀態幾好。我之前話佢有大Project搞緊，係音樂類型嘅嘢，佢有佢諗法，我都唔知佢幾時有新音樂作品。」
而鄭欣宜就透過朋友同大家講「畀啲時間我」，似乎暗示復出在即。
● 一首女神，街知巷聞
講到鄭欣宜，點可以唔提佢幾年前嗰首經典歌曲《女神》。
呢首歌2016年推出以嚟，唔單止Hit，更加係好多女仔K場必唱歌曲。
以及同時亦成為無數女性嘅心靈加油站。
不要低頭／光環會掉下來
你是女神／不要為俗眼收斂色彩
不要講和／威嚴會碎下來
你是女神／不要被下價的化妝掩蓋
Y文嘅歌詞真係絕，一字一句，都係寫緊鄭欣宜對自己、對世界嘅宣言。
之前鄭欣宜受訪時講過，《女神》唔單止係自信嘅表達，唔單止係來自外表。
更加係內心真正接受自己。
呢首歌背後嘅古仔，相信好多人都比較清楚，亦正好呼應佢成長嘅經歷。
無論係一世孭著「肥姐個女」「負心老窦」嘅標籤、定係坊間對佢外貌身材嘅評論，以及高低起伏又唔穩定嘅事業。
鄭欣宜基本上就用咗呢首歌作為「我就係我」嘅態度回應。
同時歌詞亦都提醒每一個人，肥唔係缺點。
最大嘅缺點係你唔識點愛自己。
●肥姐有後？未經證實
喺鄭欣宜準備「復出」之前，坊間最熱烈嘅傳聞莫過於——
鄭欣宜疑似秘密喺加拿大生B。
因為一年前處於事業高峰期嘅佢突然停工，之後傳言四起。
跟住佢又被影到飛返加拿大為肥姐掃墓，難掩悲傷嘅佢亦難掩「大肚」。
有消息指佢同外籍男友已經有咗BB，甚至被質疑之前身形暴脹，係懷孕期間嘅表現。
雖然鄭欣宜嘅經理人林珊珊否認咗有關傳聞。
不過坊間仍然對佢突然消失嘅呢段神秘時期，充滿猜測。
如果傳聞屬實，咁肥姐就真係有後了，都算係娛樂圈一段佳話。
所以當鄭欣宜現身香港被捕獲時，因為身形瘦咗好多，又被質疑可能係產後收身嘅成果。
其實無論「生B傳聞」係真係假，抑或佢係咪真係準備復出。
都唔影響鄭欣宜對樂壇嘅一份獨特價值。
起碼喺佢嘅人生故事中，流言蜚語掙扎過後，已經活出自我。
即係人哋點睇，簡單嚟講就係一句說話：關我x事。
◂ END ▸
