講起佢，一定要稱呼全名，但後面一定要加上「姐姐」二字。
譚玉瑛姐姐，一個陪住無數粵港澳大灣區80後、90後，甚至00後成長嘅名字。
《430穿梭機》《閃電傳真機》《至NET小人類》《放學ICU》都係佢嘅王牌節目。
所以佢當之無愧係一兩代人嘅童年女神。
一向低調嘅譚玉瑛，平時幾乎唔提自己嘅私生活。
但最近佢受訪時就罕有大爆自己感情觀及生活態度，更引發網上熱議。
● 40年師生戀，不婚不育
譚玉瑛話，佢同初戀男友周震聲已經相戀咗近40年。
計落，真係長到從佢1982年開始主持《430穿梭機》嘅時間差唔多。
譚玉瑛中學時期已經認識周震聲，當時周震聲係佢嘅數學代課老師。
原來好多人唔鍾意嘅數學課，唔一定單調無聊，都可以好浪漫嘅。
後嚟周震聲成為醫務化驗師，之後佢哋就一直拍拖、拍拖，拍咗40年。
最令人意想不到嘅係，佢哋有著深厚嘅感情，竟然唔結婚唔生仔！
譚玉瑛更非常大方表示：「好多人結婚都係想有下一代，我自己反而覺得做人唔係咁開心啫，唔好搞咁多人出嚟。」
佢又坦言，學好每一日點樣同對方好好相處，比一紙婚書更實際。
譚玉瑛此言一出，即刻成為網民熱話。
有人覺得佢好堅持自我，有人又話咁好條件點解唔生。
不過無論如何，佢哋嘅感情可以屹立不倒40年，已經好犀利。
完全破咗嗰啲以為有個愛情結晶，就可以綁住對方一世嘅好傻好天真。
● 生活要享受，唔係交功課
如果要用一個詞嚟形容譚玉瑛嘅生活態度，以而家嘅潮語嚟講，應該就係「chill到爆」。
佢話，從後生嘅時候已經明白咗工作唔係人生嘅全部。
所以佢成日都會煮嘢食、飲酒、享受慢生活。
用佢嘅話嚟講就係，鍾意煮嘢、食嘢、㗳兩杯，都係人生嘅意義。
香港人出名生活節奏快過火箭，不過譚玉瑛顯然行緊一條完全唔同嘅路線。
可能就係因為咁，佢先可以喺娛樂圈呢個名利場入面，依然做到咁隨性咁放鬆。
● 最緊要過好自己生活
譚玉瑛嘅訪問播出之後，網民嘅意見即刻分成兩派。
一邊當然係又讚又支持，話佢活出自我。
有自我，又可以堅持40年愛情長跑，絕對唔係一般人可以做到。
另一邊就提到佢「師生戀」，仲對佢不婚不育嘅選擇表示驚訝。
甚至有人仲以為佢主持咁耐兒童節目，以為佢好鍾意小朋友。
港真，其實佢都40年如一日，而家都62歲，仲會介意人哋點睇咩。
正如不婚爛gag話齋，唔結婚就只有一個問題：
點解唔結婚？
結咗婚就一堆問題：
幾時生仔？幾時生二胎？幾時三胎？買咗樓未？買咗邊度？買咗車未？讀邊間幼稚園？讀邊間小學？係咪名校⋯⋯
愛情唔係公式，唔一定要咁咁咁咁咁嘅。
所以譚玉瑛都用佢嘅感情與生活態度，畀咗大家一個新嘅思考：
開唔開心，幸唔幸福，都係自己嘅事，自己揸主意最緊要。
當然譚玉瑛姐姐唔會講粗口啦，其實就係四隻字：關人忍事。
◂ END ▸
