兩屆TVB視帝王浩信自從舊年離巢後，立即北上搵真銀。
最近佢就憑合拍電視劇《黑色月光》攞咗一個「全球最佳電視劇男演員」。
冇錯，係全球最佳。
頒發次獎嘅係《第40屆全球電影和電視藝術華鼎獎》。
睇嚟全球觀眾唔單止都睇過呢套《黑色月光》，亦都好鍾意王浩信咁喎。
1. 得獎感言冇多謝老婆
當晚，王浩信西裝骨骨，英氣逼人，拎住獎座發表得獎感言。
雖然佢呢次冇公開多謝老婆，不過都有表示，多謝家人支持先至可以嚟到呢個舞台云云。
作為兩屆TVB視帝，王浩信今次又攞到全球大獎。真係令人即刻諗起佢四年前——
憑《踩過界II》再次成為視帝，講多謝老婆時，陳自瑤卻面無表情嗰一幕。
當時大家都笑言陳自瑤先至係最佳女主角，而唔係同樣憑《踩過界II》攞到視后嘅蔡思貝。
作為TVB最經典畫面之一，連佢哋自己綜藝節目《福祿壽訓練學院》都有再次致敬（惡搞）。
2. 全球唯一老婆唔Like獎
雖然喺TVB捱咗十幾年都未有機會好似「情敵」蔡思貝咁後來居上攞視后。
不過陳自瑤都憑著今年首度做女主角嘅劇集《婚後事》首次獲提名「視后」。
早前出席記者會時感動到爆喊嘅佢，被問到有冇叫老公王浩信同阿女投票支持自己時。
佢就簡單明瞭咁講咗一句：「自己醒目！」
對於今次王浩信得到一個「含金量更高」嘅獎項，原本大家以為陳自瑤可能對呢份「全球榮耀」有啲反應時。
結果真係冇。
佢只係喺自己IG Story出Po，齋係宣傳自己抖音直播帶貨，並且寫上「今晚見」。
甚至亦冇喺老公王浩信嘅獲獎帖文上畀Like。
咁多年，兩公婆果然識玩。
呢個「全球大獎」真係全球唯一老婆唔Like嘅大獎。
3. 講到呢個獎呢，就真係
除咗王浩信之外，第40屆華鼎獎頒獎禮中，阿佘都憑著合拍劇《新聞女王》獲頒「全球最佳電視劇女演員」。
而劇集同時奪得「全球最佳劇集」、「全球最佳導演」、「全球最佳編劇」。
全球、全球、全球，全部全球，睇嚟華鼎獎嘅「全球含金量」真係好高喎！
就好似睇緊本文嘅你，同樣都係「全球第一個如此睇文嘅人」。
當然，唔好小看呢啲「全球大獎」，起碼對王浩信嚟講，係成功進軍北方市場嘅其中一步。
至於有啲頒獎禮，係真係有咁高權威，定係小圈子圍威喂，咁就真係見人見智啦。
◂ END ▸
