由黃子華、劉嘉玲主演嘅舞台劇《香港式離婚》噚晚喺香港演藝學院歌劇院正式開鑼。
因為係第一場嘅關係，吸引咗唔少圈中巨星齊齊捧場支持。星光熠熠嘅觀眾名單堪比頒獎禮，包括有梁朝偉、林青霞、古巨基、梁詠琪、張繼聰、謝安琪、金燕玲、袁詠儀等等。而場內嘅恭賀花籃更加塞到滿晒，氣氛夠晒熱鬧夠晒氣派。子華神就落力做「Sales」，多謝現場觀眾咁有文化：「我覺得我哋做舞台劇，好少會喺演完一場戲嘅時候聽到觀眾拍手掌，有啲似『大戲』feel，係有文化嘅觀眾先做到！」「我呢世人好少做嘅，就係Sales推銷員，而我係成功Sell咗呢部戲畀劉嘉玲。」佢憶述當時同劉嘉玲見面時：「我哋一路飲茶，我就一路對住佢狂講『呢套戲好睇呀！好睇呀！好睇呀！』，然後再利誘佢演呢部戲唔使戒酒，因為我哋喺台上都有得飲！」之後子華神隨即展示手上嘅威士忌鐵盒：「係真酒嚟㗎！大家唔使緊張，出面有得賣（指舞台劇紀念品）。」全場大笑之餘，子華神繼續Sales上身：「你哋今日睇咗《香港式離婚》， 但《香港式離婚》真正嘅味道係點呢？我今晚做完Sales喇，多謝大家！」當子華神話，見到好多劉嘉玲嘅朋友都係座上客嘅時候。劉嘉玲就開玩笑咁話：「前面十行都係我啲Friend！」轉數快嘅子華神當然唔放過呢個話題，即場搞笑咁話：「若然唔買場外大會產品就唔算朋友！」舞台劇《香港式離婚》故事背景設定喺一間專辦離婚嘅律師行。結婚多年嘅中產律師夫婦，貌合神離，日日見盡離婚案件人間百態，自己嘅婚姻卻早已進入冰河期。年輕見習律師無意中闖入呢個千奇百怪嘅「離婚世界」，竟然喺慣性沉默嘅律師行老闆身上擦出微妙火花，似情非情，暗湧不止。而一直處於沉默婚姻狀態嘅老闆娘，就開始自編自導一場「復仇大戲」⋯⋯◂ END ▸
