作為TVB嘅「御用惡人」王俊棠，近年大家對佢嘅印象。
可能停留喺《愛·回家之開心速遞》入面嘅「池富」。
話說王俊棠經常都會接商演，每月輕鬆接2、3場，一個月就有20萬收入。
● 落力吸金，盤滿缽滿
最近，王俊棠就同一班香港藝人，包括程東、莊思敏、趙永洪等，喺內地一場壽宴出現。
王俊棠選擇定居中山一個好大嘅原因就係方便接騷。
而且佢嘅形象喺大灣區都好深入人心，只要keep住人氣，又有市場，真係唔憂做。
雖然一場商演6萬，對於好多明星嚟講唔算得係咩。
不過6萬對於好多月入最多幾萬嘅綠葉演員嚟講，並唔少。
關鍵係：密食當三番。
內地市場夠大之下，商演次數足以彌返金額數。
棠哥曾經話過，如果香港冇咩事，佢都想留喺內地，因為真係好好搵！
睇嚟，呢位「池富」確係富，又識計數。
而家定居中山，佢仲買埋越野車，日日四圍玩，生活無憂。
● 黑口黑面，與安德尊互寸
不過，北上密密搵真銀嘅同時，王俊棠喺香港啲人緣似乎麻麻。
舊年端午龍舟節，佢返TVB做鼓手。
仲被主持安德尊當場寸佢成日黑口黑面，鍾意扮大佬。
不過棠哥亦不留情面回應：安德尊成日口水多過茶，講嘢唔抹嘴！
TVB啲綠葉演員，無論有幾多觀眾支持，始終薪酬同機會有限。
好似王俊棠咁選擇北上，密密接騷，搵到人生第二春，呢個路都相當唔錯。
而「密食當三番」嘅策略，正正係唔少香港藝人嘅生存法則：靠數量取勝，賺少少都係錢。
近年TVB咁多綠葉迫於生計無奈離巢，或者一邊死守等機會一邊兼職搵食。
其實都可以參考一下王俊棠北上接騷呢條路嘅。
◂ END ▸
