如果話娛樂圈係一個江湖，咁「綠葉演員」絕對係一群不可或缺嘅江湖中人。
佢哋雖然唔係咩大英雄，但冇咗佢哋，江湖即刻遜色不少。偏偏，喺TVB呢個小江湖入面，好多「綠葉」往往變成最冇地位嘅「阿四」。何遠東就係其中一個最冇地位，心淡離巢嘅新一代綠葉王。「我係一個工人姐姐對住Mom咁樣，Mom叫我做咩，我都會『Yes, Mom』，就算佢幾挑剔，我都會自己改進。」現年40歲嘅何遠東一語道破16年嘅TVB歲月，日前佢就喺社交平台宣布離巢。何遠東憑《降魔的》嘅司機龍貓、《心理追兇》嘅弒母肥仔一角成功「入屋」。更憑《降魔的》喺《萬千星輝頒獎典禮2017》首度獲提名「最佳男配角」。又喺《2017香港電視大獎》獲得「男配角獎（劇集）」，以及被評為「民選最佳男配角」。但由於唔係「親生仔」身份，佢連生日當日收到TVB嘅WhatsApp，都只係傾合約，唔係講句「生日快樂」。喺TVB，何遠東試過幾乎所有可能嘅崗位都試過——拍劇、上頒獎禮、上台慶騷，之後連「雪櫃」都試埋。「一個演員唔俾佢演戲，你擺佢喺度其實佢冇用㗎，佢唔會識得發光。」自從TVB著名監製、恩師王心慰榮休之後，本身唔係「親生仔」嘅何遠東隨即被投閒置散多年。直到最近TVB播出嘅兩套劇集《異空感應》《奔跑吧！勇敢的女人们》就有何遠東一再出現。何遠東話自己唔介意做丑角，只要能令到主角發光發亮，只要觀眾鍾意就OK。不過佢話最終通過他人，傳入佢耳嘅只係六個字最hard feeling「你太好、你太多」。佢話：「努力去演好一個角色，我唔覺得係錯，我控制唔到觀眾媒體鍾唔鍾意你。」佢覺得，如果觀眾鐘意你，佢哋就會留言，就會討論，本嚟應該係一件好事。但原嚟做綠葉，就算努力演好「衰人賤人仆街變態」，一樣會被視作搶戲。何遠東心淡離巢，呢種情況其實一直都存在，就係電視台長期以嚟對綠葉演員嘅某種忽視。就算綠葉演員喺觀眾心目中已經屬於「金牌配角」，但喺公司眼中就變成「你太好、你太多」。呢種自相矛盾，待遇與際遇，的確令一個又一個綠葉離巢。何遠東離巢前，陳嘉佳、黃智雯、唐詩詠等好友，亦都早已選擇離巢。2008年畢業於香港演藝學院後，何遠東獲邀加入TVB，參與幕前拍攝工作。除咗拍劇，佢喺2014年就憑舞台劇《華佗六頂記》獲提名第23屆香港舞台劇獎「最佳男主角」。所以離巢之後，佢會將重心放返佢最愛嘅舞台劇，又會繼續教書，培養下一代戲劇人材。◂ END ▸
