雖然最近天氣好Q凍，不過𡃁模女神周秀娜就一啲都唔怕凍。
唔單止唔怕凍，仲特意喺IG派發呢個聖誕冬日嘅限定福利。
1. 黑絲周秀娜
全黑打扮嘅周秀娜，一件貼身高領透視黑色衫，透出內裡白色嗰件格外搶眼。
再配上勁短裙仔、波點黑絲以及高踭鞋，完美身材一覽無遺。
索靚正指數直接爆錶。
周秀娜配文話：「仲有2星期今年就完結啦 近年尾總係覺得時間過得快 因為節日假期特別多😝 嚟緊聖誕節加倒數✨🍾 未諗好點慶祝唔緊要 可以諗吓著咩先 我就諗好啦💃😌」
雖然娜姐今年已經39歲，不過仲係咁索，女神真係冇得輸。
2. 從肥妹到女神
今時今日嘅周秀娜就係索靚正。
不過讀中學時嘅佢，曾經係一個典型嘅「肥妹仔」。
全身肥胖，唔識打扮，仲經常被同學取笑。
大概因為呢啲經歷，成為佢之後努力瘦身嘅原因。
周秀娜之前講過，自己每個禮拜會抽兩至三日打泰拳。
目的係為咗改善手臂線條之餘仲可以快速瘦身。
為咗令身體線條更靚，佢仲會經常做拉筋運動。
工作期間佢會特意清淡飲食，完全戒咗凍飲。
不過古乳有暈：辛苦搵嚟自在食。
平日做嘢就會嚴格控制飲食嘅周秀娜，放假時都會嚟個大解放。
麻辣火鍋、杯麵、薯片，全部都係佢嘅心頭好。
所謂女神都係人，就係咁解。
3. 演員突破之路
周秀娜唔單止樣靚身材正，近年更加憑住演技進步，喺電影圈殺出一條路。
由模特兒轉型做演員，佢都面對過唔少挑戰。
人會大會老，𡃁模唔可以做一世，所以轉型係一定嘅事，否則只能退圈。
周秀娜曾坦言，開始轉型時壓力勁大，不過佢話自己一直「咬住唔放」。
睇返，2017年講中女嘅港產片《29+1》，應該係佢演員生涯嘅轉捩點。
周秀娜更憑住對角色林若君嘅出色演繹，成功斬獲多個國際電影獎。
包括芝加哥國際傳播影視頒獎禮優秀女演員、洛杉磯電影節最佳女演員獎項。
又被香港電影金像獎提名過「最佳女主角」等等。
終於令大家知道，原來當年嘅𡃁模，轉型電影後，並唔係花瓶。
4. 周秀娜你今次仲唔「死」
周秀娜對於自己「咬住唔放」嘅性格，佢曾經覺得係一把雙刃劍。
拍動作戲時，佢堅持親力親為完成所有高危動作。
結果搞到五勞七傷，埋下韌帶受傷嘅後遺症。
「左腳乏力、膝蓋痛、大細腳等，都係韌帶受傷嘅後遺症。」
不過佢話如果再有take two，自己依然會作出同樣嘅決定，會去到盡。
「工作時，我永遠只會講：OK啊、冇事、"我唔得"係唔會出自我口。」
女神咁硬淨，同佢細個成長都有好大關係。
喺小學階段，佢父母為咗做生意，經常唔喺身邊，令周秀娜開始學識獨立。
佢話好多問題都係自己解決咗先，遇到困難嘅第一反應唔係搵人幫，而係——
「死就死，自己做咗先！」
5. 有天賦都要捱
做𡃁模，應該係周秀娜入行娛樂圈嘅敲門磚。
中學畢業之後，有樣有身材嘅佢選擇咗模特兒之路。
因為工作唔穩定，試過銀行戶口得翻幾蚊雞。
搞到連搭車開飯，都要靠細佬幫助。
不過不能真係因為佢「咬住唔放」嘅硬淨性格。
捱過𡃁模階段，又捱過電影「花瓶」階段，真係畀佢捱出頭。
所以話有時啲嘢，又唔淨係靠天賦嘅。
當年香港出咗幾十個𡃁模，真係捱到上一線嘅一隻手數得晒。
◂ END ▸
