好多時候，喺娛樂圈講愛情，似乎係一種奢侈品。
尤其係對啱啱出頭嘅小生花旦嚟講，愛情更加要企埋一邊。
近日，29歲嘅2018年港姐冠軍陳曉華，同32歲上位小生朱敏瀚，就成為咗被「棒打鴛鴦」嘅典型案例。
● 金童玉女慘遭棒打鴛鴦
陳曉華憑住甜美外貌同紮實演技，近年上位速度快過坐火箭。
短短六年，已經孭起多部TVB電視劇嘅「女一」重任。
更被封為TVB近年嘅「劇后」之人選。
今年8月港媒爆出陳曉華同朱敏瀚秘密拍拖一年幾。
二人打得火熱，並且已經同居。
兩人私下嘅互動甜到漏，甚至連狗仔影到都起晒雞皮。
不過好景不長，戀情曝光之後，有傳TVB高層大感不滿。
認為呢段愛情會影響二人事業發展。
結果，兩位主角為咗保住星途，被迫低調處理感情。
甚至已經搬離愛巢，宣告「分居」。
● 愛情定係事業，只能二選一
其實早前，陳曉華同朱敏瀚喺多個公開場合，已經好識做，好識避忌。
之前年中巡禮，兩人都會有講有笑，不過到咗台慶，就「天各一方」隔得好遠。
甚至有記者想要二人合照，都被直接婉拒。
對於TVB年輕藝人，呢種無形壓力，佢哋應該相當熟悉。
畢竟公司投咗咁多資源畀你，所以喺TVB嘅愛情法則入面，事業同愛情，好多時候只可以揀一樣。
而陳曉華之前都開過聲，表明五年之內唔會結婚。
不過愛情呢啲嘢，有時粉身碎骨在所不惜，公司肯定唔同佢博。
被棒打鴛鴦之後，有記者發現陳曉華已經將大量衣物同行李搬返父母屋企。
心情唔好嘅佢，之後又要屋企人陪佢出街食飯「散心」。
另一邊廂，朱敏瀚喺外景拍攝時，同樣表現得心事重重，唔知係咪同「被迫分居」有關。
● 呢份工要食得鹹魚抵得渴
舊年，TVB就有高層親自欽點「新六生八旦」計畫，而陳曉華同朱敏瀚正正就係其中之二。
所以呢兩年嚟，二人劇接劇，事業前景光明。
奈何戀情過份高調（一般當事人都唔覺嘅），惹來高層「溫馨提示」「棒打鴛鴦」。
所以現時二人除咗少見面，更被安排遠離公眾視線。
因此就算台慶夜同場，都係各自做各自嘅嘢，零交流。
做得娛樂圈，聽話最緊要。
有時藝人嘅愛情，只能夠成為商業決策嘅「犧牲品」。
正所謂古乳有暈：食得鹹魚抵得渴。
講女系列·陳曉華：冇啦冇啦！女神冇啦！雙料選美冠軍冇啦！
◂ END ▸
