現年87歲嘅資深綠葉演員魚毛余慕蓮，近年健康每況愈下。
魚毛姐亦提早立咗遺囑，安排將遺產捐贈，似乎對自己嘅未來早有心理準備。近日，魚毛姐再次遇到病痛折磨，覆診時發現感染肺炎，令佢情緒變得消極。而資深傳媒人黃庭桄就話，魚毛姐私下向佢透露：「我覺得自己都未必過到今年。」為咗鼓勵魚毛姐，黃庭桄親自安排接送，帶佢去睇肥媽Maria同黑妹李麗霞嘅《媽妹笑住唱 Part II》演唱會。演唱會當晚，魚毛姐著住橙黃色大褸，用助行架代步，又戴上防護口罩。而肥媽演出完之後，都即刻衝落台熱情擁抱余慕蓮，仲噓寒問暖，氣氛好溫馨。更令魚毛姐興奮嘅係 狄波拉嘅「男神」譚輝智，佢話：「我認得你，你係《中年好聲音》吖嘛，我有睇你唱歌㗎！」魚毛姐喺演唱會後坦言：「今晚佢哋好搞笑，唱嘅歌我又全部識，好好睇！」仲爆料黑妹每次見到佢，都會畀封現金大利是佢，話係買嘢食用。咁貼心嘅行為，令魚毛姐都忍唔住笑住話：「黑妹對我真係好好。」2005年，佢將TVB發放畀佢嘅20几萬長期服務金中嘅8萬，捐出用於內地興建「希望小學」。佢又立下平安紙，計劃將遺產捐畀慈善機構，並強調唔希望風光大葬。有部份醫生因為知道魚毛姐捐錢兼做義工，樂意主動唔收佢診金。魚毛姐，加油呀！身體健康！開心啲，唔使咁悲，開心係最好嘅良藥。◂ END ▸
