微辣呢個澳門YouTube頻道，大家應該都唔會陌生，曾經因為搞笑而吸引咗唔少粉絲。
不過自從前年7月，微辣前經理人阿晶（劉靜儀）突然因為抑鬱症困擾而離世。
而離世前，佢喺IG上留言指控：被微辣內部成員欺凌，直接引起網民憤怒。
大家紛紛將矛頭指向整個微辣團隊。
當時微辣直接停止更新影片，並不直接回應阿晶及網民指控。
直到舊年5月，微辣CEO六毫子（陸志豪）突然喺IG發帖問「點樣瘦頸」。
隨即引起部分粉絲要求微辣復出嘅留言。
不過更多網民都認為微辣只不過係想試吓水溫。
果然，喺舊年9月，微辣就正式上載咗停工後嘅首條影片。
雖然影片內容係用動畫形式製作嘅MV，但無論從觀看人次定係觀眾反應嚟睇，對比以前啲片，都差別好大。
之后微辣又似乎靜咗落嚟，直到尋晚，微辣再次上載新片，繼續由六毫子親自主持。
名為「正正經經搵份工」系列，任務就係去中菜館試煮兩道菜。
片尾仲介紹咗嚟自澳門嘅女團BlazeShe。
過咗一日，影片就有2萬幾次播放量，睇落唔算差。
但比起以往嘅播放量，明顯係差咗一大截。
不過今次微辣再試水溫，網民嘅反應就唔係咁好。
有人直言微辣復工唔夠誠意，甚至有觀眾舉報咗呢條片。
微辣本嚟計劃喺今年慶祝成立10周年，但自從阿晶事件發生之後，所有計劃都停晒。
唔單止咁，微辣旗下多位藝人，包括阿晶舊愛加蔥（林茂發）亦相繼離開微辣。
並且同微辣另一成員儀仔結婚，最近仲喺YouTube上傳片段，分享佢哋嘅婚後生活。
加埋「微辣大排檔」結業，真係見到個品牌由鼎盛時期，跌落低谷。
睇返微辣一再試水溫嘗試重啟，雖然有片睇對於唔少人嚟講都係件開心事。
但呢種重啟方式，偏偏唔直接回應阿晶嘅問題，更加對曾經發生過嘅欺凌事件繼續冷處理。
話說曾經集體欺凌一個女仔，結果令佢自S，仲想當冇事咁，過吓一兩年冷河再想出嚟搵食。
真係當大部分網民冇記性個咩。
