佢飾演過《愛·回家》裡面嘅高小姐，《果欄中的江湖大嫂》嘅惡人菊。
雖然呢啲角色離主角配角相差十萬八千里，但甄采浠嘅演技每次都非常搶眼。
作為一個綠葉演員，以及一個特殊身分——黃宗澤前女友，為咗搵食，佢終於離巢TVB。
1. 一年只拍一劇
曾經係韓式女團Freeze成員嘅甄采浠（舊名甄詠珊）。
從2016年起加入TVB，大大話話都有八年。
不過佢話自己一直都唔係「親生女」，所以得到嘅機會比較少。
好似今年咁，佢只係參與拍咗《刑偵12》一部劇。
而過往，佢所飾演嘅大部分都係惡人、醜婦、甚至老母嘅角色。
不過佢自認自己冇包袱，所以每次演出都盡心盡力做好。
而呢啲不討好，但演技唔錯角色，反而不經意成為佢喺TVB嘅招牌角色。
對於離巢嘅決定，甄采浠表示其實同TVB係好聚好散。
感謝過去嘅監製、導演畀咗好多機會令佢嘗試唔同嘅角色。
但佢始終希望除咗做演員之外，可以探索其他可能性。
例如作曲、填詞、編劇甚至監製等等。
佢話，人生就好似流水，今日一別，或者他日有機會再見。
又話如果TVB有戲搵佢嘅話，佢都唔介意翻嚟拍咁話。
2. 從索女到熟女
講到甄采浠嘅演藝事業，就不得不提佢當年嘅性感女團Freeze。
2007年佢同石詠莉、陳樂榣組成呢個韓式女團組合。
一出道就話題十足，例如話佢哋係整容女團等等。
之後又有傳佢哋因為唔肯接拍電影《3D肉蒲團》先至會解散。
女團行性感路線始終唔係長久之計，亦未能為甄采浠帶嚟成功。
直至2016年加入TVB之後，佢先叫做正式轉型——
逐漸放低索女形象，開始以中女角色示人。
如果唔熟悉佢嘅話，真係好難想像呢兩個反差好大嘅形象。
感情方面，甄采浠最廣為人知嘅，莫過於佢曾經同黃宗澤拍拖。
早年嘅黃生，話說出名花心，不過甄采浠係佢少有承認過嘅女朋友。
另外，佢仲試過要照顧遇上嚴重車禍嘅男友，導致全面停工四年，盡顯癡情。
可惜嘅係最終感情都係無法開花結果，亦成為佢人生嘅遺憾之一。
3. 有冇必要捱落去
喺TVB呢個超級夢工場，咪話綠葉，就連花旦小生都好難長期企穩嘅地方。
又要講求收視同效率，所以綠葉演員嘅處境一直都唔容易。
除咗唔少綠葉離巢外，又有好多綠葉要兼職揸的士、做侍應等幫補家計。
雖然甄采浠參與過超過30套劇集，更憑幾個鮮明角色成功入屋。
不過依然面臨收入唔穩定、資源有限嘅難題。
趁住仲後生，選擇離開TVB，或者都係一條唔錯嘅出路。
冇必要一直喺裡面磨爛蓆，冇必要好似暴龍哥話齋——
餓又餓唔死，彈又彈唔起。
◂ END ▸
