雖然呢啲根深蒂固嘅睇法，大家好多時候已經習以為常。
直到電影拍出嚟，劏開晒，先至顯得有幾咁荒謬。
就好似《破·地獄》中Hello文嘅一句：「女人有月經，祖師爺唔鍾意嘅！」
1. 迷信，定係偏見
有啲迷信以及對女性月經嘅偏見，好多時候根本不可理喻。
雖然宗教儀式係文化傳統嘅一部分。
但月經——一個正常、必要、必然嘅生理現象——點解會被人當係「污穢」嘅象徵？
所以文玥即刻反駁老窦Hello文，一針見血戳穿呢啲荒謬至極嘅文化迷信。
「祖師爺冇老母嘅？！佢老母唔嚟M嘅？！」
問得好。
如果「祖師爺」真係唔鍾意，甚至係怕嗰啲血嘅話，咁佢仲點做祖師爺呢。
每個人都有阿媽生，可以生你出嚟嘅前提，同有月經有絕對嘅關係。
如果夾硬話祖師爺唔鍾意，如此荒謬嘅邏輯。
真係唔需要畫公仔畫出腸，都知係對女性正常生理現象嘅妖魔化。
2. 如果，換個角度
如果女性未到青春期，或者已經更年期呢？
咁祖師爺係咪會鍾意？係咪就唔會有咁多限制？
又例如話，男性都會有「大師級」嘅生理現象，咁又點解唔會被視為污穢？
而且就算喺迷信嘅世界，都有好多「神婆」類嘅角色。
所以講到尾，性別，根本唔係同「神」溝通嘅障礙。
所謂「祖師爺唔鍾意」，咁到底係「神」唔鍾意，定係「男人」唔鍾意？
或者咁講，有時候甚至係為咗維持某啲性別權力與地位，特登去貶低。
3. 偏執，咩年代啊
或者有人會話，如果覺得呢啲迷信係咁嘅話，自己可以唔參與。
但問題係，呢啲迷信往往係打著「文化傳統」「文化傳承」嘅旗號。
實際上就係用正當化嘅方式繼續偏見。
如果呢啲傳統繼續成為性別偏見嘅工具，咁傳統嘅價值同意義，已經大打折扣。
加上而家咩年代啊，上一輩早已弃用寫信不再飛鴿傳書。
反而日日「千里傳音」發微信，甚至沒完沒了，聽都聽唔晒咁多。
如果仲偏執地用過時嘅傳統偏見去睇女性月經，咁只能夠話唔知邊個個腦污穢。
作為一個從不將愛宣之於口嘅傳統老窦，Hello文最後都係放低偏執，叫自己嘅掌上明珠「文之玥」幫自己破地獄。
「生人都要破地獄，生人都有好多地獄。」
破除「祖師爺唔鍾意」為其一。
◂ END ▸
