作為宇宙最強個女，現年20歲星二代甄濟如最近推出咗一首廣東歌《次次》。
歌詞仲邀請到啱啱新鮮出爐嘅金馬影后鍾雪瑩操刀。
以唱作歌手身份出道嘅甄濟如，今次算係一次大挑戰。
因為佢啲廣東話⋯⋯反正，就唔係佢嘅強項。
1. 高級創作環境，鍾意機上寫歌
甄濟如宣傳新歌嘅時候話，佢創作歌曲時最鐘意係喺飛機上寫歌。
因為冇WiFi嘅干擾，可以專心諗嘢。
提到錄音過程，佢就話練廣東話唱法比想像中困難。
因為「要練好多咬字同音調，感覺好似Rap咁。」
佢咁講又冇問題喎，因為用粵語9聲調Rap，的確比煲冬瓜4聲調Rap要好聽太多太多。
講返甄濟如首歌，只能夠話，唔係個個都識得欣賞。
甄濟如廣東歌《次次》
不過願意推出廣東話，算係咁啦。
至於有冇興趣跟宇宙最強老窦甄子丹拍功夫片，佢就話對音樂更有興趣。
所以佢話未來會考慮唱多啲廣東歌，希望再進一步挑戰自我。
不過佢就話自己細佬對功夫更有興趣。
咁係咪話以後有機會睇到丹爺同個仔拍住上拍戲先，就好似韋·史密夫父子咁。
2. 宇宙最強新戲，誤判口碑唔差
講到甄子丹，當然要提下佢最近嘅新戲《誤判》。
雖然呢排港產片都係口碑、票房一流嘅《破·地獄》。
不過丹爺嘅《誤判》都唔差，一嚟係幾億大製作嘅合拍片。
二嚟係有丹爺宇宙最強呢個生招牌，所以《誤判》同樣都有好多打鬥場面。
三嚟，喃嘸佬兩仔爺已經被撬牆角，除下此「法衣」，著上彼「法衣」。
話時話，如果唔係因為《破·地獄》勁收得，佢哋兩仔爺都好難會有自己嘅單頭海報。
丹爺話，為咗拍好《誤判》嘅角色，佢花咗好長時間去研究同準備，所以打鬥戲份都相當精彩。
有趣嘅係，丹爺仲特別邀請自己老窦甄雲龍上去客串一個腦退化需要輪椅出入嘅父親。
從目前優先場嚟睇，《誤判》口碑都算可以。
甚至有評論話，係甄子丹過往十年嚟最好睇嘅戲。
當然，重點一定係要睇粤语原声。
3. 宇宙最強背後，係一個好老窦
丹爺除咗係宇宙級動作巨星之外，佢仲係一個專注於家庭嘅男人。
話說佢同老婆汪詩詩婚之後，幾乎所有收入都交畀老婆打理。
自己呢，只做兩樣嘢，專注拍戲、陪伴家人。
不過仔女出身之後，大概佢要做多一樣嘢——碌卡。
正如Eason《碌卡》歌曲主題：人人負債，輕輕鬆鬆的欠下人情巨債——碌下人情卡，幫下子女。
加上丹爺本身就係好愛錫自己仔女嘅好老窦。
因為佢講過，為咗避免為子女帶來不良影響，婚後所接嘅戲，幾乎唔會有親密戲。
作為父親嘅丹爺，睇嚟對子女真係非常重視，無論係陪伴成長，以身作則。
定係支持仔女嘅演藝事業，丹爺都盡心盡力。
4. 所謂宇宙最強，全部都係血汗
除咗支持仔女演藝事業，佢自己嘅演藝事業就更加唔使多講啦。
《殺破狼》、《葉問》系列等等，都係助佢一步一步登上「宇宙最強」嘅地位。
不過作為宇宙最強，丹爺嘅功夫片成就絕對唔係偶然。
每一部電影作品背後，都付出咗無數汗水同努力。
丹爺曾經分享過，為咗呈現最完美嘅動作戲，經常要喺高強度訓練之後仲繼續研究細節。
甚至喺片場一日拍足十幾個鐘。
同時，拍動作戲時發生意外，都係家常便飯，
咩淤青、扭傷甚至骨折，對佢嚟講早就已經習以為常。
不過佢自言從未因此減低對自己嘅要求。
佢強調，動作戲唔單止係力量同速度，仲係一種藝術表現。
電影鏡頭背後，係無數次嘅推倒重來，甚至要冒住身體極限展現出嚟。
有傳佢身家至少已經10億，61歲仲咁搏，宇宙最強呢個哚，果然實至名歸。
◂ END ▸
