树立中华民族共同体意识，坚定文化自信，促进文化繁荣，为民族复兴，国家强盛而不懈努力

༄༅། །རྔ་ཡུལ་གྱི་ཆོས་སྡེ་ཆེན་པོ་སྒོ་མང་དགོན་གྱི་སྣོད་བཅུད་ལ་བསྟོད་པའི་རབ་བྱེད་དོན་ལྡན་བསྔགས་པའི་མེ་ཏོག

འབུམ་ཐང་དར་རྒྱས་རྒྱ་མཚོ།

༄༅། །རིན་ཆེན་རྒྱུད་མང་ཕྱག་སོར་འཕྲུལ་གྱིས་རྡུང་།།མཛེས་པའི་ཟུར་མིག་སྐར་མདའ་བཞིན་དུ་གཡོ།།འཇོ་སྒེག་སྒྱུ་འཕྲུལ་རྫོགས་པའི་དབྱངས་ཅན་མས།།སྙིང་ལ་མི་འཇིགས་དགེ་བའི་སྤོབས་པ་སྩོལ།།ཁོར་ཡུག་དགེ་མཚན་ར་བས་ཡོངས་བསྐོར་བའི།།བཤད་སྒྲུབ་ཆོས་ཀྱི་དགའ་ཚལ་ཉམས་དགའ་བ།།རྔ་སྟོད་ས་ཡི་ཐིག་ལེར་འགྱིང་བ་ལ།།བསྔགས་འོས་བསྔགས་པའི་མེ་ཏོག་འགྲེམ་ལ་སྤྲོ།།འབྲས་བཟང་ཁུར་གྱིས་རབ་དུད་འཛམ་བུའི་ལྗོན།།ལྡེམ་ལྡེམ་གཡོ་བའི་ཉམས་དགའི་འཇིག་རྟེན་འདིར།།ངོ་མཚར་སྲིད་ཞིའི་ཕུན་ཚོགས་རབ་རྫོགས་པའི།།གྲགས་པ་མ་ཉམས་སྐྱེ་རྒུའི་ཁ་ལ་འགྱུ།།སྤངས་རྟོགས་ཡོན་ཏན་རབ་རྫོགས་ལྷ་ཡི་ལྷ།།གཟིགས་པ་དུས་ལས་མི་ཡོལ་ཐུགས་རྗེའི་གཏེར།།ཐུབ་དབང་སྨྲ་བའི་ཉི་མས་ས་གསུམ་གྱི།།སྙིང་གི་མུན་སེལ་ཆོས་ཀྱི་འོད་སྣང་བཀྱེ།།ཐེག་གསུམ་ཆོས་ཀྱི་འཇུག་ངོགས་བརྒྱུད་པའི་མཐར།།ངེས་ལེགས་ཐར་བའི་གྲོང་ཁྱེར་ཉམས་དགའ་བར།།མཁའ་ལྡིང་མཁའ་ལ་འཕུར་བའི་རྩལ་ཤུགས་ཀྱིས།།བགྲོད་པའི་སྐལ་བཟང་མུ་ཏིག་ཕྲེང་བཞིན་བྱོན།།ཁྱད་པར་ཟབ་རྒྱས་ཤིང་རྟའི་ལམ་སྲོལ་ནས།།ཀླུ་ཐོགས་ཁྱུ་མཆོག་གཤེགས་པའི་བཤུལ་ལམ་དུ།།བསྙེགས་པའི་རྗེས་འབྲང་དབུ་སེམས་གྲུབ་མཐའི་སྲོལ།།འཛིན་པའི་མཁས་གྲུབ་རྒྱུ་སྐར་གྲངས་ཀྱིས་མཚོན།།འཕགས་ཡུལ་ཆོས་ཀྱི་དགའ་ཚལ་ཉམས་དགའ་བར།།བཤད་སྒྲུབ་ལང་ཚོ་ཡོལ་བའི་སྟོན་གྱི་དུས།།པཎ་གྲུབ་ངང་བའི་རྒྱལ་བོའི་འཕུར་ལྡིང་གར།།བྱང་ཕྱོགས་བསིལ་ལྡན་དགེ་བའི་ཞིང་དུ་བསྒྱུར།།བརྗིད་ཆགས་གངས་རིའི་མུ་ཁྱུད་མཐར་འཁྲིལ་བའི།།ཁ་བའི་མེ་ཏོག་སྤུངས་པའི་བྷོ་ཊའི་ལྗོངས།།སྡེ་བཞིའི་ཕུན་ཚོགས་འཁྱིལ་བའི་སྙིང་བོ་ཅན།།ལྷོ་གླིང་མཛེས་པའི་ཏོག་ཏུ་རྣམ་པར་དགེ།འཇིགས་མེད་སྙིང་སྟོབས་མཚོན་ཆའི་འཁྲུལ་འཁོར་གྱིས།།ཡངས་པའི་ས་ཆེན་འདོད་དགུར་དབང་བསྒྱུར་བའི།།གདོང་དམར་བཙན་པོའི་རྣམ་དཔྱོད་ཐབས་འཕྲུལ་གྱིས།།ཕྱོགས་ལས་རྣམ་པར་རྒྱལ་བའི་བ་དན་བསྒྲེངས།།ཆོས་སྲིད་ལུགས་བརྒྱའི་མདུན་ས་ཉམས་དགའ་བར།།དཔའ་མཛངས་ཐབས་ཀྱིས་སྙེམས་པའི་རྒྱལ་བློན་ཚོགས།།རླབས་ཆེན་ཕྱི་མཐའ་གཟིགས་པའི་ཕྱག་རྗེས་ཀྱིས།།ཁྱབ་འཇུག་སྣ་ཚོགས་འཕྲུལ་ལ་སྐྱེངས་པ་སྟེར།།ལུང་དང་རྟོགས་པའི་རང་འོད་ཁོང་ནས་འབར།།བསྟན་འགྲོའི་ཕན་བདེ་སྲིད་ཞིའི་རྩེ་མོར་འདེགས།།འཕྲིན་ལས་ཞགས་པ་གླིང་བཞིའི་མཐར་རྐྱོང་བའི།།མཁས་དང་གྲུབ་བརྙེས་ཆུ་བོའི་རླབས་བཞིན་བྱོན།།འཇམ་དཔལ་རྡོ་རྗེ་རྣོན་པོའི་སྒྱུ་འཕྲུལ་གར།།བློ་བཟང་རྒྱལ་བ་མཁྱེན་པའི་རལ་གྲི་ཅན།།གངས་ཅན་མཁས་རྒུའི་རལ་བའི་རྩེར་འཕགས་ཏེ།།འཁྲུལ་བྲལ་གསེར་སྦྱངས་འབར་བའི་རིང་ལུགས་སྤེལ།།སྤང་ལྗོངས་མ་རྒད་ལང་ཚོས་སྒེག་པའི་གཞིར།།རྟ་མཆོག་གོམ་འགྲོས་གློག་ཞགས་ལྟར་འཁྱུགས་པས།།གྲགས་སྙན་བ་དན་ཐོབ་པའི་མདོ་ཁམས་སྨད།།གཡུ་ལོ་བཀོད་པའི་འཇིག་རྟེན་བཞིན་དུ་མཛེས།།དགའ་འཁྱིལ་རི་མོའི་གཟུགས་ཀྱིས་ཉེར་འབབ་པའི།།རྨ་ཀླུང་གཡུ་འབྲུག་འཁྱུགས་པའི་ཉམས་འགྱུར་ཅན།།དབང་ཕྱོགས་རྒྱ་མཚོར་འབབ་པའི་གདགས་སྲིབ་ཏུ།།ཆོས་སྲིད་འབྱོར་བ་དབྱར་གྱི་སྤྲིན་བཞིན་འདུ།།དེ་ཡི་ལྷོ་རྒྱུད་ས་ཡི་སྙིང་བོ་ལ།།འཇ༷མ་དབྱང༷ས་དགྱེས་འཛུམ་བཞ༷ད་པ༷འི་རྡོ༷་རྗེ༷་ཡིས།།བཀྲ༷་ཤིས༷་དགེ་མཚན་གཡས་སུ་འཁྱིལ༷་བའི་གླིང་།།ཐུགས་བསྐྱེད་གསང་གསུམ་སྒྱུ་འཕྲུལ་རོལ་བས་བསྐྲུན།།ཕལ་བའི་གཙུག་རྒྱན་ནོར་བུས་བསྒྲུན་མིན་པའི།།ཡོན་ཏན་རིན་ཐང་མེད་པའི་ཡིད་བཞིན་ནོར།།མང་ཐོས་བཤེས་གཉེན་ཀླུ་དབང་སྙིམ་པ་ལས།།དྲངས་པའི་བློ་གསལ་གནས་འདིར་གཏེར་དུ་བརྡོལ།།ཁྱད་པར་བཤད་སྒྲུབ་གསེར་གྱི་འཁོར་ལོ་ཡིས།།ཐུབ་བསྟན་གླིང་བཞིའི་ཁྱོན་ལ་དབང་བསྒྱུར་བའི།།ཆོས་ཀྱི་རྒྱལ་བོ་འཇིགས་མེད་དབང་བོ་ཡིས།།སྡེ་འདི་བཅུ་ཕྲག་རིག་པའི་མཛོད་དུ་བསྒྲུབས།།སྐྱབས་མཆོག་ལྔ་རིག་སྨྲ་བའི་ཉི་མ་དེའི།།གཏིང་ཟབ་ཐུགས་ཀྱི་དགོངས་པའི་གྲྭ་གཅིག་ཏུ།།དགེ་ལེགས་ཀུན་འཁྱིལ་རྔ་ཡུལ་སའི་ཐིག་ལེར།།དགེ་ལྡན་བསྟན་པའི་རུ་མཚོན་བསྒྲེང་བར་དགོངས།།རྔ་སྟོད་ས་གཞི་སྙིང་སྟོབས་རྩལ་གྱིས་བཟུང་།།དད་གུས་མི་འགྱུར་གཡོ་མེད་ལྷུན་པོའི་ཟླ།།གཏོང་ལ་ཡིད་གོམས་དགེ་བའི་ལྷ་འབངས་དང་།།མཆོད་ཡོན་འབྲེལ་ཐག་གསེར་གྱི་ཞགས་པས་བསྡམས།།འཆི་མེད་གྲུབ་པའི་གནས་ནས་བཅོམ་ལྡན་འདས།།རྫུ་འཕྲུལ་སྒྱུ་མའི་གར་གྱིས་བྱོན་པ་ལྟར།།ནམ་ཞིག་ཀུན་གཟིགས་བསྟན་པའི་རྩ་ལག་མཆོག།གསང་གསུམ་སྣང་བའི་དགའ་སྟོན་འགྱེད་བཞིན་གཤེགས།།དད་ལྡན་བསོད་ནམས་ཤར་གྱི་རི་རྩེ་ནས།།འཕྲིན་ལས་འོད་དཀར་སྤྲོ་བའི་ཟླ་བ་འདིས།།རིས་མེད་གདུལ་བྱའི་ལེགས་ཚོགས་ཀུ་མུད་ཚལ།།ངོ་མཚར་མཛད་བཟང་སྣང་བ་སྟོང་གིས་ཕྱེ།།བླ་མའི་ཐུགས་བསྐྱེད་ཉི་མའི་འོད་སྣང་དང་།།སྦྱིན་བདག་བསོད་ནམས་སྤྲིན་གྱི་འཕྲོ་འདུ་གཉིས།།ལྷུན་གྲུབ་ཐོག་མའི་རྟེན་འབྱུང་མ་འགག་པས།།ཆོས་སྡེ་འཇའ་ཚོན་དྲ་བ་གསར་དུ་འཁྲུངས།།དེ་རྗེས་མགོན་དེའི་སྤྲུལ་བའི་ཟློས་གར་མཆོག།བསྐ༷ལ་བཟ༷ང་རྒྱལ་བ་ཡོངས་ཀྱི་ཐུབ༷་བསྟ༷ན་ཁུར།།འདེགས་ལ་དབ༷ང་ཕྱུག༷་བརྒྱད་ཀྱི་སྟོབས་རྫོགས་པའི།།ཀུན་མཁྱེན་ཆོས་ཀྱི་རྒྱལ་བོ་བཞི་བ་དེས།།རྩོད་རིགས་འཕྲུལ་གྱིས་གཞུང་བརྒྱའི་དཀའ་གནད་མདུད།།ཀུ་ཤའི་རྩེ་ལྟར་མ་འདྲེས་འབྱེད་མཁས་པའི།།བཤ༷ད་སྒྲུབ༷་འདུ༷ས་སྡེ༷་བློ་གསལ་སྟོང་གི་གླི༷ང་།།སྒྲིབ་བྲལ་ཡེ་ཤེས་རོལ་བའི་ཀློང་ནས་བསྐྲུན།།སེང་ཆེན་གཉའ་བས་མཐོར་བཏེགས་ཆོས་ཀྱི་ཁྲིར།།འཇམ་དབྱངས་ས་ལ་བྱོན་པའི་མཚན་སྙན་ཅན།།དཱི་བཾ་བླ་མའི་ཞབས་ཟུང་འཁོར་ལོའི་འགྲོས།།འཇིགས་མེད་ཁྱུ་མཆོག་རྒྱུ་བའི་ཉམས་ཀྱིས་གཤེགས།།དེ་ནས་ཁྲི་རབས་ཉི་ཟླ་རྒྱུ་སྐར་ཕྲེང་།།སྡེ་འདིའི་མཁའ་ལ་རིམ་པར་འཁོར་བ་ལས།།མདོ་སྔགས་པད་དཀར་ཚལ་དང་ཀུ་མུ་ད།།བཞད་པའི་དགའ་སྟོན་བསྐལ་བའི་མཐའ་ལ་བསྲིངས།།མཁས་གྲུབ་ཀླུ་དབང་སྟོང་གིས་ཡོངས་བཟུང་བའི།།ངོ་མཚར་བཤད་སྒྲུབ་རླབས་ཀྱི་འཁྲི་ཤིང་ཅན།།ཆོས་སྡེ་རྒྱ་མཚོ་འཁྱིལ་བའི་ཁོར་ཡུག་ཏུ།།དགེ་ལེགས་ཤིས་པའི་མཚན་མ་ཟད་དུ་མེད།།རབ་སྔོ་སྟོང་བའི་མཁའ་དབྱིངས་ཟླུམ་པོར་འཁྱིལ།།གཟའ་སྐར་བགྲོད་ལམ་དར་དཀར་བཞིན་དུ་བརྐྱངས།།ལས་བཞིའི་འཕྲིན་ལས་འགྲུབ་པའི་གནམ་སའི་དཔྱད།།ཚངས་ཆེན་པིར་གྱིས་བྲིས་འདྲས་ཕྱོགས་ཀུན་བརྒྱན།།མཐོ་ལས་མཐོར་བརྩེགས་ས་འཛིན་ཕྲེང་བ་ཡིས།།སྔོ་བསངས་བུ་མོའི་ལྟོ་བ་འབིགས་བྱེད་ཅིང་།།མུ་འབྲེལ་བརྗིད་ཆགས་རི་བོའི་རྒྱུན་བསྲིངས་པས།།མཁའ་དབྱིངས་དགུ་ཚིགས་ཞགས་པ་ཟིལ་གྱིས་གནོན།།ཤར་ཕྱོགས་སྟག་སྐྱ་རི་མོའི་འཛུམ་བཀྲ་ཞིང་།།གཡུ་འབྲུག་འཁྱུགས་པའི་ཟློས་གར་ལྷོ་ན་ངོམ།།ནུབ་ན་བྱ་དམར་རོལ་བའི་རྩེད་འཇོ་སྟེ།།རུས་སྦལ་འགྱིང་བའི་ས་དཔྱད་བྱང་ན་བརྗིད།།ཁོར་ཡུག་དཔྱིད་དུས་ལྗང་མདོག་ནེ་ཙོའི་སྤུན།།དབྱར་དུས་མེ་ཏོག་རྒྱས་པས་རྨ་བྱའི་མདོངས།།སྟོན་དགུན་གསེར་དང་ཁ་བའི་རང་མདངས་ཀྱིས།།དུས་བཞིའི་འགྱུར་བའི་ལང་ཚོ་མངོན་པར་སྟོན།།ཝུ་བའི་མེ་ཏོག་མཁའ་ལ་རབ་འཐོར་བའི།།ཡིད་འོང་དྭངས་བསིལ་རླབས་ཀྱི་ཕྲེང་བ་ཅན།།གསེར་མིག་འཁྱུག་པའི་བྲོ་ར་ཉལ་འགྲོའི་རྒྱུན།།གདུང་སེལ་བདུད་རྩིའི་མཆོད་ཡོན་ཀུན་ནས་འབབ།།ཕུ་ན་གཡུ་ཡི་མེ་ལོང་ལྟར་བཀྲ་བའི།།སྤང་ལྗོངས་མེ་ཏོག་ཚལ་ན་ཕྱུགས་ཀྱི་ཁྱུ།།མདའ་རུ་ཁོད་སྙོམས་ཡངས་པའི་ཞིང་ས་ལ།།འབྲུ་དྲུག་སྙེ་མའི་མགོ་ལྕོག་ལྡེམ་ལྡེམ་གཡོ།།འཇིག་རྟེན་ཡ་རབས་སྤྱོད་པའི་གོས་ཀྱིས་བཀླུབས།།རྣམ་དཔྱོད་སྙིང་སྟོབས་དར་གྱི་སྐ་རགས་འཆིང་།།མཆོག་གསུམ་ནོར་བུའི་ཅོད་པན་གཙུག་བསྟེན་པའི།།གྲོང་སྡེ་སྐར་ཚོགས་ཕྲེང་བ་ཕྱོགས་སུ་དཀྲིགས།།དེ་ལྟར་ཡིད་འོང་ཤིས་པའི་ངོ་མཚར་གྱིས།།ཁོར་ཡུག་མཛེས་པར་བསྐོར་བའི་སྙིང་བོ་ལ།།ཡོངས་རྫོགས་ཐུབ་བསྟན་རྣམ་པར་འདུ་བའི་སྒོ༷།།མང༷་ཕྱེ་ཆོས་ཀྱི་སྡེ་ཆེན་རྣམ་པར་བརྗིད།།མེ་ལོང་ལྟར་སྙོམས་གཙང་མའི་ས་གཞི་ལ།།བཀོད་ལེགས་གྲྭ་ཤག་མུ་ཏིག་ཕྲེང་བཞིན་བསྟར།།ཟབ་ཆོས་གདངས་སྙན་འཁྲོལ་བའི་གཙུག་ལག་ཁང་།།ཏིང་འཛིན་པིར་གྱིས་བྲིས་འདྲ་ཚར་དུ་དངར།།རྩིག་པ་སྤེན་རྒྱན་པུ་ཤུ་མདའ་གཡབ་སོགས།།གཅིག་ལས་གཅིག་མཐོར་བརྩེགས་པའི་ཁང་བཟང་རྩེར།།གསེར་སྦྱངས་གཟི་འོད་འབར་བའི་རྒྱ་ཕིབས་ཀྱིས།།མཁའ་དབྱིངས་སྤྲིན་གྱི་བང་རིམ་བརྟོལ་བར་དོགས།།ཡེ་ཤེས་རང་གཟུགས་སྲིད་ཞིའི་མཆོད་སྡོང་ཆེ།།འགྲོ་བའི་རེ་སྐོང་བྱིན་རླབས་ནོར་བུའི་གཏེར།།ངོ་མཚར་རྟེན་མཆོག་སྤུངས་པའི་གཞལ་ཡས་ཁང་།།གཅིག་མིན་དུ་མ་གསེར་རིའི་ཕྲེང་ལྟར་བསྒྲིགས།།ཡིད་འོང་དགའ་ལྡན་ལྷ་ཡི་ཕོ་བྲང་ནས།།མཚན་དཔེའི་གཟི་བྱིན་འབར་བའི་མི་ཕམ་མགོན།།མངོན་སུམ་ས་ལ་བྱོན་འདྲའི་སྣང་བརྙན་འདིས།།ཡ་མཚན་དད་པའི་ཀློང་དུ་མི་འདྲེན་སུ།།དེ་ཡི་གཡས་གཡོན་འདུད་པའི་རྣམ་འགྱུར་ཅན།།ནམ་མཁའ་དྲི་མེད་འཇམ་དཔལ་སྙིང་བོའི་ཞབས།།བརྗིད་ཆགས་གཟི་བྱིན་འབར་བའི་ངང་ཚུལ་གྱིས།།བཀའ་གདམས་རང་བསྟན་ཕྱོགས་བཅུར་འཕེལ་བ་མཚོན།།སྟོང་གཟུགས་ཡེ་ཤེས་རང་མདངས་དུས་འཁོར་ལོ།།གྲུབ་བརྒྱའི་སྙིང་གི་ཐིག་ལེ་བྷཻ་ར་ཝའི།།རྟེན་དང་བརྟེན་པའི་བཀོད་པ་ཁྱད་མཚར་བས།།ཐུན་མིན་གསང་ཆེན་སྔགས་ཀྱི་ཆེ་བ་འབྱིན།།སྣ་ཚོགས་ཚོན་བརྒྱ་འཐུང་བའི་པིར་གྱི་རྩེས།།ཞི་དང་ཁྲོ་བོའི་རྣམ་འགྱུར་འབྱམས་ཀླས་པ།།རིས་མེད་སྐྱེ་རྒུའི་མིག་གི་བདུད་རྩི་རུ།།རྩིག་ངོས་འཇའ་ཚོན་རི་མོ་བཞིན་དུ་འཁྱུགས།།གཡུ་བྱུར་དབང་སྔོན་མུ་ཏིག་རྡོའི་སྙིང་བོ།།ཆེས་དཀོན་ཕྲ་རྒྱན་འོད་ཀྱི་རྩེ་དགའ་རྒོད།།འཐག་བཟང་དར་གྱི་བ་དན་རྒྱལ་མཚན་དང་།།རིན་ཆེན་དྲ་བ་དྲ་ཕྱེད་འཕྱང་འཕྲུལ་གཡོ།།སྲིད་ཞིའི་དགེ་ལེགས་འཁྱིལ་བའི་བསིལ་ལྗོངས་འདིར།།མཆོག་གསུམ་རྟེན་གྱི་བཀོད་པ་བགྲང་ཡས་ཀྱང་།།སྣོད་བཅུད་རིན་ཆེན་སྤུངས་པའི་གཞལ་མེད་ཁང་།།དགའ་ལྡན་ཞིང་ལ་འཁྲུལ་སྐྱེད་འདི་ཁོ་ན།།མདོ་སྔགས་བརྒྱུད་པའི་བཀའ་སྲོལ་སྐྱོང་མཁས་པའི།།ཞི་དུལ་དགེ་འདུན་འདུ་བའི་ཀུན་རྭ་ཟུང་།།ཆོས་སྤྱོད་འབྲུག་སྒྲའི་གདངས་སྙན་མ་འགག་པས།།དུས་བཞིར་ཐུབ་བསྟན་དབྱར་གྱི་ལང་ཚོ་འཛིན།།སྒོ་གསུམ་ལེགས་བསྡམས་ཆོས་མཐུན་སྤྱོད་པས་འཚོ།།རྣམ་དཔྱོད་བརྩོན་པས་ཐོས་བསམ་ཀློང་དུ་འབྱམས།།ཞི་དུལ་ཚངས་སྤྱོད་འདུས་པའི་སྡེ་མཐོང་ཚེ།།རྒྱལ་བྱེད་ཚལ་གྱི་རྣམ་པ་སླར་ཡང་དྲན།།བརྒལ་བརྟག་འབྲུག་སྟོང་ལྡིར་བའི་ཆོས་ཀྱི་གྲྭར།།ངོ་མཚར་ལུང་རིགས་གློག་ཞགས་འཁྱུགས་པའི་ལྕེས།།ལོག་རྟོག་བུད་ཤིང་བསྲེགས་པའི་དམར་འོད་ཀྱིས།།རྨོངས་པའི་མུན་པ་སྟོང་བའི་དབྱིངས་སུ་ཟ།།ཚུལ་གསུམ་རྟགས་ཀྱི་མཚོན་ཆའི་འཁྲུལ་འཁོར་གྱིས།།ལོག་སྨྲའི་དཔུང་འཇོམས་ཕྱོགས་གླང་གྲགས་པའི་གཞུང་།།དགག་སྒྲུབ་རིགས་འཕྲུལ་ངར་མའི་རྣོ་རྒྱུན་ཅན།།འཇིགས་མེད་དཔུང་བའི་ཤུགས་ཀྱིས་འདི་ན་འཆང་།།མི་ཕམ་ཞལ་ཆབ་འཕགས་སེང་དགོངས་པའི་བཅུད།།དངོས་བརྒྱད་བདུན་ཅུའི་མཁའ་ལ་དབང་བསྒྱུར་བའི།།ཐོས་བརྩོན་རྣམ་དཔྱོད་འོད་སྟོང་འབར་བའི་གཟིས།།རྒྱ་ཆེན་སྤྱོད་པའི་ལམ་བཟང་མཆོག་ཏུ་གསལ།།འཁོར་བའི་འཆིང་གཅོད་མཐའ་བྲལ་དབུ་མའི་གཞུང་།།ཡབ་རྗེའི་ཟབ་དོན་ལྟ་བའི་ལེགས་བཤད་ལྔས།།མཐར་འཛིན་རྒུད་པའི་རྩ་བ་དྲུངས་ཕྱུང་སྟེ།།གཉིས་སྣང་སྤྲོས་པ་སྟོང་བའི་དབྱིངས་སུ་བསྡུ།།ཤེས་རབ་བསླབ་པ་གཙོར་སྟོན་མངོན་པའི་གཞུང་།།གནས་བརྒྱད་མཛོད་དུ་བསྡུས་བའི་དགོངས་དོན་ཀུན།།མཁས་མང་བཞེད་ཟུར་སྤུ་རིས་མ་འདྲེས་པར།།འཁྲུལ་མེད་ལག་པའི་རྫས་བཞིན་གསལ་བོར་སྟོན།།འདུལ་ལུང་སྡེ་བཞིའི་དགག་སྒྲུབ་གནང་བའི་དོན།།ཡོན་ཤཱཀ་ཐུགས་བཅུད་བདུད་རྩིའི་བཅུད་མྱངས་ཏེ།།སྤོང་བདུན་ཚུལ་ཁྲིམས་དག་པའི་ལྕགས་ཀྱུ་ཡིས།།དམུ་རྒོད་སེམས་ཀྱི་གླང་ཆེན་འདུལ་ལ་རིངས།།སྐྱེ་ཤི་བར་དོའི་ལྕགས་ཁམས་སྐུ་གསུམ་དུ།།བསྒྱུར་བའི་སྦྱོར་བ་གསང་ཆེན་གསེར་འགྱུར་རྩི།།རིམ་གཉིས་བདེ་སྟོང་གདམས་པའི་རླུང་གཤོག་གིས།།ཟླ་ལམ་ཞག་གིས་གཅོད་པའི་སྐལ་བཟང་མང་།།ཐོ༷ས་པ་ངོམས་མེད་གཞུང་བརྒྱའི་མཐའ་ལ་གཏུགས།།བས༷མ་པ་མདོ་སྔགས་གནད་ཀུན་འུབས་ཀྱིས་བསྡུ།།སྒོ༷མ་པ་ཞི་ལྷག་ཟུང་འབྲེལ་ཏིང་འཛིན་བརྟན།།ཐུབ་བསྟན་སྙིང་བོ་བཤད་དང་སྒྲུབ་པས་སྤེལ།།ཟླ་བྲལ་འཆ༷ད་པའི་དཔལ་མངའ་ཐོགས་མེད་དང་།།ཟློག་མེད་རྩོ༷ད་པའི་རིགས་འཕྲུལ་ཕྱོགས་ཀྱི་གླང་།།སྡེབ་ལེགས་རྩོ༷མ་པའི་ཉམས་འགྱུར་རྟ་དབྱངས་རྣམས།།གཅིག་བསྡུས་རྒྱལ་བསྟན་རིན་ཆེན་གསུམ་གྱིས་འཛིན།།ལྟ༷་བ་གྲུབ་མཐའི་ཡང་རྩེ་ཐལ་འགྱུར་ལུགས།།བྱིང་རྒོད་སྐྱོན་བྲལ་དཔྱད་འཇོག་སྤེལ་མའི་སྒོམ༷།།སྡོམ་གསུམ་རྣམ་དག་བཙུན་པའི་སྤྱོད༷་ལམ་གྱིས།།ཐར་བའི་ལམ་བཟང་རྒྱལ་བའི་བཀའ་བཞིན་བསྒྲུབས།།ཕུན་ཚོགས་དགེ་མཚན་འཁྱིལ་བའི་སྣོད་བཅུད་ཀྱིས།།སྲིད་ཞིའི་ཕྱྭ་གཡང་གནས་འདིར་འགུགས་བྱེད་ཅིང་།།ཆོས་སྲིད་ཉི་ཟླ་འབར་བའི་འོད་སྣང་གིས།།ཆེར་སྙིགས་དུས་ཀྱི་རྒུད་པའི་སྨག་རུམ་འཇོམས།།སཱུརྱའི་མཚན་འཆང་སྐྱབས་མཆོག་དྲུག་པའི་བཀས།།འཇ༷མ་དབྱ༷ངས་མངོན་པར་དགའ་བའི་བློ༷་གྲོས༷ཀྱིས།།བསྟན༷་པའི༷་སྒྲོན༷་མེ༷་འདེགས་མཛད་བདག་གི་བཤེས།།ལུགས་གཉིས་འཁོར་ལོས་བསྒྱུར་བས་སྡེ་འདི་སྐྱོང་།།མགོན་ཁྱོད་ཆོས་མཐུན་དམ་པའི་རང་གཤིས་རྫོགས།།རླབས་ཆེན་བྱ་བ་བསོད་ནམས་ཤུགས་ཀྱིས་འགྲུབ།།ཐབས་མཁས་སྤྱོད་པས་བསྟན་འགྲོའི་ཕན་བདེ་སྤེལ།།དུས་དང་བསྟུན་པའི་ལེགས་མཛད་མཁའ་ལྟར་ཡངས།།དེ་ཕྱིར་མཛད་འཕྲིན་རྟ་བདུན་གྱིས་བསྐྱངས་པའི།།ལེགས་ཚོགས་པད་དཀར་བཞད་པའི་ཆོས་ཀྱི་སྡེའི།།གྲགས་སྙན་དྲི་བསུང་ཕྱོགས་ཀྱི་མཐར་འཁྲིལ་བས།།སྐལ་བཟང་རྐང་དྲུག་ཕྲེང་བ་ངང་གིས་འདུ།།སླད་མར་བདེ་སྐྱིད་ལྷ་ཡི་དཔལ་ལ་འགྲན།།ཀུན་ཁྱབ་སྙན་པའི་བ་དན་མཁའ་ལ་བསྒྲེང་།།ཆོས་སྲིད་འབྱོར་བས་ཕྱོགས་ཀྱི་མཐའ་གྲུ་འགེངས།།འགལ་རྐྱེན་རྒུད་ཚོགས་དབྱིངས་སུ་ཞི་གྱུར་ཅིག།དྲེགས་ལྡན་བྱེ་བའི་ལ་ཐོད་གང་གི་ཞབས།།རྣམ་པར་རྩེན་པའི་ཁྲི་ལ་རབ་འདུད་པའི།།སྲིད་ཞིའི་རྒྱན་གཅིག་འཇམ་དབྱངས་བཞད་པའི་སྡེ།།ཐུབ་བསྟན་མཛེས་པའི་དཔལ་དུ་རྟག་བརྟན་ཤོག།དགེ༷་བཅུའི་ཕུན་ཚོགས་འཁྱིལ་བའི་རྔ་ཡུལ་དུ།།དགེ༷་མཚན་དཔལ་གྱི་འོད་སྣང་རྟག་འབར་ཞིང་།།དགེ༷་ལེགས་མཐུན་རྐྱེན་འཛོམས་པའི་རྟེན་འབྱུང་གིས།།དགེ༷་ལྡན་བསྟན་པའི་དབུ་འཕང་མཐོ་གྱུར་ཅིག།རྨད་བྱུང་སེམས་བསྐྱེད་གསེར་གྱི་ཡུ་བ་བརྟན།།ཕྱིན་དྲུག་བསྡུ་བཞིའི་དར་གྱི་ཤམ་བུ་གཡོ།།མཁའ་མཉམ་གཞན་ཕན་དགེ་བའི་གྲིབ་བསིལ་ཅན།།རྒྱལ་སྲས་སྤྱོད་པའི་གདུག༷ས་དཀར་བསྒྲེང་གྱུར་ཅིག།ལས་ཉོན་རྦ་རླབས་འཁྲུགས་པའི་སྲིད་པའི་མཚོར།།འཁོར་བའི་ཉེས་སྐྱོན་འདམ་གྱིས་མ་གོས་པར།།ངོ་མཚར་མཛད་བཟང་དྲི་བསུང་འབུམ་སྤྲོ་བའི།།བསྟན་འཛིན་པད༷་དཀ༷ར་ཕྱོགས་བཅུར་བཞད་གྱུར་ཅིག།ཆོས་སྲིད་མཐོང་བའི་གསེར་མིག་ཟླུམ་པོར་འཁྱིལ།།རླབས་ཆེན་བྱ་བའི་གཤོག་དྲུག་འཁྱུག་རྩལ་ངོམ།།ཕུན་ཚོགས་འབྱོར་བའི་རླབས་ཕྲེང་རྩེར་འཕྱོ་བའི།།བློ་གསལ་གསེ༷ར་ཉ༷་དགའ་བས་རྩེན་གྱུར་ཅིག།ཕུལ་བྱུང་དམ་པའི་རང་མདངས་འོད་དུ་འབར།།རྣམ་དག་བསླབ་གསུམ་རི་མོ་གཡས་སུ་འཁྱིལ།།ལེགས་བཤད་བརྗིད་ཆགས་དབྱངས་ཀྱི་ང་རོ་ཅན།།བཤེས་གཉེན་དུང༷་དཀར༷་སྙན་གྲགས་རྒྱས་གྱུར་ཅིག།རླབས་ཆེན་བསོད་ནམས་རིན་ཆེན་ཁམས་ལས་གྲུབ།།གཞུང་ལུགས་མང་ཐོས་སྙིང་བོའི་བཅུད་ཀྱིས་གཏམས།།དོན་གཉིས་ལེགས་ཚོགས་བདུད་རྩིའི་འབྱུང་གནས་ཆེ།།སྐྱེས་མཆོག་གསེར་གྱི་བུ༷མ་པས༷་མཛེས་གྱུར་ཅིག།སྐྱེས་སྦྱངས་ཡོན་ཏན་ནོར་བུའི་ལྟེ་བ་ཟླུམ།།རྨོངས་གཅོད་འབར་བའི་རྩིབས་སྟོང་ཕྱོགས་སུ་བཀྲ།།ལུགས་གཉིས་དཔྱོད་པའི་མུ་ཁྱུད་མཐར་བཅིངས་པའི།།མཁས་མཆོག་གསེར་གྱི་འཁོར༷་ལོས༷་བརྒྱན་གྱུར་ཅིག།བཅུ་ཕྲག་རིག་གནས་ཁུགས་པ་སྣོལ་མར་བསྡེབས།།འཆད་རྩོད་རྩོམ་པའི་དྲྭ་མིག་སྙིང་བོར་མཛེས།།དོན་ལྡན་དགེ་ལེགས་ཤིས་པའི་རི་མོ་ཅན།།སྐལ་བཟང་དཔལ༷་བེའུས༷་ས་གསུམ་ཁྱབ་གྱུར་ཅིག།སྐྱེ་དགུའི་ཕན་བདེའི་ཁང་བཟང་མཛེས་པའི་རྒྱན།།ཆོས་དབྱིངས་མི་མཐུན་ཞི་བའི་རྟགས་ཀྱིས་མཚན།།ཟུང་འཇུག་སྐུ་གསུམ་ནོར་བུའི་ཏོག་འབར་བའི།།བསྟན་པའི་རྒྱལ༷་མཚན༷་ཕྱོགས་བཅུར་བསྒྲེང་གྱུར་ཅིག།  །།

དོན་ལྡན་བསྔགས་པའི་མེ་ཏོག་ཅེས་བྱ་བའི་བསྟོད་པའི་རབ་བྱེད་འདི་ཉིད་རྔ་ཡུལ་སྒོ་མང་དགོན་གྱི་གྲྭ་རིགས་རྡོ་རམས་པ་འབུམ་ཐང་དར་རྒྱས་རྒྱ་མཚོའམ་བརྡ་སྤྲོད་ཀུན་བཤད་ཀྱི་མིང་ལ་དབྱངས་ཅན་བཞད་པའི་བཤེས་གཉེན་དུ་འབོད་པས་རབ་གནས་ཤིང་འབྲུག་ཁྲུམས་སྟོད་ཟླ་བའི་དམར་ཕྱོགས་ཀྱི་བཟང་བོ་གཉིས་པའི་ཚེས་ལ་(༢༠༢༤་༩་༢༤་)དཔལ་ལྡན་བཀྲ་ཤིས་འཁྱིལ་གྱི་ཉེ་འགྲམ་དབེན་གནས་ཡིད་དགའ་ཆོས་འཛིན་དུ་མཇུག་རྫོགས་པར་བྲིས།  །

ནང་དོན་འགོད་ལུགས།