ཐུབ་དབང་རྟོགས་བརྗོད་པད་དཀར་སྙེ་མ།  དགེ་འདུན་དོན་འགྲུབ། 

འགྲོ་ལ་རྗེས་ཆགས་ཐུགས་རྗེ་ལང་ཚོ་བགྲང་ཡས་སྐྱེ་རྒུའི་མོས་ཁམས་རྒྱ་མཚོར་ཆུ་ཟླའི་གཟུགས་བཞིན་འཆར་བའི་༵སྐུ།། 

ཐ་དད་འགྲོ་ཀུན་སྐད་དང་མཐུན་པར་རྟེན་འབྱུང་གཏམ་ཚོགས་སྨྲ་བའི་གདངས་སྙན་རྩོལ་མེད་ཤུགས་ཀྱིས་འབྱུང་བའི་གསུང༵་།། 

དོན་དམ་ལེགས་གཟིགས་མཉམ་བཞག་རོལ་བས་ཀུན་རྫོབ་སྒྱུ་མའི་ལྟད་མོ་མ་བཀག་བདེན་གཉིས་གཟིགས་པ་རྫོགས་པའི་ཐུག༵ས།། 

སྟོབས་འབྱོར་ཕུན་ཚོགས་སྙེམས་པ་རབ་མཐོ་ལྷ་མི་ཆེ་དགུའི་དྲེགས་པ་བོར་ཏེ་གཙུག་ཏོར་ས་ལ་བསྙིལ་བ་ཅན།།

སྲས་བཅས་རྒྱལ་ཀུན་བསྔགས་བརྗོད་བདེན་ཚིག་ཕྲེང་།།

བསྟར་བའི་ཐུགས་བསྐྱེད་གསེར་གྱི་སྙིང་བོའི་གཞིར།།

འཁྲུངས་པའི་ཟླ་མེད་སྟོན་པ་ཤཱཀྱའི་ཏོག།

སྤྱི་བོའི་རྒྱན་དུ་ལྷམ་མེར་མཛེས་གྱུར་ཅིག།

ཐེག་དཀ༵འ་མ་ལུས་འགྲོ་བ་སྒྲོལ་བའི་ཁུར།།

བྱ་དཀ༵འ་རྒྱལ་སྲས་སྤྱོད་པས་ཉེར་བླངས་ནས།།

གདུལ་དཀ༵འ་སྙིགས་མའི་འགྲོ་བ་འདྲེན་པའི་ཕྱིར།།

རྙེད་དཀ༵འ་གཏན་གྱི་བདེ་བའི་སར་གཤེགས་པ།།

མཁྱེན་པས་ཀུན་རྨོངས་སྲིད་པའི་འཆིང་ཐག་བཅད།།

ཐུགས་རྗེས་ཞི་དབྱིངས་བདེ་དགའི་ངལ་གསོ་བཀག།

སྲིད་ཞིའི་མཐའ་སྤངས་སྲིད་ཞི་མཉམ་ཉིད་དུ།།

འཆར་བའི་ཏིང་འཛིན་རོལ་བ་ཁྱེད་ཀྱིས་བཟུང་།།

ཚོགས་གཉིས་ལྷུན་རྫོགས་དཔག་བསམ་ལྗོན་པའི་རྩེར།།

བསྡུ་བཞི་ཕྱིན་དྲུག་འབྲས་བུས་ཁུར་གྱིས་སྙིམ།

ཐེག་གསུམ་ཆོས་ཚུལ་རོལ་བ་འདིར་ལྟོས་དང་།།

ངོ་མཚར་སྤྲུལ་བའི་བཀོད་པ་སྙིང་ལ་འབབ།།

སྔོན་ཚེ་ཁྱེའུ་བླ་མའི་མཚན་འཆང་ཁྱེད།།

སྣོད་བཅུད་ཡོངས་དག་དགའ་ལྡན་ཞིང་མཆོག་ཏུ།།

རྫོགས་ལྡན་ཆོས་ཀྱི་སྒོ་བརྒྱ་འབྱེད་པའི་སླད།།

མངོ༵ན་པ༵ར་སྐྱེ་བ༵འི་མཛད་བཟང་ལྷ་ཡིས་བསྒྲགས།།

བསྐལ་བར་གོམས་པའི་ཚོགས་གཉིས་བདུད་རྩིའི་ཆར།།

སྨན་པའི་ཡུལ་དུས་སྐལ་བཟང་ཤར་བའི་མོད།།

གླང་ཆེན་ཐལ་དཀར་ཉམས་ཀྱིས་འཛམ་གླིང་དུ།།

ལྷ༵་ལ༵ས་བབ༵ས་པའི་ངོ་མཚར་དཔལ་དུ་ཤར།།

རིགས་རུས་ཕུན་ཚོགས་སྒྱུ་འཕྲུལ་ལྷ་མོའི་ལྟོར།།

པདྨའི་མཚོ་ལ་པད་དཀར་གཞོན་ནུའི་ཟླར།།

ནོངས་པས་མ་གོས་བྱམས་པའི་ཏིང་འཛིན་བསྐྱངས།།

ལྷུམ༵ས་ཀྱི་༵རྫིང༵་བུར༵་རོལ་བའི་དགའ་སྟོན་ཡིན།།

ཟླ་བ་བཅུ་རྫོགས་ལུམྦིའི་དགའ་ཚལ་དུ།།

ཚངས་དང་རྒྱ་བྱིན་སྙེམས་པ་ཡོངས་བཏང་སྟེ།།

ཁྱེད་སྐུ་བལྟམ༵ས་པ༵འི་བཀྲ་ཤིས་དགའ་སྟོན་ཀྱིས།།

ཤཱཀྱའི་ཏོག་ལྟར་འཕགས་པའི་སྔོན་ལྟས་བསུས།།

སྐྱེས་སྦྱངས་དཔལ་ཀུན་རྫོགས་པའི་གཞོན་ནུ་དེས།།

མངོན་རློམ་སྐྱེ་བོའི་དྲེགས་པ་ཚར་བཅད་དེ།།

མ་ག་ངྷ་ཡི་ས་ཆེན་ཕང་བ་རུ།།

དཔ༵འ་སྤོབ༵ས་བད༵ག་གིར༵་བྱས་པའི་སྙན་པ་བསྒྲེངས།།

ངོ་ཚ་ཁྲེལ་བག་གོས་ཀྱིས་རབ་འཁྱུད་ཅིང་།།

ཞི་དུལ་དཔལ་གྱིས་སྒེག་པའི་ས་འཚོ་མ།།

ཁབ་ཏུ་བསུས་ཤིང་འཁོ༵ར་དགྱེས༵་རོལ་༵བ་ཡིས།།

འཇིག་རྟེན་ཚུལ་དང་བསྟུན་པའི་ཆོ་ག་བསྒྲུབས།།

ཁམས་གསུམ་འཁོར་བ་རྒུད་པའི་མཐའ་ཅན་དུ།།

གཟིགས་ནས་རྒྱལ་སྲིད་ཀླུ་དབང་བང་མཛོད་ཀྱང་།།

མཆིལ་མའི་ཐལ་བར་བསྐྱུར་བའི་ཡིད་འབྱུང་གིས།།

ཁྱིམ་ལས་རབ༵་ཏུ་བྱུང༵་བ༵འི་རྟུལ་ཞུགས་བླངས།།

གཡོ་མེད་ཏིང་འཛིན་སྤྱོམས་པའི་མུ་སྟེགས་ཀྱི།།

ཆོ་གས་མ་ངོམས་ནཻ་ར་ཉྫ་ནའི་འགྲམ།།

ཏིལ་གྱི་འབྲས་བུས་ལུས་ཀྱི་སྟོབས་བསྐྱེད་དེ།།

བརྩོན་པས་བྱང་ཆུབ་སྒྲུབ་ལ་དཀ༵འ་སྤྱད༵་མཛ༵ད།།

བྱང་ཆུང་ཤིང་དབང་དྲུང་དུ་དཔའ་བོ་ཁྱེད།།

དཔུང་དང་མཚོན་གྱི་གཡུལ་འགྱེད་མ་བརྩམས་པར།།

སྐུ་བཞིའི་རྒྱལ་ས་འཛིན་པའི་ཏིང་འཛིན་གྱིས།།

བདུད༵་སྡེ༵་བཅོ༵མ་པའི་རྒྱལ་རྔ་འཛིན་མས་བརྡུངས།།

ས་གའི་ཉ་ཡི་སྐྱ་རེངས་དང་པོའི་ལྷན།།

རྡོ་རྗེ་གདན་ཞེས་རི་དབང་ལྷུན་པོའི་སྤོར།།

བྱང༵་ཆུབ༵་རྫོ༵གས་པར་བརྙེས་ཚེ་ཁྱེད་སྐུའི་གཟི།།

ཐུབ་བསྟན་གླིང་བཞི་གསལ་བའི་དཔལ་དུ་ཤར།།

བཤད་སྒྲུབ་འཁོ༵ར་ལོ་༵གསུམ་༵གྱི་བདུད་རྩིའི་རོས།།

སྣ་ཚོགས་གདུལ་བྱའི་མོས་ཁམས་གསོས་པའི་མོད།།

ཐེག་གསུམ་སྤངས་རྟོགས་སྨན་གྱི་ལྗོན་བཟང་གིས།།

སྐལ་བཟང་འགྲོ་ཀུན་གཏན་བདེའི་བཙན་སར་བཀོད།།

རྩྭ་མཆོག་ཕང་བར་སྐྱེ་འཆིའི་བརྡ་ཐབས་སུ།།

མི་རྟག་གསུང་མགུར་ཚངས་པའི་དབྱངས་སྙན་གྱིས།།

ཡིད་འོད་གཟུགས་སྐུའི་བཀོ༵ད་པ༵་ཉེར་བསྡུས་༵ཏེ།།

འཁོར་ཚོགས་སྙིང་ལ་རྟག་འཛིན་འཆིང་ཐག་ཀློད།།

དེ་ལྟའི་སྤྲུལ་བའི་གར་བསྒྱུར་སྣ་ཚོགས་པས།།

མཐའ་ཡས་འགྲོ་ཀུན་སྒྲོལ་བའི་ཁུར་བླངས་ཀྱང་།།

བདུད་བཞིའི་རྒུད་པ་སྤངས་པའི་ཆོས་ཀྱི་སྐུ།།

དོན་དམ་དབྱིངས་ལས་གཡོ་བ་ལ་ཞིག།

ཁྱེད་སྐུའི་ངོ་མཚར་ཨུ་དུམ་ཝ་རའི་ཕྲེང་།།

ཚར་དུ་དངར་བའི་ལེགས་བྱས་དབྱིག་གི་མཛོད།།

ཚིག་གི་སྲད་བུར་བགྱིས་པའི་འདུ་བྱེད་ཀྱིས།།

ཉིད་ཀྱི་སྤྱོད་མཆོག་བརྩོན་པས་བསྒྲུབ་ནུས་ཤོག།

   ཅེས་ལྷ་དང་བཅས་པའི་འགྲོ་བ་ཡོངས་ཀྱི་མ་འདྲིས་པའི་མཛའ་བཤེས་ཆེན་པོ ༸སྟོན་པ་ཐུབ་པའི་དབང་བོར་མཛད་ཆེན་བཅུ་གཉིས་ཀྱི་སྒོ་ནས་བསྔགས་པའི་སྟངས་ཀར། གནས་བརྟན་སྡེ་བའི་ལུགས་ཀྱི་སྟོན་པ་བདེ་བར་གཤེགས་ནས་བགྲང་བྱ༢༥༦༨སོང་བ། བོད་རབ་རྒྱན་ཤིང་འབྲུག་ལོའི་ཧོར་ཟླ༡པོའི་དཀར་ཕྱོགས་སུ་ཆོ་འཕྲུལ་སྨོན་ལམ་ཆེན་མོ་དང་བསྟུན་ཏེ་འཕྲལ་མར་སྦྱར་བའོ།།

琼翁藏文文学平台是属于整个藏族作家的一种多样性的文学平台，在这里你可以阅读到论文、散文、诗歌、随笔、书法及书信；还可以聆听到讲座、歌曲、朗诵。这里无奇不有，应有尽有。也欢迎各位作家前来投稿！