གངས་ཅན་ལྗོངས་སུ་སངས་རྒྱས་བྱོན་པ་ཞེས་པའི་བཀླགས་ཐོ།ཡ་རུ་བསྟན་འཛིན།

树立中华民族共同体意识，坚定文化自信，促进文化繁荣，为民族复兴，国家强盛而不懈努力

‍

རྗེ་ཙོང་ཁ་བ་ཆེན་པོའི་རྣམ་ཐར་གསར་བསྒྲིགས་༼གངས་ཅན་ལྗོངས་སུ་སངས་རྒྱས་བྱོན་པ་༽ཞེས་པའི་དཔེ་ཀློག་ཟིན་ཐོ་དཔྱོད་ལྡན་ཡིད་ཀྱི་དགའ་སྟོན།

རྩོམ་པ་པོ།    ཡ་རུ་བསྟན་འཛིན་རྒྱ་མཚོ།

གླེང་གཞི།

    ཁོ་བོས་སྔོན་མ་ཉིས་སྟོང་བཅུ་དགུ་ལོ་སྟེ་འཇམ་མགོན་བླ་མ་ཙོང་བ་ཆེན་པོ་སྐུ་མྱ་ངན་ལས་འདས་ནས་ལོ་འཁོར་དྲུག་བརྒྱ་ལོན་པའི་དུས་ཆེན་ཁྱད་པར་བའི་སྐབས་དེར། དགེ་བཤེས་གླང་རི་ཐུབ་བསྟན་སྦྱིན་པ་ལགས་ཀྱིས་རྗེ་ཙོང་ཁ་བའི་རྣམ་ཐར་དབྱིན་ཡིག་གི་ལམ་ནས་བྲིས་པར་རྣམ་རྒྱལ་ལགས་ཟེར་བ་ཞིག་གིས་བཅར་འདྲི་བྱས་པ་དང་།དགེ་བཤེས་ཁོང་གིས་རྣམ་ཐར་གསར་བྲིས་སྐོར་ལ་བསམ་ཚུལ་གནང་ཡོད་པའི་རྩོམ་ཡིག་གཉིས་དྲ་ལམ་དུ་རིག་མ་ཐག་བཀླགས་ཏེ།འདི་ལྟ་བུའི་རྣམ་ཐར་གསར་བྲིས་འདི་བོད་ཡིག་གི་ཐོག་ནས་མི་རིང་མྱུར་དུ་མཇལ་ཐུབ་ན་ཅི་མ་རུང་སྙམ་པའི་བློ་འཚབ་ཤུགས་དྲག་བྱུང་།དེ་ནས་བཟུང་ལྟོ་འདུན་ཅན་ལ་ཟས་ནང་བཞིན་ཡུན་རིང་རེ་ཞིང་སྒུག་པ་ཡིན།སྟབས་ལེགས་པ་ཞིག་ལ་ད་ལོའི་བོད་ཟླ་ལྔ་བའི་ནང་དྲ་སྒང་ནས་དཔེ་དེབ་དངོས་སུ་བོད་ཡིག་གི་ལམ་ནས་ལྗགས་རྩོམ་གནང་ནས་པར་བསྐྲུན་བྱས་ཡོད་པ་མཐོང་མ་ཐགདཔེ་ཆ་གཉིས་ལམ་སང་བླུ་བསམ་ནས་འབྲེལ་བ་བྱས་དུས་པར་ཐེངས་དང་བོ་ཚར་སོང་རབས་བཤད་པས་ཧ་ཅང་བློ་ཕམ་པོ་བྱུང་།ཡིན་ནའང་ཡང་དང་བསྐྱར་དུ་འབྲེལ་བ་བྱས་ནས་དྲུག་པའི་ཟླ་སྟོད་ཙམ་ལ་དཔེ་དེབ་དངོས་སུ་ལག་ལ་འབྱོར།དེ་ནས་རང་ཉིད་ལ་དགོས་དབང་གིས་བྱ་བའི་བྲེལ་སོང་ཆེ་ནའང་སྐབས་དང་ཟུར་ཙམ་གྱི་ཆུ་ཚོད་འཕྲོ་བརླག་ཏུ་མ་བཏང་བར་མགོ་ནས་མཇུག་བར་ཞིབ་ཀློག་བྱས་ནས་ཟིན་ཐོའི་ཚུལ་དུ་རང་ལ་བློ་བསྐྱེད་རག་པ་དང་མཁོ་བའི་ཡིག་ཆ་དག་ལ་ཚོན་ལྡན་སྨྱུ་གུས་རྟགས་བརྒྱབ་པ་ཡིན།རྗེས་ནས་དེ་དག་བསྐྱར་ཀློག་རེ་བྱས་པ་ན་དཔེ་ཀློག་ཟིན་ཐོ་ཞིག་འབྲི་འདུན་སྐྱེས།ཡིན་ནའང་དགེ་བཤེས་ཁོང་གིས་བསམ་ཚུལ་གནང་ཡོད་པའི་རྩོམ་ཡིག་ཅིག་ཡོད་པ་དེ་ནག་བསུབ་བཏང་ཡོད་པ་དྲན་དུས་ཁོ་བོའི་ཟིན་བྲིས་ཀྱི་དཔྱད་གཞིའི་རྒྱུ་ཆ་དེ་འདྲས་འབེལ་བོ་མིན་པའི་ཚོར་མྱོངབྱུང་། ལར་ཁོ་བོས་དཔེ་ཀློག་ཟིན་བྲིས་འདི་ཚན་པ་ལྔའི་སྒོ་ནས་གླེང་བར་འདོད། 

    དང་བོ། རྗེ་ཙོང་ཁ་བ་བྱོན་པའི་དུས་སྐབས་ཀྱི་རིག་གནས་ལོ་རྒྱུས་དང་མཆོད་ཡོན་སྦྱིན་བདག་གི་སྐོར། གཉིས་པ། གསུང་རྩོམ་དངོས་ཀྱི་ཁུངས་ལུང་དང་ཁྱད་ཆོས་སྐོར་གྱི་རེག་ཟིན། གསུམ་པ། རྗེ་རིན་པོ་ཆེའི་གཞུང་རྩོམ་གང་ལའང་དེང་རབས་མཁས་པའི་ཉམས་ཞིབ་ཀྱི་ཆ་ཚད་མཐོན་པོས་མཇལ་དུ་ཡོད་པའི་སྐོར། བཞི་བ།རྣམ་ཐར་གསར་བསྒྲིགས་འདི་ལ་གཞུང་དོན་དང་ལོ་རྒྱུས་གནད་བསྡུས་གནང་ཡོད་པའི་སྐོར། ལྔ་བ། རྣམ་ཐར་མཛད་པ་པོས་ཐོག་མའི་བསམ་འདུན་བཞིན་འབྲི་མ་ཐུབ་པ་དང་དོགས་སློང་གི་སྐོར་སོགས་ཀྱི་སྒོ་ནས་གླེང་བར་བགྱིའོ།།

དང་བོ། རྗེ་ཙོང་ཁ་བ་བྱོན་པའི་དུས་སྐབས་ཀྱི་རིག་གནས་ལོ་རྒྱུས་དང་མཆོད་ཡོན་སྦྱིན་བདག་གི་སྐོར།

    རྗེ་རིན་པོ་ཆེ་བྱོན་པའི་དུས་སྐབས་འདི་ནི་དབུས་གཙང་གི་ཕྱོགས་སུ་ཆོས་དང་རིག་གནས་ཧ་ཅང་དར་ཡོད་པའི་དུས་སུ་ཡིན་ཞིང་། དགོན་སྡེ་ཡང་བདེ་གསང་གུང་གསུམ་དང་དགའ་སྐྱོར་ཟུལ་གསུམ་སོགས་ཀྱིས་མཚོན་པར་དགོན་སྡེ་གང་ལའང་འཆད་ཉན་བཤད་སྒྲུབ་དར་བའི་རྩེར་སོན་ཡོད་པ་དང་།འདི་ཉིད་འཛིན་སྐྱོང་སྤེལ་གསུམ་བྱེད་པའི་བསྟན་འཛིན་གྱི་སྐྱེས་བུ་དམ་པ་བསམ་གྱིས་མི་ཁྱབ་པ་བྱུང་ཡོད་པའི་སྐབས་ལ་ཁེལ་འདུག་སྟེ།དཔེར་ན།རྣམ་ཐར་གསར་བསྒྲིགས་༼གསལ་བཤད།གཤམ་དུ་འདི་ནས་ལུང་འདྲེན་སྐབས་རྣམ་ཐར་ཞེས་འབྲི་རྒྱུ་ཡིན།༽ལས།རྔོག་ལོ་ཆེན་པོ་བློ་ལྡན་ཤེས་རབ་བོད་ཀྱི་ཚད་མ་རིག་པའི་སྲོལ་འབྱེད་ཀྱི་མེས་པོ་ཡིན་ན།འཇམ་མགོན་ས་པཎ་ནི་བོད་དུ་རིག་གནས་ལ་ཆེ་བ་ལྔ་དང་ཆུང་བ་ལྔ་རུ་གཏན་འབེབས་མཛད་མཁན་གྱི་ཐོག་མ་དེ་ཡིན་ཞེས་པ་དང་།དེ་བཞིན་དུ་བཅོམ་ལྡན་རིག་པའི་རལ་གྲི་དང་།ཁོང་གི་སློབ་མ་དབུས་པ་བློ་གསལ་གཉིས་གཙོས་པའི་སྣར་ཐང་གི་མཁས་པ་རྣམས་ཀྱིས།བོད་སྐད་དུ་བསྒྱུར་བའི་བཀའ་དང་བསྟན་བཅོས་ཡོད་དོ་ཅོག་ཕྱོགས་གཅིག་ཏུ་བཏུས་ཏེ་བཀའ་འགྱུར་དང་བསྟན་འགྱུར་གཉིས་སུ་ཕྱེ་སྟེ་སྒྲིག་པའི་ལས་འགུལ་བརྩམས་ཤིང་།དེ་ལྟར་འཕགས་ཡུལ་ནས་བསྒྱུར་བའི་གསུང་རབ་རྣམས་ཕྱོགས་སྒྲིག་བྱེད་པའི་ལས་གཞི་དེ་རྩ་བར་བཞག་སྟེ།ཐམས་ཅད་མཁྱེན་པ་བུ་སྟོན་རིན་ཆེན་གྲུབ་ཀྱིས་ཞུས་ཆེན་དང་འབྲེལ་ལས་འགུལ་དེའི་མཇུག་བསྐྱངས་ཏེ།ད་ལྟ་ཡོངས་སུ་གྲགས་པའི་བཀའ་འགྱུར་བསྟན་འགྱུར་གྱི་སྡེ་ཚན་སོ་སོར་ཕྱེ་བའི་དཀར་ཆག་གཏན་འབེབས་མཛད་པ་འདི་བྱུང་ཞེས་གསུངས་པའི་སྐབས་འདི་འདྲར་རྗེ་རིན་པོ་ཆེ་བྱོན་ནས་ཐུན་མོང་དང་ཐུན་མོང་མ་ཡིན་པའི་རིག་པའི་གནས་མཐའ་དག་ལ་ཐོས་བསམ་རྒྱ་ཆེར་གནང་བ་དང་།གཞན་བཀའ་བསྟན་ཆ་ཚང་ཚལ་གུང་ཐང་དུ་བཞུགས་གནང་བར་རྗེ་ཙོང་ཁ་བ་ཆེན་པོས་ལོ་ངོ་བཞི་ཙམ་གྱི་རིང་དཔེ་མཚམས་བསྡམས་ཏེ་ཞིབ་ཏུ་གཟིགས་རྟོག་མཛད་པ་ལས།དེ་དུས་ཁོང་གིས་འཕགས་ཡུལ་ནས་བྱུང་བའི་བཀའ་བསྟན་གྱི་གསུང་རབ་ཀྱི་དགོངས་པ་ལེན་སྟངས་བློ་བསྐྱེད་དམིགས་བསལ་ཞིག་འཁྲུངས་བྱུང་སྣང་ཞེས་གསུངས་པ་ལྟར་རོ།།ད་དུང་མཆོད་ཡོན་སྦྱིན་བདག་གི་སྐོར་ནས་བཤད་ན་རྣམ་ཐར་ལས།ཕག་གྲུའི་སྲིད་རྒྱུན་ནང་ཁྲིར་དུས་ཡུན་རིང་ཤོས་བཞུགས་པའི་མི་དབང་གྲགས་པ་རྒྱལ་མཚན་གྱི་དབང་བསྒྱུར་དེ། ཕྱི་ལོ༡༣༥༡_༡༤༣༢བར་དུ་གནས་ཤིང་།དུས་སྐབས་དེ་ནི་རྗེ་ཙོང་ཁ་བ་ཆེན་པོ་བོད་དུ་དུ་ཆོས་ལུགས་ཀྱི་མི་སྣ་ཆེ་གྲས་དང་མཁས་པའི་གཙུག་རྒྱན་དུ་གྱུར་བའི་དུས་དང་མཉམ་དུ་ཁེལ་ཡོད།མིང་དབང་དགུང་ལོ་གཞོན་དུས་སུ་རྗེ་ཙོང་ཁ་བ་དང་ཐོག་མར་མཇལ་ཞིང་།དེ་དུས་རྗེ་ཙོང་ཁ་བ་ཉིད་ཀྱང་བཙུན་པ་གཞོན་ནུ་ཞིག་ཡིན་པའི་སྐབས་ཡིན།ཕྱིས་སུ་མི་དབང་གྲགས་པ་རྒྱལ་མཚན་ནི་རྗེ་ཙོང་ཁ་བའི་སྦྱིན་བདག་གཙོ་བོར་གྱུར་པར་མ་ཟད།མི་དབང་གིས་རྗེ་ཙོང་ཁ་བའི་གསུང་ཆོས་ཆེ་གྲས་མང་བོ་ཞིག་གི་སྦྱིན་བདག་མཛད་པ་དང་།ལྷག་པར་དུ་ཕྱི་ལོ༡༤༠༩ལོར་ལྷ་ལྡན་སྨོན་ལམ་ཆེན་མོ་དང་།དགའ་ལྡན་གྱི་དགོན་པ་ཕྱག་འདེབས་པ་གཉིས་ཀྱི་ཐད་ལའང་རྒྱབ་སྐྱོར་དམིགས་བསལ་གནང་ཡོད་ཅེས་དང་།མི་དབང་ཙམ་དུ་མ་ཟད་ཕག་གྲུའི་བློན་པོ་ཆེ་ཁག་དཔེར་ན་སྣེའུ་ནམ་མཁའ་བཟང་བོ་སོགས།དབང་ཤུགས་ཅན་གྱི་མི་སྣ་རྣམས་ནས་དད་མོས་དང་འབྲེལ་རྒྱབ་སྐྱོར་དང་དཔལ་འབྱོར་གྱི་མཐུན་རྐྱེན་སྦྱར་བ་སོགས་ཀྱིས།རྗེ་ཙོང་ཁ་བ་ཆེན་པོའི་མཛད་པ་འཕྲིན་ལས་རྣམས་ཆེས་ཆེར་རྒྱས་པའི་ཁོར་ཡུག་ཕུན་སུམ་ཚོགས་པ་ཞིག་བསྐྲུན་ཡོད་པའང་ཤེས་དགོས་པ་གནད་དུ་ཆེའོ་ཞེས་དང་།འདི་ལྟ་བུའི་སྡོམ་ཚིག་ལོ་རྒྱུས་གཞན་དག་ནའང་བཀོད་ཡོད་དེ།བོད་ཀྱི་ལོ་རྒྱུས་གླེང་བའི་གཏམ་ལས།ཕག་གྲུའི་དབང་བསྒྱུར་བ་རྣམས་ཀྱིས་བོད་ཀྱི་ཆོས་སྲིད་རིག་གནས་དང་དཔལ་འབྱོར་བཅས་ཀྱི་ཐད་ལ་འཕེལ་རྒྱས་ཡོང་ཐབས་ཀྱི་མཛད་འཕྲིན་མང་བོ་བསྐྱངས་ཞེས་པ་ནས་མཉམ་མེད་ཙོང་ཁ་བ་ཆེན་པོར་རྒྱབ་སྐྱོར་མཐིལ་ཕྱིན་བསྒྲུབས་པར་བརྟེན་རི་བོ་དགེ་ལྡན་པའི་རིང་ལུགས་ཆེས་ཆེར་དར་ཏེ་དགེ་ལུགས་པའི་གྲུབ་མཐའ་གསར་དུ་སྲོལ་བཏོད་པ་བྱུང་ཞེས་པས་རྟོགས།མདོར་ན་ཧེར་བེརྟ་སྤེན་སེར་གྱིས་སྨྲས་པ་ཏེ།དབུ་ཁྲིད་ཅིག་གི་མི་ཚེ་ལྟ་བུ་ཧ་ཅང་ཁྱད་དུ་འཕགས་པ་ཞིག་ཡིན་སྲིད་མོད།དེ་མི་རླབས་ཆེན་གཅིག་བུའི་བྱུང་བའི་ངོས་ནས་ལྟ་བ་མིན་པར་སྤྱི་ཚོགས་ཀྱི་གནས་སྟངས་ཤིག་གི་རྒྱབ་ལྗོངས་ཀྱི་ངོས་ནས་ངེས་པར་ལྟ་དགོས་ཞེས་བཤད་པ་ལས་མ་འདས་པར་སྙམ།

གཉིས་པ། གསུང་རྩོམ་དངོས་ཀྱི་ཁུངས་ལུང་དང་ཁྱད་ཆོས་སྐོར་གྱི་རེག་ཟིན།

    འདིར་འཇམ་མགོན་བླ་མ་ཙོང་ཁ་བ་ཆེན་པོའི་གཞུང་ཆེན་མོའི་གསུང་རྩོམ་སྔ་ཤོས་༼ལེགས་བཤད་གསེར་ཕྲེང་༽སྐོར་གྱི་ཟིན་ཐོ་བཀོད་པར་བྱ། ཡིན་ནའང་གཞུང་རྩོམ་འདི་ཁོ་བོས་དགོས་པ་རྒྱུ་མཚན་མང་བོར་གཞིགས་ནས་རེག་ཟིན་བཀོད་པ་མ་གཏོགས། རྣམ་ཐར་ན་གཞུང་རྩོམ་གང་ལའང་རྩ་བའི་ལུང་ཁུངས་དང་ལོ་རྒྱུས་རྒྱབ་ལྗོངས་སོགས་ལ་ཕན་ཚུན་ཞིབ་བསྡུར་བྱས་ནས་ངོ་སྤྲོད་གནང་ཡོད་པ་ཀུན་གྱིས་ཐུགས་ལ་འཇོག

    ༡ གཞུང་ཆེན་མོ་འདི་ལྗགས་རྩོམ་མཛད་པའི་ལོ་ཚིགས་ནི་རྗེ་རིན་པོ་ཆེ་དགུང་ལོ་ཉེར་དགུའི་སྟེང་མགོ་བརྩམས་པ་ཡིན་ཞིང་། རྣམ་ཐར་ལས། དགུང་ལོ་ཉེར་དགུ་བཞེས་པའི་ཚེ། རྗེ་ཙོང་ཁ་བས་རང་གི་གཞུང་ཆེན་མོའི་བསྟན་བཅོས་ཀྱི་ཐོག་མ་ཕར་ཕྱིན་གྱི་རྣམ་བཤད་ཆེན་པོ་༼ལེགས་བཤད་གསེར་ཕྲེང་༽རྩོམ་པའི་དབུ་བཙུགས་གནང་ཞེས་པས་གསལ། གཞུང་ཆེན་མོ་འདི་མཇུག་ལེགས་པར་གྲུབ་པའི་ལོ་ནི་རྣམ་ཐར་ལས། རྩོམ་བྲིས་ཀྱི་བྱ་བ་ཆེན་པོ་དེ་མེ་ཡོས་༡༣༨༧ལོའི་དབྱར་ཁ་བོད་ཟླ་ལྔ་བར་ཡོངས་སུ་གྲུབ་ཅིང་། དེ་དུས་རྗེ་ཙོང་ཁ་བ་དགུང་ལོ་སོ་གཅིག་ཏུ་ཕེབས་ཡོད་ཅེས་གསུངས་པ་ལྟར་ལགས།

    ༢ གཞུང་ཆེན་མོ་འདི་མཛད་སྐབས་ལུང་ཁུངས་གཞུང་ལུགས་གང་དག་ལ་བརྟེན་ཞེ་ན།སྤྱིར་ན་རྒྱལ་བའི་བཀའ་རིན་པོ་ཆེ་འགྱུར་རོ་ཅོག་སྟེ་བཀའ་དང་དེ་ཡི་འགྲེལ་བ་བསྟན་འགྱུར་གཉིས་ལས་མ་འདས་ཀྱང་།འདིར་དམིགས་ཀྱིས་བསལ་ནས་བརྗོད་ན་རྣམ་ཐར་དུ་གསལ་བ་ལྟར།དེ་ཡང་གཞུང་དེ་རྩོམ་པའི་སྐབས་སུ་རྗེ་ཙོང་ཁ་བས་ཕར་ཕྱིན་གྱི་རྒྱ་འགྲེལ་ཉེར་གཅིག་༼རྒྱ་འགྲེལ་ཉེར་གཅིག་ཡོད་དེ།མདོ་དང་སྦྱར་བ་བཅུ་གཉིས་མ་སྦྱར་བ་དགུ་ཡོད་པའི་ཕྱིར།དང་བོ་གྲུབ་སྟེ།འཕགས་པས་ཉི་ཁྲི་སྣང་བ་དང་།བཙུན་པས་ཉི་ཁྲི་རྣམ་འགྲེལ་དང་།སློབ་དཔོན་གྱིས་ཉི་ཁྲི་ལེ་བརྒྱད་མ།ཤནྟི་བས་ཉི་ཁྲི་དག་ལྡན་བཞི་དང་།ཁ་ཆེ་དྷརྨ་ཤྲིས་མཛད་པར་གྲགས་པའི་འབུམ་ཊཱིཀ་སྟེ་འབུམ་དང་སྦྱར་བ་གཅིག་དང་།སློབ་དཔོན་གྱིས་བརྒྱད་སྟོང་འགྲེལ་ཆེན་དང་།སྙིང་བོ་མཆོག་དང་།གནད་ཀྱི་ཟླ་འོད་དེ་བརྒྱད་སྟོང་བར་སྦྱར་བ་གསུམ་དང་།སྡུད་པའི་དཀའ་འགྲེལ་རྟོགས་སླ་དང་།སྡུད་པའི་དཀའ་འགྲེལ་དང་།ཤེར་ཕྱིན་མཛོད་ཀྱི་ལྡེ་མིག་སྟེ་སྡུད་པ་དང་སྦྱར་བ་གསུམ་དང་།སྨྲི་ཏིས་མཛད་པར་གྲགས་པའི་འབུམ་ཉི་ཁྲི་ཁྲི་བརྒྱད་སྟོང་བ་གསུམ་གྱི་དོན་བརྒྱད་ཀྱིས་མཐུན་པར་བསྟན་པ་དང་བཅུ་གཉིས་ཡོད་པའི་ཕྱིར།གསེར་འཕྲེང་ལས།རྒྱན་འདིའི་རྗེས་སུ་འབྲང་བའི་འགྲེལ་བ་ལ་ཡང་མདོ་དང་སྦྱར་བ་བཅུ་གཉིས་་ཞེས་གསུངས་པའི་ཕྱིར།གཉིས་པ་གྲུབ་སྟེ།འགྲེལ་བ་དོན་གསལ་དང་།དེའི་འགྲེལ་བཤད་ཚིག་གསལ་དང་།རྟོགས་དཀའི་སྣང་བ་གཉིས་དང་།དེའི་བསྡུས་དོན་ཤེར་འབྱུང་གིས་མཛད་པ་དང་།རྩ་བའི་བསྡུས་དོན་ཇོ་བོས་མཛད་པ་དང་།གཞོན་ནུ་དཔལ་གྱིས་མཛད་པ་གཉིས་དང་།གྲགས་ཆ་དང་།ཤེར་སྒྲོན་དང་།ཐུབ་དགོངས་ཏེ་དགུ་ཡོད་པའི་ཕྱིར།གསེར་འཕྲེང་ལས།མ་སྦྱར་བ་དགུ་སྟེ་ཉེར་གཅིག་གོ་ཞེས་གསུངས་པའི་ཕྱིར།ཞེས་པ་ཀུན་མཁྱེན་ཕར་ཕྱིན་ལས་དྲངས།༽སྐོར་ཞིག་ཕན་ཚུན་ཞིབ་བསྡུར་གྱིས།མཐུན་ཕྱོགས་དང་མི་མཐུན་པའི་གནས་རྣམས་གསལ་བོར་ངོས་བཟུང་བ་མ་ཟད།དགོངས་བཞེད་མི་འདྲ་བ་སོ་སོའི་གནད་རྣམས་གསལ་བཤད་གནང་ཞེས་པས་རྟོགས་སླ།དེ་མ་ཟད་བོད་འགྲེལ་གྱི་དབང་དུ་བྱས་ན་རྔོག་བློ་ལྡན་ཤེས་རབ་ཀྱི་འགྲེལ་བ་དང་ས་བཅད་བསྡུས་དོན།ཁོང་གི་སློབ་མ་འབྲེ་ཤེས་རབ་འབར་གྱི་ཕར་ཕྱིན་འགྲེལ་བ།འཇམ་སྐྱའི་འགྲེལ་བ།ཉ་དབོན་གྱི་ཕར་ཕྱིན་ཊཱིཀྐ་སོགས་ལ་དཔྱད་གཞི་བྱས་པ་ཡིན།

    ༣ རྗེ་བླ་མས་ཕར་ཕྱིན་གསན་ཡུལ་གྱི་བླ་མ་རྣམས་ནི་ཆོས་རྗེ་དོན་གྲུབ་རིན་པོ་ཆེ་དང་། ཀློག་པའི་སློབ་དཔོན་གཙོ་བོ་ཡོན་ཏན་རྒྱ་མཚོ། ཞར་ཆོས་པ་སློབ་དཔོན་ཆེན་པོ་ཨུ་རྒྱན་པ། ཉ་དབོན་ཀུན་དགའ་དཔལ།རྗེ་བཙུན་རེད་མདའ་བ་སོགས་ལས་གཞུང་ཤེར་ཕྱིན་ལ་གསན་བསམ་རྒྱ་ཆེར་གནང་བ་ཡིན།

   ༤ རྗེ་རིན་པོ་ཆེ་དབུས་ཕྱོགས་སུ་བྱོན་ནས་བཟུང་སློབ་གཉེར་གྱི་ཐོག་མ་ཕར་ཕྱིན་ལ་གནང་དགོས་པ་ནི།ཆོས་རྗེ་དོན་རིན་པོ་ཆེས་དབུས་རྫོངས་དང་བཅས་ཏེ་འདི་ལྟར་ཞལ་ཏ་གནང་།གཞོན་ནུ་བློ་བཟང་གྲགས་པ་ཁྱོད།།སྔོན་སྦྱངས་དགེ་བའི་ལས་འཕྲོ་ཅན།།སྔོན་ཚེ་དམ་ཆོས་བདུད་རྩིའི་རོ།།འཐུངས་པའི་བག་ཆགས་ཡོད་པར་ངེས།།ཞེས་དང་།ཡུམ་ཆེན་རྒྱས་འབྲིང་བསྡུས་གསུམ་གྱི།།རྒྱན་དུ་གྱུར་པའི་མངོན་རྟོགས་རྒྱན།།ཐོག་མར་བསླབ་ཅིང་ནན་ཏན་བྱ།།དེ་ལ་མཁས་པར་གྱུར་པ་ན།།ལུང་ཆོས་ཀུན་ལ་འཕྲིག་ཚུད་འགྱུར།།དེ་ཡང་སེམས་ཀྱི་ཟུར་ལ་ཞོག།དེ་ནས་བྱང་ཆུབ་སེམས་དཔའ་ཡི།།ལམ་དང་སྤྱོད་པའི་རྣམ་གཞག་དག།སྟོན་པར་བྱེད་པའི་མདོ་སྡེ་རྒྱན།།མཁས་པའི་ཡན་ལག་དག་ཏུ་བསླབ།།འཁོར་བ་མྱ་ངན་འདས་པ་ཡི།།རྟེན་དུ་སྟོན་པའི་ཆོས་དང་ནི།།ཆོས་ཉིད་རྣམ་འབྱེད་བསྟན་བཅོས་དང་།།ཐོག་མ་ཐ་མ་རྣམས་སྤངས་པའི།།དབུ་མའི་ལམ་ནི་སྟོན་པས་ན།།དབུས་དང་མཐའ་ནི་རྣམ་འབྱེད་དང་།།སེམས་ཀྱི་ཆོས་ཉིད་དག་པ་ནི།།སེམས་ཅན་ཀུན་ལ་ཡོད་པ་སྟེ།།དེ་ཉིད་བདེ་གཤེགས་སྙིང་བོར་ནི།།སྟོན་བྱེད་ཐེག་ཆེན་རྒྱུད་བླ་མ།།བྱམས་ཆོས་ལྔ་བོ་དེ་དག་ལ།།མཁས་པར་བྱེད་པའི་གོ་ཆ་ཡིན།།ཞེས་གསུངས་པ་ཐུགས་ལ་བརྣག་ནས་དབུས་ཀྱི་གདན་ས་བདེ་བ་ཅན་ནས་ཕར་ཕྱིན་ལ་ཆེད་དུ་གསན་བསམ་གནང་བའོ།།

    ༥  རྗེ་རིན་པོ་ཆེས་ཕར་ཕྱིན་ལ་གསན་བསམ་རྒྱ་ཆེར་གནང་སྟེ་གྲྭ་བསྐོར་མཛད་པའི་སྐོར་ཡིན་ཞིང་།འདི་ལ་རྣམ་ཐར་ལས།གྲྭ་བསྐོར་ཞེས་པ་ནི།དགོན་པའམ།“འདུས་སྡེའི་བླ་མ་དག་ལ་ཞུས་ནས།བླ་མ་རྣམས་ཀྱིས་གཙོས་པའི་འདུས་སྡེ་འཚོགས་པའི་ནང་དུ་བསྡད་ནས།དགོན་པ་དེའི་མཁས་པ་རྣམས་རིམ་བཞིན་རིགས་ལམ་གཏོང་བ་ལ་གང་དྲིས་པའི་དོན་ཕྱེ་སྟེ་ལན་འདེབས་པ་”དེ་ལ་ཟེར་ཞེས་པ་ལྟར།རྗེ་རིན་པོ་ཆེས་ཕར་ཕྱིན་གྱི་གྲྭ་བསྐོར་ཐོག་མ་གསང་ཕུ་དང་བདེ་བ་ཅན་ནས་བཞགརིམ་བཞིན་ས་སྐྱ་དང་བཟང་ལྡན།ངམ་རིང་།འགའ་རོང་།བོ་དོང་ཨེ་དགོན་པ།གནས་རྙིང་སོགས་ནས་ཕར་ཕྱིན་གྲྭ་བསྐོར་མཛད་པས།སྐབས་དེར་སློབ་གཉེར་བ་དང་སློབ་དཔོན་རྣམས་ཁོང་གི་མཁྱེན་རིགས་དང་གོ་སྟོབས་ལ་ངོ་མཚར་ཆེན་པོ་སྐྱེས་ཤིང་།རྗེ་ཙོང་ཁ་བའི་བློ་གྲོས་ཤིན་ཏུ་གསལ་ཞིང་།ཤེས་རབ་རྣོ་ཞིང་བརྗོད་པ་གཙང་བ།ཐུགས་གཤིས་རང་བཞིན་གྱིས་འཇམ་ཞིང་སྤྱོད་ལམ་བཙུན་པ་སོགས་ཀུན་གྱི་མིག་ལམ་དུ་གྱུར་པས།ཁོང་གི་བློ་གྲོས་དང་ཆོས་ཀྱི་གོ་སྟོབས་ཕུན་སུམ་ཚོགས་པའི་གྲགས་པ་དབུས་གཙང་གི་ས་ཕྱོགས་སུ་ཁྱབ་བོ།།དེ་ནས་དགུང་ལོ་ཉེར་གཉིས་བཞེས་པའི་དཔྱིད་ཀར་སྣར་ཐང་དགོན་པར་བྱོན་ནས་གཞུང་ཆེན་ལྷག་མ་གསུམ་སྟེ་ཚད་མ་དང་མངོན་པ།འདུལ་བ་བཅས་ཀྱི་གྲྭ་བསྐོར་གནང་།རིམ་པ་བཞིན་ས་སྐྱ་དང་གསང་ཕུ།རྩེད་ཐང་སོགས་ནས་གྲྭ་བསྐོར་མཛད་པ་ལ།སླར་ཡང་ཀུན་གྱིས་ཡིད་འཕྲོག་སྟེ་བཀའ་བཞི་བ་བློ་བཟང་གྲགས་པ་ཞེས་མཁས་པའི་སྙན་པ་དབུས་གཙང་ཀུན་ཏུ་ཁྱབ་ཅེས་པའོ།།མདོར་ན་རྗེ་རིན་པོ་ཆེས་༼ལེགས་བཤད་གསེར་ཕྲེང་༽ལྟ་བུའི་གཞུང་ཆེན་མོ་གསུང་རྩོམ་མ་མཛད་པའི་སྔོན་ལ་འདི་འདྲའི་ཐུགས་བརྩོན་དང་གསན་བསམ་རྒྱ་ཆེར་གནང་བར་མ་ཟད།གཞུང་ཆེན་མོ་གང་དེའི་དོན་བྱེ་བྲག་པ་ལ་ཚོད་ལྟའི་ཚུལ་གྱིས་ཡིད་དང་ཀུན་གཞིའི་རྒྱ་ཆེར་འགྲེལ་བ་༼ལེགས་བཤད་རྒྱ་མཚོ་༽དང་དགེ་འདུན་ཉི་ཤུའི་བརྗོད་བྱའི་དོན་རྒྱས་པར་བཤད་པ་༼བློ་གསལ་བགྲོད་པའི་ཐེམ་སྐས་༽གཉིས་གཞུང་རྩོམ་མཛད་པ་སོགས་ལ།ང་ཚོའི་ཕྱི་རབས་པ་ཚོས་ངེས་པར་དུ་བསམ་གཞིགས་དང་སློབ་སྦྱོང་བྱེད་དགོས་པའི་དོན་བྱ་ཉག་གཅིག་ཏུ་འཁུམས་སོ།།

    ༦  རྗེ་བླ་མ་རང་གི་གཞུང་ཆེན་མོའི་བསྟན་བཅོས་ཀྱི་ཐོག་མ་ཕར་ཕྱིན་གྱི་རྣམ་བཤད་ཆེན་པོ་༼ལེགས་བཤད་གསེར་ཕྲེང་༽གི་བརྗོད་བྱ་མདོར་བསྡུས་ཙམ་ངོ་སྤྲོད་ཞུས་ན།རྣམ་ཐར་ལས།དང་བོ་ནི་མཚམས་སྦྱར་ཞེས་པ་སྟེ།སྐབས་བབས་ཀྱི་བརྗོད་དོན་དེ་ཉིད་སྔར་བཤད་ཟིན་པའི་བརྗོད་དོན་དང་ཇི་ལྟར་འབྲེལ་བར་སྟོན་པ་དང་།གཉིས་པ་སྤྱི་དོན་ཞེས་པ་སྟེ།སྐབས་བབས་ཀྱི་དོན་དེ་སྤྱིའི་སྒོ་ནས་ངོ་སྤྲོད་ཅིང་།དེའི་ཁུངས་ཤེར་ཕྱིན་གྱི་མདོ་ལ་གཏུགས་དགོས་པ་རྣམས་ལ་ཁུངས་དང་སྦྱར་བ་དང་།དེ་བཞིན་དུ་བརྗོད་དོན་དེ་དང་འབྲེལ་བའི་དོན་གནས་ཆེ་ཁག་རྣམས་ངོ་སྤྲོད་པ་དང་།གསུམ་པ་ནི་ཚིག་འགྲེལ་དེ།རྩ་བ་༼མངོན་རྟོགས་རྒྱན༽དང་༼འགྲེལ་བ་དོན་གསལ་༽གྱི་ཚིག་རྣམས།རྩ་བ་དང་འགྲེལ་བར་བྱས་ཏེ་བཤད་པ་རིམ་པ་གཉིས་ཀྱི་སྟེང་ནས་ལེགས་པར་མཛད་པ་དང་།བཞི་བ་ནི་མཐའ་དཔྱོད་དེ།སྐབས་བབས་ཀྱི་བརྗོད་བྱའི་གནད་རྣམས་ཕན་ཚུན་བསྡུར་ཞིབ་དང་འབྲེལ།མཐར་རྗེ་ཙོང་ཁ་བ་རང་ཉིད་ཀྱི་གོ་རྟོགས་ཀྱིས་གཏན་ལ་ཕབ་པའི་རང་ལུགས་བཀོད་པ་བཅས་ཡིན་ཞེས་དང་།ཡང་ན་དེ་ཡང་ཤེར་ཕྱིན་གྱི་མདོའི་བརྗོད་བྱ་ལ་དངོས་བསྟན་དང་སྦས་དོན་གཉིས་སུ་དབྱེ་སྟེ།མདོའི་དངོས་བསྟན་གྱི་དོན་ནི་ཟབ་མོ་སྟོང་བ་ཉིད་ཀྱི་སྐོར་དེ་ཡིན་ཅིང་།བསྟན་བཅོས་༼མངོན་རྟོགས་རྒྱན་༽གྱིས་ནི།གཙོ་བོར་ཤེར་ཕྱིན་གྱི་མདོའི་སྦས་དོན་མངོན་རྟོགས་སམ་ལམ་གྱི་རིམ་པ་རྣམས་ཞིབ་ཅིང་རྒྱས་པར་གཏན་ལ་ཕབ་ཡོད།བསྟན་བཅོས་དེ་ཐེག་པ་ཆེན་པོའི་གན་མཛོད་ལྟ་བུ་ཐེག་ཆེན་གྱི་གནས་དོན་གལ་འགངས་ཅན་ཐམས་ཅད་སྟོན་པའི་རྩ་བའི་གཞུང་དུ་གྱུར་ཅིང་།བསྟན་བཅོས་དེའི་ནང་དུ་གདུལ་བྱ་ཐོག་མར་ལམ་དུ་འཇུག་པའི་ཐབས་དང་།ཐེག་པ་ཆེན་པོའི་ལམ་གྱི་རྟེན་བསམ་པ་སེམས་བསྐྱེད།གདམས་ངག་གི་དོན་འཕགས་པའི་བདེན་པ་བཞི།རྟེན་འབྲེལ་ཡན་ལག་བཅུ་གཉིས།གཞི་བདེན་པ་གཉིས།ཞི་གནས་དང་ལྷག་མཐོང་སྒྲུབ་ཚུལ།བསམ་གཏན་དང་གཟུགས་མེད་དེ་ཁམས་གོང་མའི་སེམས་བསྐྱེད་པའི་ཚུལ།བྱང་ཕྱོགས་སོ་བདུན།ཕར་ཕྱིན་དྲུགལམ་ལྔ།ས་བཅུ།སྐུ་གསུམ་གྱི་བདག་ཉིད་ཅན་དུ་གྱུར་བའི་འབྲས་བུ་སངས་རྒྱས་ཀྱི་གོ་འཕང་སོགས་བརྗོད་བྱ་མང་དག་ཅིག་སྟོན་གྱི་ཡོད་ཅེས་གསུངས་ཡོད།མཐའ་དོན་༼ལེགས་བཤད་གསེར་ཕྲེང་༽བརྩམས་པ་ལས་ནི།རྩོམ་པ་པོ་རྗེ་ཙོང་ཁ་བ་རང་ཉིད་གཞུང་ཆེན་མོ་ལ་ནང་བྱན་ཆུད་པའི་མཁས་པ་འགྲན་ཟླ་མེད་པ་ཞིག་ཡིན་པའི་མཚན་སྙན་གྱི་རྩ་བ་བརྟན་པོ་ཚུགས་ཡོད་ཅིང་།ཁོང་གིས་བརྩམས་པའི་གཞུང་དེའང་།གཞུང་གི་བཤད་པའི་བབས་དང་ཁ་གསལ་ལོས།གཞུང་རྒྱས་ལོས་དང་བརྗོད་བྱའི་དོན་གཏན་ལ་འབེབས་སྟངས་གཏིང་ཟབ་ལོས་སོགས།ཕྱོགས་མང་བོ་ཞིག་ནས།རྗེ་བཙུན་བྱམས་པ་མགོན་པོའི་བསྟན་བཅོས་༼མངོན་རྟོགས་རྒྱན་༽གྱི་བོད་འགྲེལ་ཁྲོད་ན་འགྲན་ཟླ་མེད་པ་ཞིག་ཏུ་གྱུར་ཡོད་ཅེས་གསུངས་པ་ལྟར་ལགས།

    ༧  གཞན་༼ལེགས་བཤད་གསེར་ཕྲེང་༽གི་ཁྱད་ཆོས་སྐོར་ནས་ས་བཅད་མ་སྟོང་ཙམ་ཞུས་ན།རྣམ་ཐར་ལས།མ་ཕྱིའི་གཞུང་རང་ཉིད་ཐོག་མར་འགྱུར་དང་དཔར་མ་མི་འདྲ་བ་ཕན་ཚུན་བསྡུར་ཞིབ་སོགས་ཀྱི་སྒོ་ནས་སྤུས་དག་པོར་གཏན་ལ་འབེབས་པ་དང་།གཞུང་གི་ཚིག་དོན་ལ་དམིགས་བསལ་དོན་སྣང་སྤྲད་དེ་བརྟག་པ་བགྱི་བ།བཤད་ཐབས་ཡན་ལག་ལྔ་སོགས་ཀྱི་སྒོ་ནས་གཞུང་དོན་འགྲེལ་བའི་ཐབས་ལམ་ངོས་བཟུང་བ།སྐབས་ཐོབ་ཀྱི་དོན་བྱེ་བྲག་པ་རྣམས་གཞུང་སྔ་ཕྱིའི་འབྲེལ་དང་སྐབས་དོན་མ་འཆོལ་བར་ངོ་སྤྲོད་པ།གཞན་ཡང་སྔོན་གྱི་འགྲེལ་བ་མཛད་པ་རྣམས་སོ་སོའི་གྲུབ་མཐའི་ལངས་ཕྱོགས་དང་བཤད་པའི་རྒྱུན་གང་ལ་གཏུགས་མ་གཏུགས་སོགས་ཀྱང་རྩད་གཅོད་པ་སོགས།གཞུང་དོན་ལ་དཔྱོད་པའི་ཐབས་ལམ་ཕྱོགས་མང་བོ་ཞིག་ནས་འཛོམས་པ་ཞིག་ཡོད་པ་ནི།རྣམ་དཔྱོད་ལྡན་པ་ཞིག་གིས་༼ལེགས་བཤད་གསེར་ཕྲེང་༽གི་དཔེ་བློ་གྲོས་ཞིབ་མོས་མཇལ་ན་ཤེས་ངེས་ཞེས་པ་དང་།ད་དུང་རྣམ་ཐར་ན་ཁྱད་ཆོས་རྩལ་འདོན་གཞན་ཡང་གནང་ཡོད་དེ།བསྟན་བཅོས་དེ་ལ་བོད་དུ་སྔ་ཕྱིའི་མཁས་པ་མང་དག་ཅིག་གིས་འགྲེལ་བ་བརྩམས་ཡོད་ཅིང་།གཅིག་ནི་དེ་བཞིན་དུ་དབུས་གཙང་གི་གདན་ས་རྣམས་སུ་རྒྱུན་དུ་སློབ་གཉེར་རྒྱ་ཆེར་གནང་ཡུལ་ཡིན་པས།རྒྱུས་ཡོད་ཀྱི་གཞུང་དེ་ལྟ་བུ་ཞིག་གི་ཐོག་རྗེ་ཙོང་ཁ་བ་རང་ཉིད་ཀྱིས་གོ་སྟོབས་གསར་བའི་སྟེང་ནས་འགྲེལ་བརྗོད་གནང་སྟངས་དཔེ་མཚོན་སྟོན་ཐུབ་པ་དང་།གཉིས་ནས་ད་ལྟ་ཕར་ཕྱིན་གྱི་དཔེ་ཁྲིད་གནང་བཞིན་པའི་དགེ་རྒན་མཁས་པ་དང་སློབ་གཉེར་བ་རྣམས་ལའང་རྣམ་དཔྱོད་ཀྱི་སྒོ་གསར་བ་ཞིག་འབྱེད་སྲིད་པ་སོགས་ཀྱིས་ཡིན་སྙམ།རྒྱ་གར་གྱི་བསྟན་བཅོས་གལ་ཆེན་འདི་ལ་རྒྱ་བོད་གཉིས་ཀར་འགྲེལ་བ་མང་དག་བྱུང་ཡོད་ལ།རྗེ་ཙོང་ཁ་བའི་༼ལེགས་བཤད་གསེར་ཕྲེང་༽ནི།དུས་ད་ལྟའི་བར་དུ་དགེ་ལྡན་པའི་གདན་ས་ཆེ་ཁག་ཙམ་དུ་མ་ཟད་བོད་ཀྱི་ཆོས་བརྒྱུད་གཞན་གྱི་བཤད་གྲྭར་ཡང་ཕར་ཕྱིན་སློབ་གཉེར་བྱེད་པའི་གཞུང་གལ་ཆེན་ཞིག་ཏུ་གྱུར་ཡོད་ཅེས་གསུངས་པ་སོགས་ནི་ཁོ་བོའི་དཔེ་ཀློག་ཁྲོད་ཀྱི་༼ལེགས་བཤད་གསེར་ཕྲེང་༽གི་ཁྱད་ཆོས་སྐོར་གྱི་བརྗེད་ཐོ་ཙམ་ཡིན།

གསུམ་པ།  རྗེ་རིན་པོ་ཆེའི་གཞུང་རྩོམ་གང་ལའང་དེང་རབས་མཁས་པའི་ཉམས་ཞིབ་ཀྱི་ཆ་ཚད་མཐོན་པོས་མཇལ་དུ་ཡོད་པའི་སྐོར།

    ཁོ་བོས་འཇམ་མགོན་བླ་མའི་ལམ་རིམ་ཆེན་མོ་སོགས་ལ་ཕྲན་ཙམ་མཇལ་ཁུལ་བྱས་དུས། རང་ཉིད་ཀྱི་སེམས་ལ་གཞུང་འདི་ཅི་འདྲའི་ངོ་མཚར་བ་མཛད་ཡོད་དེ་རྩ་བརྒྱུད་ཀྱི་བླ་མ་རྣམ་པའི་མན་ངགགསལ་བྱེད་ཀྱི་དཔེ།རྒྱབ་རྟེན་གྱི་ལུང་།རིགས་ལམ་དྲི་མ་མེད་པས་མཚམས་སྦྱོར་གནང་ཡོད་པ་མཐོང་ནས།ངས་ཆོས་གྲོགས་རེ་ཟུང་ལ་རྗེ་རིན་པོ་ཆེའི་གསུང་རྩོམ་ལ་དངོས་གཙོ་སྨྲ་བའི་ཆ་འདུག་ཅེས་ཞུས་དུས།ཁོ་ཚོར་ཐེ་ཚོམ་ཙམ་ཡང་མེད་པར་ང་ལ་ཧ་ཅང་མཐོང་ཆུང་གིས་གླེན་བཤད་མ་བརྒྱགས་ཞེས་ལབ་ནའང་།ངས་དངོས་གཙོ་སྨྲ་བ་ཞེས་པ་ཅི་འདྲ་ཞིག་ལ་གོ་བ་ལེན་གྱི་ཡོད་ཟེར་ན།མཐོང་བ་དང་ཐོས་པ་རང་ཉིད་ཀྱིས་ཉམས་སུ་བླངས་ནས་གཞན་ལ་སྟོན་པ་ཞིག་ལ་གོ་བ་རྒྱག་གི་ཡོད་པ་བཞིན་དུ།ད་རེས་རྣམ་ཐར་གསར་བསྒྲིགས་ན་དེ་ལྟར་འགྲེལ་བརྗོད་གནང་ཡོད་དེ།༼ལེགས་བཤད་གསེར་ཕྲེང་༽དུ།དེང་རབས་ཉམས་ཞིབ་ཀྱི་ཆ་ཤས་གལ་འགངས་ཅན་སྐབས་བབས་ཀྱི་ཡིག་ཆའི་བསྐྱར་ཞིབ་ཅེས་པ་སྟེ།སྐབས་བབས་ཀྱི་བརྗོད་དོན་དེ་དང་འབྲེལ་བ་ཡོད་པའི་དཔྱད་གཞིའི་ཡིག་ཆ་ལ་གཙོ་ཕལ་གྱི་རྣམ་དབྱེ་ཕྱེ་སྟེ་དང་ཐོག་བསྐྱར་ཞིབ་བགྱི་སྲོལ་ཡོད་པ་དེ་དང་ཆ་མཚུངས་པ་ཞིག་གི་ལམ་སྲོལ་བཏོད་པར་ངོས་འཛིན་བྱེད་ཆོག་ཅེས་དང་།ལོ་རྒྱུས་དང་གཞུང་དོན་རྟོགས་པ་སོགས་ལ་དེང་རབས་ཀྱི་ཉམས་ཞིབ་བགྱི་བའི་ཐབས་ལམ་གྱི་ཆ་ཤས།ནུབ་ཕྱོགས་པ་རྣམས་དེང་རབས་ཀྱི་གསར་བཏོད་འབའ་ཞིག་སྨྲ་བ་ཁག་ཅིག་༼ལེགས་བཤད་གསེར་ཕྲེང་༽དུ་གསལ་བོར་མཇལ་དུ་ཡོད་ཅེས་གསུངས་པས།རྗེ་རིན་པོ་ཆེའི་གཞུང་རྩོམ་ལ་རྒྱལ་སྤྱིའི་རང་བཞིན་དང་ཚན་རིག་རང་བཞིན།དངོས་གཙོའི་རང་བཞིན་ལྡན་པས་དེང་རབས་མཁས་པའི་དཔྱད་ཐབས་ཀྱི་ཚད་ལས་བརྒལ་ཡོད་པ་ངེས་དགོས།

བཞི་བ། རྣམ་ཐར་གསར་བསྒྲིགས་འདི་ལ་གཞུང་དོན་དང་ལོ་རྒྱུས་གནད་བསྡུས་གནང་ཡོད་པའི་སྐོར།

    ད་རེས་ཀྱི་གླང་རི་བ་ལྷ་རམས་ཐུབ་བསྟན་སྦྱིན་པ་ལགས་ཀྱིས་བརྩམས་པའི་༼གངས་ཅན་ལྗོངས་སུ་སངས་རྒྱས་བྱོན་པ་༽ཞེས་པའི་རྣམ་ཐར་འདི་ལ་རྣམ་ཐར་སྔོན་མ་རྣམས་དང་མི་འདྲ་བའི་ཁྱད་ཆོས་ཤིག་ཡོད་པ་ནི། འཇམ་མགོན་བླ་མ་ཙོང་ཁ་བའི་གསུང་འབུམ་པོད་བཅོ་བརྒྱད་དམ་བཅུ་དགུའི་བདག་ཉིད་ཅན་གྱི་གཞུང་རྩོམ་སྐོར་རྒྱ་གར་འཕགས་ཡུལ་གྱི་སངས་རྒྱས་བྱང་སེམས་དང་པཎ་གྲུབ་རྣམས་ཀྱིས་མཛད་པའི་བཀའ་དང་བསྟན་བཅོས་གང་གི་ཁུངས་སུ་གཏུགས་པ་དང་དངོས་བརྒྱུད་ཀྱི་བླ་མ་རྣམ་པའི་མན་ངག་དང་བརྒྱུད་པ་བར་མ་ཆད་པ། གཞུང་དོན་གནད་བསྡུས་བྱས་ནས་ངོ་སྤྲོད་གནང་ཡོད་པ་སོགས་ནི། ཁོ་བོ་ལྟ་བུའི་འཇམ་མགོན་བླ་མ་ཙོང་ཁ་བའི་བསྟན་པར་ཞུགས་ནས་ཐོས་བསམ་སློབ་གཉེར་ཅི་ཡང་མི་བྱེད་པར་དད་པ་དང་བ་ཡོད་ཁུལ་གྱིས་གསུང་འབུམ་རེ་བླུས་ནས་མཆོད་ཁང་གི་ས་རྡུལ་ཁྲོད་ན་བཞུགས་ཡོད་པ་དྲན་ཚེ། ཆེན་པོ་མི་འཇོན་པ་ངོས་ཟིན་པའི་སྒོ་ནས་རྣམ་ཐར་ན་རྗེ་བླ་མའི་གསུང་རྩོམ་གནད་བསྡུས་བྱས་ནས་ངོ་སྤྲོད་བྱས་ཡོད་པ་འདི་ལྟ་བུ་ལ་མཇལ་ཐུབ་ན། རྗེ་རིན་པོ་ཆེའི་གསུང་གི་བྱིན་བརླབས་ཀྱི་ཆ་ཤས་ཕྲ་མོ་རེ་སེམས་རྒྱུད་ལ་ཞུགས་ནས་རྗེ་བླ་མར་ཤེས་ནས་དད་པ་སྐྱེས་པའི་རྒྱུ་རུ་འགྲོ་ངེས་པ་ཡིན། གཞན་རྗེ་རིན་པོ་ཆེས་སློབ་གཉེར་དང་གསུང་ཆོས་གནང་སའི་དགོན་པ་དང་བླ་མ། སློབ་མ་དང་སྦྱིན་བདག་སོགས་ཀྱི་ལོ་རྒྱུས་རག་ཙམ་རེ་ཁ་གསལ་ཞིང་གོ་བདེ་བ། ཁུངས་བཙུན་པའི་སྒོ་ནས་ངོ་སྤྲོད་བྱས་ཡོད་པ་ནི། ད་ལྟའི་ཚིག་མཛོད་སོགས་ལ་ངོ་བཤུས་བརྒྱབ་པ་དེ་འདྲ་མ་ཡིན་པར་རྣམ་ཐར་དང་ལོ་རྒྱུས། ཆོས་འབྱུང་སོགས་ལ་གཟིགས་རྟོག་དང་ཞིབ་བསྡུར་ནན་ཏན་བྱས་ནས་གུང་བསྒྲིགས་པ་ཤ་སྟག་ཡིན་པས་ཀུན་གྱིས་དོ་སྣང་ཡོད་པར་ཞུ།

ལྔ་བ། རྣམ་ཐར་མཛད་པ་པོའི་་ཐོག་མའི་བསམ་འདུན་བཞིན་འབྲི་མ་ཐུབ་པ་དང་དོགས་སློང་གི་སྐོར།

     རྗེ་ཙོང་ཁ་བའི་རྣམ་ཐར་གསར་བསྒྲིགས་༼གངས་ཅན་ལྗོངས་སུ་སངས་རྒྱས་བྱོན་པ།༽ཞེས་པ། མཛད་པ་པོས་ཐོག་མའི་ཆ་ལ་བོད་ཡིག་གི་ལམ་ནས་འབྲི་འདུན་ཡོད་ནའང་དུས་ཚོད་མ་ལོངས་པར་གསུངས་པ་དང་གཅིགགཉིས་ངས་རྗེ་རིན་པོ་ཆེའི་རྣམ་ཐར་རྩོམ་པའི་སྐབས་ཆོས་བྱེད་པ་ཞིག་གིས་བླ་མའི་རྣམ་ཐར་ལ་མཇལ་ནས་དད་པ་འཁྲུངས་རྒྱུ་དང་།བླ་མའི་མཛད་པ་བསྐྱང་རྒྱུ་དེ་ཚོའི་གྲས་ལ་དམིགས་ནས་བརྩམས་པ་ཞིག་མིན།དེ་ཚོའི་གྲས་དེ་བོད་རང་གི་དཔེ་ཆ་མང་པོ་ཡོད་དུས།ངས་བསྣན་དགོས་དོན་མེད་ཅེས་དང་།དབྱིན་ཡིག་ཐོག་ཕབ་པ་ཡིན་ནའང་སྲོལ་རྒྱུན་གྱི་རྣམ་ཐར་འབྲི་སྟངས་དེ་དགམ་གཞི་བོད་ཀྱི་ཐ་སྙད་ལ་བླ་མའི་མཛད་པར་རྣམ་ཐར་ལབ་ཀྱི་ཡོད།རྣམ་ཐར་ལབ་དུས་རྗེས་འཇུག་སློབ་མ་ཚོས་དད་པའི་ཐོག་ནས་བླ་མའི་མཛད་པ་དག་ལག་ལེན་བསྟར་ནས་ཐར་བ་ཐོབ་པའི་དམིགས་ཡུལ་འཛིན་གྱི་ཡོད།དེ་འདྲ་ཡིན་དུས་རྣམ་ཐར་དེ་དག་ལ་བརྟེན་ནས་ཁོང་ཚོར་མི་དཀྱུས་མའི་ཚོར་བ་འདྲ་ཞིག་ཡོང་ཐུབ་ཀྱི་མེད།རྣམ་ཐར་དེ་དག་ལ་མཇལ་བའི་སྐབས་བླ་མ་དེ་དག་གི་ཐུགས་གཤིས་ག་འདྲ་ཡིན་མིན་དང་།ཐུགས་རེ་ག་འདྲ་གནང་གི་ཡོད་མེད།སྐུ་ངལ་གང་འདྲ་བསྐྱོན་ཡོད་མེད།མི་ཁོ་རང་གི་རྣམ་འགྱུར་དང་།ཐུགས་གཤིས་དེ་ཚོ་འབུར་ཐོན་བྱས་པ་མེད།མི་དཀྱུས་མའི་རྣམ་ཐར་ལྟར་བྲིས་པ་རྗེ་མི་ལ་ཙམ་ཞིག་རེད་ཅེས་གསུངས་པ་བཞིན།དབྱིན་ཡིག་གི་ཐོག་འདི་ལྟར་ལྗགས་རྩོམ་མཛད་ནའང་བོད་ཡིག་གི་ལམ་ནས་ཇི་བཞིན་བྲིས་མེད་དེ།རྗེ་བླ་མའི་རྣམ་ཐར་ཞིག་དེང་རབས་ཀྱི་སྲོལ་དུ།མི་ཕལ་བའམ་བྱེ་བྲག་པ་ཞིག་གི་མི་ཚེའི་ལོ་རྒྱུས་བརྗོད་པའི་ཚུལ་ལྟར་དུ་འབྲི་བ་ཨེ་འགྲིགས་སྙམ་པ་བྱུང་ཞེས་གསུངས་པ་ནང་བཞིན།ཐུན་མོང་དང་ཐུན་མོང་མ་ཡིན་པའི་རྣམ་ཐར་བསྲེས་ནས་བྲིས་ཡོད་པ་ལ་ཅང་བློ་ལ་བདེ་བོ་མ་བྱུང་།འདི་ནི་ཁོ་བོས་སྔོན་མར་གླེང་གཞི་མཐོང་བ་ནས་བཟུང་བོད་ཀྱི་རྣམ་ཐར་འབྲི་སྲོལ་གྱི་ཐབས་ལམ་གསར་བ་ཞིག་གི་ལམ་ལ་ཁྲིད་པའི་རེ་བ་བཅངས་པས་ཡིན་སྲིད།གཞན་རྣམ་ཐར་འདིའི་མ་རྩོམ་ཨིན་ཡིག་གི་ཐོག་ནས་བསྒྱུར་བ་ཡིན་པས།ཚིག་གི་སྡེབ་སྦྱོར་དང་ཐ་སྙད་རེ་ཟུང་ལ་བོད་སྐད་ཀྱི་གདངས་དང་ཉམས་མ་ཐོན་པ་འདུགདཔེར་ན།ལས་འགུལ་དང་ལས་གཞི་སོགས་འདི་ལྟ་བུའི་གཞུང་ཆེན་མོ་དང་རྣམ་ཐར་རྩ་ཆེན་པོའི་ནང་ཧ་ཅང་མི་མཛེས་པའི་དོགས་པ་བྱུང་བ་ནི།གླང་ཆེན་གྱི་སྣ་ལ་ཙི་གུས་མཆུ་བཙགས་བྱེད་པ་ལས་མ་འདས་པས་ཐུགས་ལ་ཕོག་ན་ནོངས་པར་འཚལ།

མཇུག་གི་ཞུ་གསོལ།

     མདོར་ན་བོད་རང་གི་རྣམ་ཐར་འབྲི་སྲོལ་འདིར་ལྟ་ཀློག་བྱས་དུས་བླ་མ་སུ་དང་གང་ཞིག་ཡིན་ནའང་།ཐུགས་རིག་དང་བརྩོན་པ།ཡོན་ཏན།མཁྱེན་དཔྱོད།འཆད་རྩོད་རྩོམ་གསུམ།མཁས་བཙུན་བཟང་གསུམ།མཛད་པ་འཕྲིན་ལས་སོགས་ལ་ཇི་ལྟར་མཇལ་ནའང་ཡིན་ཁྱབ་མཉམ་ལྟ་བུའི་་དྲན་ཚོར་སྟེར་བས།འདི་ནི་སྒྲིག་གཞི་ཅན་དང་ལམ་སྲོལ་ཅན།ཚད་གཞི་ཅན་དུ་གྱུར་ཡོད་པས་སོ་སོའི་སྒེར་ངོས་ཀྱི་ལྟ་བ་དང་ཉམས་ལེན།སྤྱོད་པ་ངོ་མ་དོན་དངོས་པོ་གནས་ཚོད་ཀྱི་སྒོ་ནས་སྟོན་ཐུབ་ཀྱི་མེད་པ་འདི་ཞན་ཆ་ཞིག་ཡིན་ཏེ།གཙོ་བོ་མི་གང་འདྲ་ཡིན་ཡང་དོན་དངོས་ཀྱི་མཛད་འཕྲིན་རླབས་ཆེན་བཞག་ཡོད་ན་ལུང་དང་རིགས་པས་བསྒྲུབས་ནས་འུར་བསྟོད་ཙམ་བྱེད་མི་དགོས་པའི་དཔེ་མཚོན་བཀོད་ན།༼སྟོན་པའི་མཛད་རྣམ་རབ་གསལ་མེ་ལོང་༽དང་༼ཕའེ་གུན་ནས་མི་ཚེ་གླེང་བ།༽༼ལྕམ་མོ་ཅུས་ལིའི་རང་རྣམ།༽༼སྤྲུལ་སྐུའི་འཇིག་རྟེན།༽སོགས་ལ་མཇལ་ན་མི་བྱེ་བྲག་པ་སོ་སོའི་ནུས་པ་དང་ཁྱད་ཆོས་མངོན་ཡོད་པས།འདི་ནི་བྱམས་སྙིང་རྗེ་བདག་ཉིད་ཅན་གྱི་ཆོས་ལུགས་པ་ཞིག་ཡིན།འདི་ནི་ཕྱི་ནང་སྣོད་བཅུད་ཀྱི་གནས་ལུགས་ཡང་དག་འཚོལ་མཁན་གྱི་མཚན་ཉིད་པ་ཞིག་ཡིན།འདི་ནི་མིའི་རིགས་ལ་བྱས་རྗེས་རླབས་ཆེན་འཇོག་མཁན་གྱི་ཚན་རིག་པ་ཞིག་ཡིན་སྙམ་པའི་བསམ་བློ་ངང་ངམ་ཤུགས་ཀྱིས་སྟེར་ཐུབ་པས།བོད་ཀྱི་རྣམ་ཐར་འབྲི་སྲོལ་གྱི་ཐབས་ལམ་འདི་ཕྱོགས་ལ་བརྩོན་པ་དང་ཐུགས་མཉམ་འཇོག་རྒྱུ་ཧ་ཅང་གལ་ཆེན་ཡིན་པར་བསམ།ཡིན་ནའང་འདི་ལྟ་བུའི་རྩོམ་སྲོལ་བོད་ལ་རྩ་བ་ནས་མེད་པ་མ་ཡིན་ཞིང་སྐྱེས་བུ་དམ་པ་ཚོའི་རང་རྣམ་ནི་གོང་སྨྲས་ཀྱི་དོན་དང་ཆ་འདྲ་བོ་ཡིན་པ་ངེས་དགོས་སོ།།

སློབ་མའི་ཡིག་གཟུགས་འོས་སྦྱོར།

ནང་དོན་འགོད་ལུགས།