تۇرپان شەھەرلىك يۇغۇرما تاراتقۇ مەركىزى مۇخبىرلىرى مېھرىگۈل، ۋاڭ زىجيې خەۋىرى، فوتوسى: 11 - ئاينىڭ 18 - كۈنى، ئىدىقۇت رايونى يار بازىرىنىڭ يار كەنتىگە جايلاشقان تۇرپان چياڭسۇن سودا چەكلىك شىركىتى رەسمىي ئىشقا كىرىشتۈرۈلۈپ تىجارەت باشلىدى.
يار كەنت كومىتېتى شىركەت بىلەن قەغەز يەشىك سېتىۋېلىش ـ سېتىش كېلىشىمى ئىمزالىماقتا. تۇرپان شەھەرلىك يۇغۇرما تاراتقۇ مەركىزى مۇخبىرى مېھرىگۈل فوتوسى
ئىگىلىنىشىچە، بۇ شىركەت يار كەنت كومىتېتى مۇستەقىل مەبلەغ سېلىپ قۇرغان پاي كونترول كارخانىسى ئىكەن. شىركەتنىڭ ئىگىلىگەن يەر كۆلىمى 25 مو، زاۋۇت ئۆيى كۆلىمى 1500 كىۋادرات مېتىر بولۇپ، ئاساسلىقى تۈرلۈك مېۋە - چىۋە، يەل - يېمىش، كۆكتات قاتارلىق يېزا ئىگىلىك مەھسۇلاتلىرىنى ئوبوروت قىلىش ۋە ئوراش - قاچىلاشتا ئىشلىتىلىدىغان قەغەز يەشىك ئىشلەپچىقىرىدىكەن، كۈندىلىك مەھسۇلات مىقدارى 200 مىڭغا يېتىدىكەن. يۇقىرى ئۈنۈملۈك ئىشلەپچىقىرىشقا ھەقىقىي كاپالەتلىك قىلىش ئۈچۈن، بۇ شىركەت ئېنىقلىق دەرىجىسى يۇقىرى بولغان باسما ماشىنىسى ۋە يەشىك مىخلاش ماشىنىسى قاتارلىق ئىلغار ئۈسكۈنىلەرنى كىرگۈزگەن.
قەغەز يەشىك سېخىدا قەغەز يەشىكلەر ئىشلەپچىقىرىلماقتا. تۇرپان شەھەرلىك يۇغۇرما تاراتقۇ مەركىزى مۇخبىرى مېھرىگۈل فوتوسى
تۇرپان شىندوۋ يېزا ئىگىلىك مەھسۇلاتلىرى سودا مەركىزى تەرەققىيات چەكلىك شىركىتىنىڭ باش دىرېكتورى ما جۈن مۇنداق دېدى: بۇنىڭدىن كېيىن قۇرۇق ئۈزۈم پىششىقلاش كارخانىلىرى كېرەكلىك قەغەز يەشىكلەرنى بىۋاسىتە مۇشۇ جايدىن سېتىۋالالايدۇ، بۇنىڭ بىلەن سېتىۋېلىش ۋە توشۇش تەننەرخى زور دەرىجىدە تېجىلىدۇ.
شىركەت ئىشلەپچىقارغان ئوراش - قاچىلاشتا ئىشلىتىلىدىغان قەغەز يەشىكلەر. تۇرپان شەھەرلىك يۇغۇرما تاراتقۇ مەركىزى مۇخبىرى مېھرىگۈل فوتوسى
«شىركەتنىڭ ئىشلەپچىقىرىشقا كىرىشتۈرۈلۈشى كارخانىنىڭ سېتىۋېلىش، توشۇش تەننەرخىنى يېنىكلىتىپلا قالماي، يەنە تېخىمۇ كۆپ پايدىنى شۇ جايدىكى كەنت ئاھالىلىرىگە قالدۇرالايدۇ، بۇ، دېھقانلارنىڭ كىرىمىنى ئاشۇرۇپ، كەنت كوللېكتىپ ئىگىلىكىنى زورايتىشقا پايدىلىق» دېدى يار بازارلىق پارتىيە كومىتېتىنىڭ مۇئاۋىن شۇجىسى، بازار باشلىقى دىلمۇرات پەرھات.
تەكشۈرۈپ بېكىتكۈچى: مەمەت ياسىن
مەسئۇل مۇھەررىر: ئادىل غاپپار
مۇھەررىر:خاتىمە پەتتار
审核：买买提·牙生
责编：阿地力·阿帕尔
编辑：哈提曼·帕塔尔
