🎥 དྲི་བ། སྐུ་ཉིད་ངོ་སྤྲོད་སྙིང་བསྡུས་ཤིག་གནང་རོགས།
ལན།
དངོས་མིང་ལ་འཇམ་དབྱངས་མཁས་གྲུབ། སྤུར་མིང་ལ་ཚ་འབྲོག་རྒྱལ་སྲས་ཟེར། ཚ་བ་སྒང་སྨད་དུ་སྐྱེས། སྙན་ངག་འབྲི་མཁན་གྱི་གྲལ་མཐར་ཡོད་པ་ཙམ་ལས་དམིགས་གསལ་བདག་ལ་ངོ་སྤྲོད་བྱ་འོས་པ་ཅི་ཡང་མི་འདུག
🎥 དྲི་བ། ཁྱེད་རང་དང་ཐོག་རྩོམ་ཡིག་བྲི་རྒྱུའི་བསམ་བློ་ཇི་ལྟར་སྐྱེ་བྱུང་ངམ། ད་ལྟའི་བར་རྩོམ་ཡིག་དང་སྙན་ངག་བྲིས་ནས་ལོ་ངོ་ཅི་ཙམ་ཕྱིན་བྱུང་།
🎙️ལན།
༢༠༠༩ལོར་ང་རང་བརྡ་སྤྲོད་ཀྱི་འཛིན་གྲྭ་ཞིག་ཏུ་བསྡད་པས། དེའི་དུས་རིག་གནས་ཀྱི་ཆུ་ཚད་ཞན་པས་དམིགས་གསལ་གྱི་ང་ལ་དགའ་ཕྱོགས་ཅི་ཡང་མེད།སྐབས་ཤིག་ལ་བརྡ་སྤྲོད་འཛིན་གྲྭའི་ནང་དུ་སྙན་ངག་དཔེ་ཁྲིད་ཅིག་བྱས་སོང་། སྐབས་དེར་སྙན་ངག་གི་དཔེར་བརྗོད་འགའ་ཞིག་བྲིས་པའང་དྲན་སོས་ཀྱི་འདུག དེ་རྗེས་དགེ་ཆོས་ཀྱི་སྙན་ངག་དང་རྨེ་སྤྲུལ་གྱི་སྙན་ངག་སོགས་སྙན་དེབ་མང་ཙམ་བཀླགས་པའི་རྐྱེན་ནམ། ཡང་ན། སྐབས་དེར་ངའི་ཁོར་ཡུག་ཏུའང་སྙན་ངག་འབྲི་མཁན་དང་། སྙན་ངག་གླེང་མཁན། སྙན་དེབ་ཕུད་མཁན་སོགས་ཚ་རླབས་འཕྱུར་བའི་དུས་ཤིག་ཤར། དེས་རྐྱེན་པས་ཡིན་ན་ཐང་། ང་རང་ཡང་ཉིན་རེ་སྙན་ངག་ཡིན་རློམ་གྱི་རྩོམ་ཡིག་རེ་བྲི་བའི་གོམས་གཤིས་ཤིག་ཆགས་བྱུང་། སྤྱི་ལོ།༢༠༡༥ནས་བཅད་གསར་སྙན་ངག་དང་མགུར་རྩོམ་ལྟ་བུའི་རྩོམ་ཡིག་མང་ཙམ་བྲིས་པ་ཡིན་ལ། མིའི་གཉུག་གཤིས་སུ་གྲུབ་པའི་འཆར་ཡན་དང་། ཚུལ་འཆོས་རིང་དུ་དོར་ནས་རྟོག་པ་རྗེན་ནེར་ལ་བུད་དེ་བརྩེ་དུང་དང་སྒྱུ་འཕྲུལ་མཚོན་པའི་སྙན་ངག་འབྲི་ཅི་ཐུབ་བྱས་པ་ཡིན། ད་བར་སྙན་ངག་ཆལ་ཆོལ་བྲིས་ནས་མི་ལོ་བཅོ་ལྔ་ལྷག་སོང་འདུག
🎥 དྲི་བ། ད་རུང་མི་འཐུད་རྩོམ་ཡིག་བྲི་འཆར་ཡོད་དམ། ཡང་ན། དགའ་ཕྱོགས་གཞན་ཞིག་ལ་འཇུག་འཆར་ཡོད།
🎙️ལན།
ད་དུང་ཚེ་ཡི་ལྷག་མ་ཇི་ཙམ་ཡོད་ན་དེ་ཙམ་གྱི་རྩོམ་ཡིག་ཐར་ཐོར་རེ་བྲི་རྒྱུ་དང་། དཔེ་ཀློག་ཐན་ཐུན་རེ་བྱ་བསམ་པའི་འདུན་པ་ཡོད། སྤྱིར་དགའ་ཕྱོགས་གཞན་པ་རེའང་ཡོད་མོད། དེ་ཡིས་རྩོམ་ཡིག་བྲི་བ་ལ་འགལ་རྐྱེན་གང་ཡང་མི་འདུག་སྙམ།
🎥 དྲི་བ། ད་ལྟའི་བར་ཁྱེད་ཀྱིས་བཅད་རྩོམ་ཤོ་ལོ་ཀ་ཅི་ཙམ་བྲིས་པ་ཡིན།
🎙️ལན།
ངས་རྩོམ་ཡིག་ཐར་ཐོར་རེ་བྲིས་པ་ནས་ད་ལྟའི་བར་བཅད་རྩོམ་ཤོ་ལོ་ཀ་འདི་ཙམ་ཞེས་གྲངས་ཀ་ངེས་ཏན་ཅན་བཤད་མི་ཐུབ་མོད། ཚོད་དཔག་ཅིག་བཤད་ན་བཅད་རྩོམ་ཤོ་ལོ་ཀ་སྟོང་ཕྲག་ལྔ་དྲུག་ལས་བརྒལ་ཡོད་རྒྱུ་རེད་སྙམ།
🎥 དྲི་བ། ད་སྐབས་ཁྱེད་ཀྱི་ཉེ་འཁོར་དུ་རྩོམ་ཡིག་ལ་དགའ་མོས་ཡོད་མཁན་ཅི་ཙམ་འདུག་གམ། སྤྱིར་ཁྱེད་ཀྱི་ཉེ་འཁོར་གྱིས་མི་དག་རྩོམ་འབྲི་པ་དག་ལ་ལྟ་ཚུལ་ཅི་འདྲ་ཞིག་འདུག་གམ།
🎙️ལན།
ད་སྐབས་ངའི་ཁོར་ཡུག་ཏུ་རྩོམ་ཡིག་འབྲི་མཁན་ཤིན་ཏུ་ཉུང་ལ་དགའ་མོས་བྱེད་མཁན་ཡང་དེ་ལྟར་ཡིན། ལོ་གཞོན་འགའ་ཞིག་བརྩེ་དུང་མཚོན་པའི་སྙན་ངག་འགའ་རེ་དྲ་ངོས་སུ་སྤེལ་མོད། ཁོང་ཅག་གིས་ཚོར་བས་བྲིས་པ་ནི་ཆེར་མེད། ཐ་ན་བཀླག་ཀྱང་ཡག་པོ་མི་ཤེས་པའི་ཚད་དུ་འདུག མི་ལོ་ལྔ་དྲུག་ཅིག་གི་རིང་ལ། ངའི་ཁོར་ཡུག་འདི་ནས་བོད་ཡིག་མནལ་མ་ཞིག་འབྲི་བའི་སྐད་ཆ་བཤད་པའི་རོགས་པ་ཞིག་དང་འཕྲད་མ་ཐུབ། སློབ་གྲྭ་བ་ཡིན་ཟེར་མཁན་གྱི་གྲོགས་པོ་སྐོར་ཞིག་ཡོད། ཁོང་ཚོ་གྲལ་དུ་ཡང་བོད་ཡིག་མནལ་མ་འབྲི་མཁན་ཞིག་ཕལ་ཆེར་མེད་ཟེར་ན་ཆོག གྲྭ་བ་དང་གྲྭ་ཟུར་སྐོར་ཞིག་བོད་ཡིག་བཀོལ་བཞིན་ཡོད་མོད། ད་ཆ་གྲྭ་ཟུར་དག་རིམ་བཞིན་འབྲོག་གཤིས་སུ་གྱུར་ནས་བོད་ཡིག་འབྲི་བ་ཇེ་ཉུང་དང་ཡི་གེའི་སྤུས་ཚད་ཇེ་སྡུག་ཏུ་འགྱུར་བཞིན་འདུག། ད་ཆ་ང་ཚོའི་ན་གཞོན་ཚོས་ཕ་སྐད་སྟེང་ནས་རྩོམ་ཡིག་འབྲི་མཁན་ནི་ཧ་ཅང་ཉུང་། དེང་སང་དགོན་སྡེ་གྲྭ་ཚང་ཕལ་ཆེར་གྲོང་ཆོག་ལ་གཡེང་། ཞིང་འབྲོག་ཕལ་མོ་ཆེ་ནི་འུར་ཟིང་དང་ རྒྱུ་འབྱོར་གྱིས་བསླུས་ཟིན། རྒྱུ་འབྱོར་ཕྲན་ཚེག་རེ་ཐོབ་དུས་ཅི་ཡང་བརྗེད་བཞིན་ཡོད། ད་ཆ་མི་རྣམས་འབྱོར་བས་བསླུ་བྲིད་ཐེབས་པ་མང་དྲགས་པས། རྩོམ་ཡིག་རྩག་ཙིག་འབྲི་མཁན་རྣམས་ལ་འཇོན་མེད་ནུས་མེད་བརྗོད་ནས་ཟུར་ཟའི་ངན་སྨྲས་སྣ་ཚོགས་བྱེད།
🎥 དྲི་བ། སྙན་ངག་འབྲི་མཁན་མང་པོ་ཞིག་ལོ་ན་མཐོ་དུས་སྙན་ངག་བྲི་རྒྱུ་ཇེ་ཉུང་དུ་འགྲོ་བའམ་ཁ་ཤས་ཀྱིས་འབྲི་མཚམས་བཞག་པའང་མི་ཉུང་པ་ཞིག་འདུག་པའི་དེ་དག་གི་ཐད་ལ་རང་ཉིད་ཀྱིས་བསམ་ཚུལ་ཞིག་བཤད་རོགས།
🎙️ལན།
ངས་ནམ་རྒྱུན་འདི་ལྟར་བསམས་མྱངས། སྙན་ངག་ནི་ན་གཞོན་ཚོའི་ཚོར་བ་ཤིན་ཏུ་རྣོ་བའི་སྐབས་དགའ་སྐྱོ་ཆགས་སྡང་ལས་གྲུབ་པའི་ཚོར་བའི་བརྩམས་ཆོས་ཤིག་ཡིན་པ་འདོད་དེ། གཞོན་ནུ་ཚོས་བསྟན་བཤིག་ཚ་པོའི་ཚིག་རྣམས་བེད་སྤྱད་དེ་མཛེས་པ་དང་སྒྱུ་འཕྲུལ། སྒྱུ་རྩལ་བཅས་མཉམ་དུ་བསྲེས་ཏེ་དགའ་སྐྱོ་ཆགས་སྡང་གི་ཚོར་བ་རྣམས་ཕྱིར་ཕུད་པ་ལ་གོ་བ་ལེན་མྱོང་། སྙན་ངག་པ་རྣམས་ལོ་ན་རྒས་པར་ཆགས་རྗེས། དགའ་སྐྱོ་ཆཊ་སྡང་གི་ཚོར་བ་སྐྱེན་པོ་དང་བསྟན་བཤིག་ཚ་བའི་གཤིས་ཀ་དེ་དག་ཉམས་ཉེས་སུ་གྱུར་ཞིང་། བརྩེ་དུང་དང་མཛེས་སྤྱོད་ཀྱི་ལྟ་བ་ལའང་དེ་ཙམ་སྙིང་པོ་མེད་པར་གྱུར་བས་སྙན་ངག་མང་པོ་མི་འབྲི་བའི་རྒྱུ་རྐྱེན་དེ་ཨེ་ཡིན་ནམ་སྙམ། ཡང་འགའ་ཞིག་རྒྱུ་དང་དབང་ལ་ཆགས། ཟང་ཟིང་འདོད་ཡོན་གྱིས་བསླུ་བྲིད་ཐེབ་པས་འཚོ་བའི་ཁ་ཕྱོགས་སམ་དགའ་ཕྱོགས་ལ་འགྱུར་ལ་བྱུང་བའང་ཡིན་སྲིད། ཡང་འགའ་ཞིག་ཚེ་འཇུག་གཞུང་ལུགས་ཟབ་མོ་རེ་ལ་འཐམ་ནས་གཞོན་དུས་ལྟར་སྙན་ངག་འབྲི་བ་སོགས་ནི་དོན་ཆུང་ལ་བརྩི་པའང་ཡིན་སྲིད། མཐའ་གཅིག་ཏུ་འདིའོ་ཞེས་ཁ་ཚོན་བཅད་དེ་ཞུ་རྒྱུ་ཁག་ཙམ་བྱུང་།
🎥 དྲི་བ། མི་ཁ་ཤས་ཀྱིས་སྙན་ངག་འབྲི་ཀློག་བྱ་རྒྱུ་ནི་མི་ཚེ་ཆུད་ཟོས་གཏོང་བྱེད་ཅིག་གམ། ཉི་མ་འཁྱོལ་ཐབས་ཙམ་དང་དོན་སྙིང་མེད་པའི་བྱ་བ་ཞིག་ལ་ངོས་འཛིན་གྱི་འདུག་པས་ཁྱེད་ཀྱིས་དེ་དག་ལ་ལྟ་ཚུལ་ཅི་ཞིག་ཡོད་དམ།
🎙️ལན།
དེ་འདྲ་བཤད་མཁན་མང་པོ་འདུག་མོད། འོན་ཀྱང་ངས་བལྟས་ན་སྙན་ངག་འབྲི་ཀློག་བྱ་རྒྱུ་ནི་དོན་སྙིང་ལྡན་པ་ཞིག་རེད་དྲན་གྱི་འདུག དཔེ་ན་སེམས་ཀྱི་དགའ་སྐྱོ་ཆགས་སྡང་གི་ཚོར་བ་གསོན་པོ་རྣམས་ཕྱིར་ཕུད་པ་དང་། རང་བྱུང་ཁམས་ཆེན་མོའི་ཕྱི་ཡི་མཛེས་སྡུག་གི་རྣམ་པ་དེ་དག་ནང་སེམས་ཀྱི་འཆར་ཡན་དང་སྒྱུ་རྩལ་གྱིས་རོལ་མྱོང་བྱེད་ནུས་པ་དང་། ད་དུང་རྟོག་བཏགས་དང་སྒྱུ་འཕྲུལ། འཆར་ཡན་བཅས་རྣམ་པ་མི་འདྲ་བའི་སྒོ་ནས་མཛེས་སྡུག་ཉམས་སུ་མྱོང་ཆོག་པ་ཡིན། སྙན་ངག་ནི་མིའི་རིགས་ཀྱི་རིག་གནས་དང་སྐད་ཡིག་གི་སྲོག་རྩ་བརྟན་པོ་གནས་བྱེད་ཀྱི་ལྕགས་རི་ཞིག་སྟེ། སྙན་ངག་ནི་མིའི་རིགས་ཀྱི་རིག་གནས་ཀྱི་གོ་ས་མཐོ་པོ་སླེབས་ཡོད། སྲོལ་རྒྱུན་གྱི་བརྡ་དང་ཐ་སྙད་དེ་དག་སྙན་ངག་གི་སྟེང་དུ་གནས་ཡོད་ལ། གལ་ཏེ་སྙན་ངག་མེད་ཚེ་མཁས་པ་རྣམས་ཀྱི་སློབ་གསོ་དང་བརྩམས་ཆོས་ལ་མཛེས་པ་མེད། གཞོན་ནུ་ཚོའི་བརྩེ་དུང་དང་འཚོ་བ་ལ་ཁ་དོག་མེད། དེའི་ཕྱིར་སྙན་ངག་ནི་མེད་ཐབས་མེད་པའི་རིག་ཚན་གལ་ཆེན་ཞིག་རེད་འདོད། འོན་ཀྱང་མི་ཁ་ཤས་ཀྱིས་སྙན་ངག་འབྲི་ཀློག་མི་དགོས་པར་འདོད་པ་དང་། དོན་མེད་རེད་སྙམ་པ་ནི་ཁོང་ཅག་གིས་སྙན་ངག་ཅེས་པའི་རིག་ཚན་འདིའི་དོན་མ་གཏོགས་པའམ། རིག་ཚན་འདིས་མིའི་རིགས་ལ་ཞབས་ཞུ་གང་འདྲ་བྱེད་ཀྱིན་ཡོད་པ་དང་། ལྡིངས་ཆ་ཇི་ཙམ་ལ་ཐོན་ཡོད་པ་མ་ཤེས་པས་རེད་འདོད། སྙན་ངག་ཅེས་པའི་རིག་ཚན་འདིའི་ལྡིངས་ཆ་ནི་རིག་པའི་གཞུང་ལུགས་ཀྱི་པོ་ཏིའི་གསེབ་དང་། མཁས་པའི་བློ་འབྱེད་ཀྱི་གཏམ་གླེང་ཁྲོད། གཞོན་ནུ་ཕོ་མོའི་བརྩེ་དུང་དང་། རི་ལུང་ཐང་གསུམ་གྱི་མཛེས་སྡུག་གི་ཁྲོད་དུ་གནས། མཁས་པ་ཚོའི་བརྩམ་ཆོས་གང་འདྲ་ཞིག་ཡིན་རུང་སྙན་ངག་དང་མ་འདྲིས་པ་ཞིག་མེད་པས་ན་སྙན་ངག་ནི་མཁས་པ་ཚོའི་བརྩམ་ཆོས་ཀྱི་ཁྱད་ཆོས་འཇོགས་ས་གཙོ་བོ་དེའང་ཡིན་པས་སྙན་ངག་ནི་མེད་ཐབས་མེད་པའི་རིག་ཚན་ཞིག་ཡིན་པ་ཤེས་ཚེ་ཁོང་ཚོས་ཀྱང་སྙན་ངག་ནི་ཆེས་གལ་ཆེན་ཞིག་ཡིན་པར་ཤེས་ངེས་སྙམ།
🎥 དྲི་བ། མཐའ་མཇུག་ཁྱེད་ཀྱིས་བཅར་འདྲི་དང་ལེན་བྱས་པར་བཀའ་དྲིན་ཆེ་ཞུ་བ་དང་ལྷན་འཕྲིན་སྟེགས་འདིའི་ཀློག་པ་པོ་རྣམས་ལ་བཤད་འདོད་པའི་སྐད་ཆ་འདྲ་ཡོད་དམ།
🎙️ལན།
གུས་པར་བཅར་འདྲི་གོ་སྐབས་གནངས་བར་ཐུགས་རྗེ་ཆེ་ཞུ། ངས་འདི་བརྒྱུད་དེ་ཀློག་པ་པོ་ཡོངས་ལ་ཞུ་འདོད་པ་ནི་མ་འོང་པར་ཁྱོད་ཅག་གིས་བརྡ་འཕྲིན་གྱི་རིགས་གང་འདྲ་ཞིག་ཡིན་ཡང་དེའི་ནང་དུ་བོད་ཡིག་འབྲི་བ་དང་ཕ་སྐད་བཤད་རྒྱུ་ནི་ངའི་རེ་བ་ཉག་ཅིག་ཡིན། མཐར་ཁྱོད་ཀློག་པ་པོ་ཡོངས་དང་སྐད་ཡིག་ལ་བློ་དཀར་བའི་མི་རྣམས་ཁ་དགེ་བཀྲ་ཤིས་ཡོངས་བར་སྨོན་ཞེས་སྨོན་ལམ་གྱིས་འཇུག་བསྡུ་རྒྱུ་ཡིན།། །།
