དང་པོ། བརྩེ་དུང་ཞེས་པ་ནི་ཆ་རྐྱེན་ཡོད་མེད་དང་གོ་ས་འཛོམས་མིན་ལ་མ་ལྟོས་པར། དེ་ནི་ཕོ་མོ་ཕན་ཚུན་སྙིང་ཉེ་མིན་དང་ཤ་ཚ་མིན་གྱིས་དབྱེ་དགོས།
གཉིས་པ། སྤྱིར་ཕོ་མོ་གཉིས་ཀྱིས་བརྩེ་དུང་གི་འབྲེལ་བ་བཅའ་འདོད་ན། དང་པོ་ཕན་ཚུན་ལ་རྒྱུས་ལོན་ཟབ་མོ་རེ་བྱེད་དགོས། དེ་ལྟར་བྱས་ན་བརྩེ་དུང་ལ་འབྲས་བུ་ཡོད་པ་རེད་མ་གཏོགས། ངོ་ཤེས་མ་ཤེས་ཙམ་གྱིས་དགའ་རོགས་ཡིན་ཞེས་ལུས་འབྲེལ་འཇོག་པ་ནི་ཕན་ཚུན་བེད་སྤྱོད་པ་ཙམ་དང་གནས་སྐབས་ཀྱི་འདོད་པའི་ཆེད་ཙམ་རེད།
གསུམ་པ། ཕོ་མོ་སུ་ཡིན་ཡང་སྒོར་མོར་དམིགས་ནས་དགའ་རོགས་འཚོལ་བ་ནི་རང་སྡུག་རང་གིས་ཉོ་བ་ཁོ་ན་རེད། རྒྱུ་མཚན། ཁྱེད་གཉིས་ཀྱིས་སྒོར་མོ་ལ་དམིགས་པ་ལས། བརྩེ་དུང་དག་མ་ཞིག་གི་འདུ་ཤེས་བཟུང་མྱོང་མེད་པས་སོ། །
བཞི་བ། བུད་མེད་གཅིག་ལ་མཚོན་ནས་བཤད་ན་དེའི་རང་དབང་གང་འདོད་ཀྱིས་རང་ལུས་རྩེད་ཆས་བྱེད་མི་ཉན་པ་ནི་ཐོག་མའི་དམ་བཅའ་ཡིན་དགོས། རྒྱུ་མཚན། ཁྱོད་རང་ལ་ཤ་མི་ཚ་ཡང་། ཨ་མ་དེ་ལ་འདང་ཞིག་རྒྱག་དགོས་པས་སོ། །
ལྔ་བ། ཕོ་མོའི་བརྩེ་དུང་ནི་ཉོག་གཏམ་འགའ་ཞིག་དང་ལེགས་སྐྱེས་ཙམ་ཞིག་གིས་མཚོན་པ་ཞིག་མིན་ལ། དེ་ནི་ཕན་ཚུན་ཤ་ཚ་མིན་དང་སྐྱིད་སྡུག་གང་བྱུང་མཉམ་འཁུར་བྱེད་མིན་ལ་ཐུག་ཡོད།
དྲུག་པ། བརྩེ་དུང་ཞེས་པ་ནི་ལུས་འབྲེལ་བཞག་པ་ཙམ་མ་ཡིན་ལ། སྐྱིད་སྡུག་མཉམ་རོལ་དང་། བློ་སེམས་གཅིག་ཏུ་མཐུན་ན་དེ་ནི་བརྩེ་དུང་རེད། འཇིག་རྟེན་སྟེང་ཆེས་གཏིང་ཟབ་པའི་བརྩེ་དུང་གི་སྙིང་རུས་རྡོག་རྡོག་པོ་དེ་རེད།
བདུན་པ། སྤྱིར་ན་བརྩེ་དུང་གི་དཀའ་ཁག་རེ་རེ་ནི། ནང་སེམས་ཀྱི་མནར་གཅོད་རེ་རེ་ཡིན་པས། ཕོ་མོ་སུ་ཡིན་ཡང་ཐོག་དང་པོ་ནས་འདང་ཞིབ་མོར་རྒྱག་རྒྱུ་གལ་ཆེའོ། །
བརྒྱད་པ། བརྩེ་དུང་གི་དུས་ཡུན་ནི་ཉིན་གཅིག་དང་ཟླ་གཅིག་ག་ལ་ཡིན། དེ་ནི་བདེ་སྐྱིད་ཁོ་ནས་མི་ཚེའི་མཐའ་རུ་བསྐྱལ་རྒྱུ་ཡིན་པས། ཕོ་མོ་སུ་ཡིན་ཡང་སྣང་མེད་དུ་འཇོག་མི་རུང་།
དགུ་བ། གལ་ཏེ་སྐྱེས་པ་ཞིག་གིས་བུད་མེད་གཅིག་ལ་ངོ་ཤེས་མ་ཐག་གོ་སྐབས་དག་དག་དགོས་ཟེར་ན། དེ་ནི་བརྩེ་དུང་ངོ་མ་ཞིག་འཆང་མེད་པའི་སྔོན་བརྡ་རེད།
མཆན། ཡི་གེ་འདིས་དེང་དུས་ན་གཞོན་ཕོ་མོ་དག་ལ་ཕན་ཐོགས་རེ་ཡོང་བའི་རེ་མདུན་དང་བཅས་སྤྲིངས་སོ།།
