农历六月份，算得是一年里顶顶热葛时节，小暑过后是大暑，天热熏得荷花开。
而苏州人呢，勒海实梗热葛季节里，倒还记得要服侍猫狗。
黄梅天有几化懊糟，相信经历过葛朋友侪有体会。猫狗一身皮毛，藏污纳垢，是跳虱葛贼窠。实勒，六月初，苏州人黄梅天一过，就要带屋里葛猫勒狗勒到河滩头浪去淴浴，所谓“六月六，狗淴浴”。
明代葛沈德符勒海《野获编》里写过：“六月六日，本非令节，猫犬之屋，俾浴于河。”
清袁景澜勒海《吴郡岁华纪丽》里就也有记载：“六月六日，俗牵猫犬浴于河，云以避蚁虱。”
可见，六月六，牵猫狗淴浴葛习俗勒海明朝辰光就已经穷行则。但不过老法头弗像现在人有实梗葛淴浴条件，人也弗板定一年能淴几埭，倒还记得要搭猫狗淴浴，可见当时葛江南人也确实有几分闲情。
不过该只习俗葛来历，有点考究弗出，明朝人田汝成勒海俚葛《西湖游览志》里有记载，但不过也讲“其义不可晓。”
明田汝成《西湖游览志》“郡人于六月初六，舁狗猫浴于河，致有汩没于淤泥，踉跄就跳者，”
有人讲是源于云南地区六月六要搭象鼻头淴浴，也有人讲是因为宋朝葛六月六天贶节，还有人讲是古代水祓葛遗存。
《燕京岁时记》云：“象房有象时，每岁六月六日牵往宣武门外河内浴之。观者如堵，后因象疯伤人，遂不豢养。光绪十年以前尚及见之。”
我觉着，作兴也是因为古代淴浴条件有限，其他日脚淴仔浴弄弗干，小动物生仔毛病会得死脱。特别是怕冷怕淴浴煞葛猫咪。实勒等到黄梅天过脱，天热起来葛辰光再搭俚笃淴浴。
不过弗管是哪种由来，六月六号，搭猫狗淴浴葛风俗搭仔“六月六，狗淴浴”葛方言俗语一脚流传到仔今朝。
明朝《雅谑》里还收仔一则笑话，讲说有人三月三来拜访杨南峰，杨勒海淴浴，朆见客，客人火冒煞，觉着该个人实在忒狂，要报复报复俚。乃末到仔六月六号，杨南峰也有事体寻俚，俚就讲也要淴浴，弗见客。杨南峰就笑则，勒墙头浪题词：“君昔访我我洗浴，我今访君君洗浴。君访我时三月三，我访君时六月六。”三月三是浴佛日，而六月六是狗淴浴，倷邯郸学步，吃仔大亏则啘！
《雅谑》：“俗传三月三为浴佛日，六月六为浴猫狗日。有客谒杨南峰吉，值三月三日，杨以浴辞。客不解，谓其傲也，思以报之。杨乃于六月六日往拜，客亦辞以浴。杨戏题其壁曰：’君昔访我我洗浴，我今访君君洗浴。君访我时三月三，我访君时六月六。’”
实勒，老法头人勒该个一日是弗大淴河浴葛，“以避猫犬之嫌”。
今年葛六月六亦要到则，阿要带屋里葛小猫咪，小狗狗去淴个浴？
文 | 予安
版 | 予安
图片来自网络
往期导读
