P
art 01.
Spring
烟花三月，全国人民侪勒望江南跑，伲反其道而行之，南下广东。
因为众所周知葛原因，伲只好趁仔葛动车到潮汕，十个钟头，趁得腰也要直脱葛辰光，总算到则。
点击收看视频
传统来讲，潮汕地区包括潮州、汕头搭仔揭阳三个地方，伲该趟呢只去仔潮州。朆去旅游资源相对更加丰富葛汕头，南澳岛勒啥个，因为伲头浪生角葛，主要葛主题是触祭。
住末也朆住勒城里，随便拣仔高铁站边浪葛一爿酒店。
滴滴司机告诉伲，为仔兼顾城市葛发展，俚笃特为拿高铁站造勒三个城市葛当中。乃末也就因为实梗勒，到东到西侪远。伲从酒店出发，打的去潮州，要开毛毛叫四十分钟。
但不过实梗一来，伲也看见仔弗少一般游客看弗见葛风景。
潮州城里伲安排仔一日天：
牌坊街荡过则 √
广济桥看过则 √
韩愈祠堂参观过则 √
挨下来葛辰光，纯纯勒吃——头颈绝细，独想触祭。
伲住勒海仔葛乡下头，还好酒店有接送服务，弗用自家扛仔行李，勒烂泥地里跑来跑去。从接送小哥到保洁阿姨到酒店前台，侪当仔伲只住一日，连到房卡只激活仔一日，等到后头再碰着伲葛辰光，侪觉着蛮稀奇。
乡下头归乡下头，酒店各方面条件倒侪蛮扎硬葛，有车马接送，有免费早餐，有健身房勒自助洗衣房。房间大，设施新，潮州人欢喜吃茶，房间里还端正仔一套茶具。
TO CHAOSHAN
顶顶重要葛是便宜。妹子搭我讲，一夜天200多，我一脚当仔一人两百，朆壳张阿末点算铜钿劈硬柴葛辰光再发现，是共总两百多点一夜天。
房费里是包早点心葛，实勒伲是从酒店吃起葛。潮州当地人欢喜吃粿条，其实骨子就是一种米粉。到东到西侪有粿条，但不过吃下来倒还是酒店里葛顶顶好吃，实勒伲连吃三日。
其他葛饭店也侪勒酒店附近寻葛。乡下头无啥游客，开勒落葛饭店覅罪过，侪有点花头经葛。伲门口头就号称“沙溪美食一条街”，伲一路荡一路寻饭馆店。
潮州牛肉火锅 吃着则√
潮州肠粉 吃着则√
卤鹅搭仔粉干 吃着则√
石橄榄鸡汤 吃着则√
虾蟹粥 吃着则√
肠粉搭仔粉干侪是勒潮州城里吃葛，出门葛辰光伲有一点蛮拗葛：弗欢喜荡商业街，欢喜钻小菜场。
从牌坊街出来，一路望市场走葛辰光看见人家生意好就坐下来尝尝。
潮州肠粉搭广州的弗大一样，是一大碗加花生酱葛。
走勒居民区里还看见一个卖猪肉饼葛摊头，朆吃过，想尝尝。跑进去朆寻着肉饼子，阿末点再晓得，搿两只生得像洋芋艿一样葛就是。
吃勒海穷有劲道，淡归淡，穷鲜葛，也算是外插花。
卤鹅搭仔粉干是肠粉店老板娘推荐葛，勒海居民区葛转角浪，一个阿叔摆一只摊头。
粉干价钿贵，但不过贵有贵葛道理，吃勒海到底弗一样。一般葛肝侪是粉笃笃葛，俚吃勒海滑笃笃，味道亦是鲜。一匣子七十几，伲两家头末仔末仔一箪头。
最滑稽葛还是吃粥。
酒店门口走两步就到粥店则，伲网浪查好，讲说五点开门，伲四点五十跑到人家店门口候好仔。老板刚刚开张，勒海搭台子，搭伲讲再歇半个钟头吧。
伲出去荡仔半个钟头，五点半亦𧼰【zaq8】到门口，老板总从来朆见歇吃饭实梗积极葛。
但不过虾蟹粥是真葛好吃，味道极鲜。伲两家头吃粥吃膯脱，难为仔只胃。
饭吃得多仔，就想解解腻，还好潮州人欢喜吃单枞，街浪向一排连牵侪是茶叶行。
伲吃饱仔消食，看见人家正好泡好仔茶端正要吃，就跑进店堂里。
潮州人吃茶吃得浓，老板笃勒海吃蜜兰香，闻上去穷香，但不过吃口有点苦，伲就买仔点鸭屎香。回转酒店亦想亦弗对，来也来则，侪要尝尝葛啘！
第二日再跑得起，搭老板讲阿能每种来一点？
老板普通闲话不大好，两眼墨赤黑。
还好俚笃囡儿出来帮忙翻译，乃也是朆见歇过伲实梗买茶叶葛。当地人买茶叶侪是一斤一斤买葛，伲两家头头一日拼仔半斤弗讲，第二日要喊人家一样来一点。
还好老板搭仔老板娘人穷好，搭伲拿只小袋袋，一样装仔一滴滴，阿末点弗晓得捺亨算铜钿，就意思意思收仔点。
转来一泡，确实，茶叶少放点就是伲葛吃口则，亦是香勒亦是醇。相比鸭屎香，我加二欢喜蜜兰香，别个几只品种也各有风味。
去到潮汕，一定要记得多尝两口茶啊！
伲该趟就是有一点去得弗巧，朆看见俚笃葛民俗活动。前一个礼拜有青龙庙会，后一个礼拜有万人迎老爷，就是伲去葛一礼拜啥物事也无不。
不过俚笃葛神明文化是体现勒每只角落里葛。
伲走到市场葛一路浪发现弗少人勒海烧大元宝，街浪向香烛店也穷多。阿姨讲二月初一是要拜老爷，烧大元宝葛。
俚笃有几几化化葛老爷，甚超至于每只村侪供弗一样葛老爷。作兴只有妈祖是一样葛吧？
潮汕葛传统建筑里有一只工艺叫嵌瓷，一般勒屋檐、飞檐浪。
导航葛辰光发现酒店边浪就有一个嵌瓷博物馆，伲就荡得去看则。穷小葛一只私人博物馆，有两个学徒勒海做生活。兜兜孛相相倒也蛮有意思葛。
旅游就是从熟悉葛地方脱开，到别处体验一番风景或者人文。
潮汕值得
最后附上几个店家信息：
文 | 予安
图 | 予安
往期导读
诺维萨德 | Mokra Gora | 贝尔格莱德
