该枪势里，世界风云变幻，出现仔几化伲从来朆听过歇，见过歇葛事体。
普通闲话里叫“我这辈子都没见过”，但不过苏州人呢，弗欢喜说“该一世”，伲要讲“前世”，叫：“前世里也朆见歇。”
佛教讲究因果循环，灵性不灭，实勒有前世、今世搭来世。慢慢叫，该点说法侪化进伲文化里，也就进仔方言。
甪直 保圣寺
苏州闲话里葛前世也是实梗来葛，讲葛是上一世人生，所谓“今世夫妻，前世冤家”。假使碰着点难行葛事体，怨煞，也会得讲声“前世作孽”！
喔哟，捺亨弄得勒一天世界，真真叫前世作孽。（哎呀，怎么弄得一团糟，真造孽。）
但不过啊，勒苏州闲话里“前世”也能用来表达一种态度，一种“无论如何侪弗会”葛态度。
细想想也对葛，前世里也朆见歇过，该世里也朆碰着过，真真叫稀奇。实勒伲再会得讲“前世里也朆见歇”。
譬方讲今年阿根廷新选出来葛总统，就全本瞎卵斗。讲要器官买卖合法化，卖淫合法化，毒品合法化，枪支合法化，开放移民，取消关税，撤销央行，改用美元，拿廿只政府机构改到八只，教育、医疗、监狱侪私有化……
一桩桩，一件件，侪是伲前世里朆听歇葛，随便两条拿出来配配侪比弹眼落睛还要瞎七搭八。
搿末苏州人阿讲“这辈子”呢？
也讲葛，伲叫“现世”。但不过讲得加二多葛，是“现世报”。对葛，也就是佛教里“今世作孽今世还”葛搿个“现世报”。
《醒世恒言》38卷：“自他死后，家事都就零落；况又遭着兵火，遂把我合族子孙都灭尽了。单留得我一个现世报还在这里。”
《三笑》24回：“冷水热锅爆，松柴无得烧，娘两个饿得吱吱叫。亏勿尽隔壁个大阿嫂，借子个个三升米来淘。我个亲娘吓，看将来阿是现世报？”
但不过啊，到仔现在葛苏州人嘴巴里，大多数无不实梗严重，一般性讲葛侪是小人读书。
苏州自古重教，老发头进士状元一箩筐。假使好好叫葛，屋里赅仔一个弗肯读书葛户头末，就要愁得头发也白则。
该种弗肯好好叫读书葛小人，伲就喊俚笃“现世报”（弗是“盐书包”）。
“现世”也就慢慢叫变成功坍台葛意思哉。
《型世言》3回：“我家老不死、老现世阿公，七老八十，还活在这边。”
《九尾狐》53回：教奴也像俚实梗，还有啥威光立勒人门前格勒，倒勿如买块豆腐撞杀仔，少现现世罢。
闲话讲转来，感兴趣葛朋友好一淘关注关注，看看看到底搿个阿根廷米莱是勒瞎三话四吹牛屄现世，还是伲要一淘见证一个前世里也朆见歇过葛“赛博阿根廷”。
文 | 予安
音 | 予安
图片来自网络
往期导读
