中国人像煞弗管啥个年纪，侪勒海看活狲。
该两日，亦有一只活狲勒海全世界葛游戏界里大杀四方，伲呢就来讲讲苏州闲话里搭活狲相关葛词汇。
苏州人拿猴子叫“活狲”，是活狲，弗是猢狲。明清葛资料会得写成功【犭或】孙，也有人讲应该是【犭活】狲，但不过弗管是哪个打起来侪有难度，实勒就先用“活狲”记音哉。
活狲，侪是坐弗定立弗定葛，实勒方言里相关葛词汇也侪是贬义葛多，譬方说骂人，就好叫俚“活狲”，年纪轻葛可以叫“小活狲”，年纪大葛就叫“老活狲”。
《大双蝴蝶》23回：张姆姆，李婶婶，手里抱子小[犭或]狲。家中男妇多逃走，儿啼女哭闹盈盈。
《野叟曝言》52回：本等不干我事，不索管你这本子闲帐，却恼你装这幌子小[犭或]狲在大虫头上挦毛!
活狲屁股
活狲屁股红通通葛。有诸女小娘儿呢刚正学化妆，面孔浪葛胭脂搨得红完红，伲就说“活狲屁股”。
或则呢，碰着尴尬希或者难为情葛辰光，人葛面孔涨得煊煊红，也好讲“活狲屁股”。
《九尾狐》19回：说得不好，比作猢狲的屁股，拍熟的肺头，岂不难看吗?
《九尾狐》：大先生，倷看俚面孔绯红，涨得像血攻猪头，猢狲屁股实梗，实头搂勿起格，勒浪大发极哉。
《清稗类钞•苏州方言》猢狲屁股：讥妇女之两颊敷脂，红如猴臀也。
青肚皮活狲
据讲，刚刚养出来葛小活狲肚皮浪葛毛少，看得见青筋，就叫“青肚皮”。老发头有出猴戏葛，小活狲难训，记弗牢物事。
实勒“青肚皮活狲”讲葛就是搿诸记性推扳，弗记教训葛人。
娘训小干葛辰光就会得骂“青肚皮活狲”，有转巴就简称“青肚皮”哉。譬方讲：
吃饭前头要汏手！小赤佬前讲后忘记，青肚皮活狲。
（吃饭前要洗手！小鬼前说后忘，青肚皮活狲。）
弹词里也有记载，外加骂得来得葛凶。《白虎岭·教师》：“忘恩负义勿要面皮，倷只瘟活狲、臭活狲、草莽活狲、油煎活狲、青肚皮活狲、千年勿死老活狲！”
《常言道》6回：戴帽子的[犭或]狲倒像人，青肚皮[犭或]狲那有灵性，白脚花狸猫何处去?
《何典》5回：只见一个硬头叫化子，背上擐个长袋，手里牵只青肚皮猢狲，后头跟一只急屎狗，在门前走过。
活狲弗赅宝
有诸人，赅仔好物事囥弗牢，赛过活狲一样上蹿下跳要献宝葛，伲就讲俚叫“活狲弗赅宝”，譬方讲：
买仔新鞋子就要着，小活狲真真叫活狲弗赅宝。
（买了新鞋就要穿，小鬼真的是活狲弗赅宝。）
有辰光，弗单单要献宝，还败家，也好叫“活狲弗赅宝”，譬方讲：
俚个户头末活狲弗赅宝，赅仔点铜钿就瞎投资，阿末点末侪倒光。
（他这家伙活狲弗赅宝，赚了点钱就乱投资，最后全败完了。）
活狲扒肚肠
活狲是一种停弗下来葛动物，空下来就要拉拉耳朵，抓抓头，扒扒肚皮浪葛两根毛。
实勒，弗管是做事体还是弄物事，假使有人欢喜弗停葛扒，弗停葛瞎扒瞎扒，伲就讲“活狲扒肚肠”。譬方讲：
倷末真葛活狲扒肚肠，头浪两根毛扒弗好则，今朝染只红颜色，明朝烫两只卷，后日剪短，大后日接起来。
（你是真的猢狲扒肚肠，头上几根毛弄不好了，今天染个红色，明天烫卷，后天剪短，大后天又接上。）
而该诸一脚“扒肚肠”葛人，伲会得叫俚笃“扒活狲”。
假使再进一步，是搿诸皮搭鬼，无法无天葛小人，也会得骂“断链条活狲”。
活狲戴帽子
活狲本是众牲，戴仔只帽子倒是有点人葛样子则。
所谓“沐猴而冠”，方言里讲葛也是搿诸徒有其表，能力欠佳葛人，后头呢还要拖一句“像煞有介事”。
《清稗类钞•苏州方言》：猢狲戴帽子：猢狲，猴也，沐猴而冠，讥其徒具人形也。
活狲出把戏
老发头苏州街浪向有不少孛相猴戏葛，活狲一歇歇着衣裳，一歇歇踏脚踏车，该诸活狲葛表演，就叫“活狲出把戏”。
但不过活狲出一场好戏，但人弗能实梗。假使有人像活狲实梗做搿诸夸张，不合规矩，痴吼吼葛事体，就会得拨人讲“活狲出把戏”。
特别是有辰光小盆友人来疯，欢喜显，做贼腔，爷娘就会得骂：
倷捺亨？活狲出把戏啊？
（你怎么？活狲出把戏啊？）
弗做人事，倒出猴戏，捺亨弗是活狲出把戏呢？
《清嘉录》正月：凤阳人蓄猴，令其自为冠带，并豢犬为猴之乘，能为《磨房》、《三战》诸出，俗呼“[犭或]狲撮把戏”。
《石点头》4卷：期一缘一会，复遇猢狲撮把戏，这后生却又撞来。
《何典》5回：形容鬼听得锣响，走出来看时，见是猢狲撮把戏，便挖几个看肚兜铜钱来舍他。(
其实骨子，弗单单是苏州闲话，勒海整个葛中文语境里，搭活狲相关葛词汇侪弗是啥个好词。但不过，就是勒海实梗葛刻板印象里，有一只活狲，破石而出，一身反骨，争仔一个齐天大圣。
希望伲葛国产游戏，也能石破天惊，一鸣惊人。
毕竟该个一次出葛是游戏，弗是把戏哉。
文 | 予安
版 | 予安
图片来自网络
往期导读
