亦是一年惊蛰。
往年惊蛰侪勒二月里，今年过年晏，三月份则还勒正月里。实勒温度一脚上弗上，碰碰就要特到零度。
过仔惊蛰，慢慢叫就要暖日起来则，虽然讲还有个二月里葛神鬼天，但不过总归弗会实梗瀴则。
乃末过仔惊蛰，春雷惊百虫。用苏州人葛说法来讲，就是“蛇虫百脚侪要出洞则”。
所谓“蛇虫百脚”，顾名思义，就是蛇、虫搭仔百脚，也就是蜈蚣，苏州人用该个词来泛指各奇各色有毒葛生物，虫勒星。
明清小说里写着过，日常世间也蛮常用葛。
《缀白裘》3集3卷：“(丑)几里来。捉，捉，捉!(生)做什么?(丑)赶开子蛇虫百脚好坐，弗没，要钻到唔屁眼里去个㖸。”
像伲住老房子葛，蛇虫百脚也要比现在葛新公房多点得勒。
小辰光勒院子里孛相葛辰光拨刺毛虫[tsy55 mau55 zon21]【毛毛虫】叮着过，皮肤浪虚起来一大块，吓得大人侪勒海。
大仔点搭淘伴一淘孛相假泥模模，掘烂泥葛辰光会得掘着弗少西瓜虫。该个是我唯一弗吓葛虫，小辰光还要捉仔弄孛相勒。
再大点原是怕蛇虫百脚，但不过也晓得点对付俚笃葛方法。
看见蜒蚰[ye22 yoe33]【蛞蝓】勒蚂蟥[mo22 waon44]【水蛭】勒，拿点盐就好。乃末一只盐钵头摧下去，虫是死脱则，夜里炒饭葛作料也无不则。
碰着蟑螂末无不办法，杀虫剂拿出来喷吧。
印象顶顶深葛是有一埭，伲娘拨一条百脚[paq55 ciaq55]【蜈蚣】咬着，好婆要紧要慢跑到隔壁头去寻鸡咕咕葛馋唾水，讲是鸡葛馋唾水好解毒葛。阿曾寻着朆寻着鸡葛馋唾水弗记得则，鸡飞狗跳是记得葛。
最吓人葛是白蚂米[baq23 mo52 mi21]【白蚁】。
老房子侪是木结构葛多，碰碰就会得有白蚂米。有一埭发现葛辰光两楼已经有一只老猛大葛洞则。还好弗勒主要葛路径浪，弗然弄弗好是人也要特下去。实勒新装修葛辰光，橱柜侪做葛全铝葛，弗做木头葛，省得还要烦心白蚂米。
伲院子里向还有一条家蛇。
总五六岁葛辰光勒楼梯口碰着葛。看见葛辰光也 弗懂，倒也弗吓，叭叭叭叭跑转来搭好婆说：“好婆，黄鳝游出来则。”好婆跑得去一看，吓煞，细细叫一条小青蛇横勒仔葛踏渡浪，隔仔半日自家游脱则。
前葛两年隔壁乡邻亦勒楼梯口碰着蛇则，讲盘勒海仔葛路当中，青黑颜色葛，拿两个阿姨吓得勒侪勒海。我朆实眼看见，好婆讲是比我小辰光看见葛要粗仔弗少。也是隔仔半日，自家游脱则。
惊蛰过后，春信到，蛇虫百脚要当心 。
文 | 予安
版 | 予安
图片来自网络
往期导读
