يېقىندا ئامېرىكىدىكى بىر پۇلدار كىشى لايىق تاللاش ئېلانى چىقارغان بولۇپ، ئويلىمىغان يەردىن 2500 ئايال بۇ پۇلدارغا ياتلىق بولۇشقا تىزىملاتقان. ئۆتكەن ھەپتە، 20 نەپەر ئايال بۇ پۇلدار بىلەن كۆرۈشۈش ئۈچۈن تاللانغان. بۇ ئاياللارنىڭ ھەممىسىدىن يۇقارقى پۇلدار كىشىگە ئالاقىدار ھېچقانداق ئۇچۇرنى ئاشكارىلىماسلىق توغرىسىدا كاپالەتنامە ئىمزالاش تەلەپ قىلىنغان.
چەتئەل تاراتقۇلىرىنىڭ 13-ئىيۇندىكى ئۇنىۋېرسال خەۋىرىگە قارىغاندا، ئۆتكەن ئايدا ئامېرىكا تۇز شەھىرى 15-نومۇرلۇق ئىشتاتلار ئارا تاشيولى بويىدىكى بىر نەچچە چوڭ ئېلان تاختىسى نۇرغۇن كىشىنىڭ دىققىتىنى تارتقان. بۇ ئېلاندا مەلۇم بىر پۇلدارنىڭ ئۆزىگە لايىق ئىزدەۋاتقانلىقى، بۇ پۇلدارغا ياتلىق بولۇشنى ئارزۇ قىلىدىغان قىز-ئاياللارنىڭ يانفون ئەپ پىروگراممىسى ئارقىلىق تىزىمغا ئالدۇرسا بولىدىغانلىقى ئېيتىلغان.
پۇلدارغا ياتلىق بولۇش ئۈچۈن تىزىمغا ئالدۇرغۇچىلار چوقۇم بەدەن شەكلى قاتارلىق شەخسىي ئۇچۇرلىرىنى تولۇق تولدۇرۇشى لازىم بولۇپ، ئۇنىڭدىن باشقا، تىزىمغا ئالدۇرغۇچىلاردىن ئىككى پارچە سۈرەت تاپشۇرۇش ۋە بىر نەچچە سوئالغا جاۋاب بېرىش تەلەپ قىلىنغان.
ئەڭ ئاخىرىدا ئامېرىكىنىڭ يۇتا ئىشتاتى، لۇيىزاننا ئىشتاتى قاتارلىق جايلاردىن كەلگەن 2500 ئايال بۇ پۇلدارغا ياتلىق بولۇشقا تىزىملاتقان. ئۇلارنىڭ كۆپىنچىسى ئالىي مەلۇماتلىق بولۇپ، يەتتە ئايال ھەتتا ئاسپىرانتلىقنى پۈتتۈرگەنىكەن.
ئۆتكەن جۈمە كۈنى، 20 نەپەر ئايال بۇ پۇلدار بىلەن يۈز تۇرانە كۆرۈشۈشكە تاللانغان. ئۇلار ھەشەمەتلىك پىكاپقا ئولتۇرۇپ يۇتا ئىشتاتى ساندىدىكى مەلۇم كۇلۇبقا ئېلىپ كېلىنگەن. بۇ جەرياندا، پائالىيەت رىياسەتچىسى ئۇلارغا يۇقارقى پۇلدارنىڭ كالتەك توپنى ياخشى كۆرىدىغانلىقى، ئىلگىرى ئايروپىلانغا ئولتۇرغاندا ئوت كەتكەنلىكى ھەم بىر قېتىملىق بۇلاڭچىلىقتىن ئامان قالغانلىقى قاتارلىقلارنى ئۆز ئىچىگە ئالغان بىر قىسىم شەخسىي ئۇچۇرلىرىنى تونۇشتۇرۇپ ئۆتكەن.
لېكىن بۇ پۇلدار باشتىن-ئاخىرى بىر پارچە رەختنىڭ كەينىدە تۇرۇۋېلىپ ئۆزىنى كۆرسەتمىگەن. ئىگىلىنىشىچە، بۇ پۇلدارنىڭ يېشى 30-45 ياشقىچە، بويى 1.80 مېتىر ئەتراپىدا كېلىدىغان بولۇپ، ئۆزى ناھايىتى كېلىشكەن ئىكەن.
پائالىيەت ئاخىرلاشقاندىن كېيىن، پائالىيەتكە قاتناشقان ھەر بىر ئايالغا بىر تال زەنجىر سوۋغا قىلىنغان.
