ཀྲུང་གོ་ས་ཡོམ་དྲ་བས་ཚད་འཇལ་གཏན་འཁེལ་བྱས་པར་གཞིགས་ན། ཟླ་1ཚེས་13ཉིན་གྱི་ཆུ་ཚོད་20དང་སྐར་མ་57དང་58ལ། གཞིས་རྩེ་གྲོང་ཁྱེར་དིང་རི་རྫོང་དུ་སྔ་རྗེས་སུ་ཡོམ་འཕྲོ་རིམ་པ་4.9དང་5.0བརྒྱབ་པ་དང་ཡོམ་ཁུངས་ཀྱི་གཏིང་ཚད་སྟོང་སྨི་10ཟིན་ཡོད། རང་སྐྱོང་ལྗོངས་ས་ཡོམ་ཅུས་ཀྱིས་ངོ་སྤྲོད་བྱས་པར་གཞིགས་ན། འདི་ནི་ཟླ་1ཚེས་7ཉིན་དིང་རི་རྫོང་དུ་ས་ཡོམ་རིམ་པ་6.8བརྒྱབ་རྗེས་ཀྱི་ཡོམ་འཕྲོ་ཆེ་ཤོས་ཡིན་པ་རེད།
དིང་རི་རྫོང་གི་རྫོང་དཔོན་བཀྲ་ཤིས་དོན་གྲུབ་ཀྱིས། ཡོམ་འཕྲོ་ཐེངས་གཉིས་བརྒྱབ་རྗེས་འཕྲལ་དུ་ཡོམ་ལྟེའི་གྲོང་ཚོ་དང་འབྲེལ་བ་བྱས་པ་ཡིན། གནས་སྐབས་མི་སྣ་ཤི་རྨས་ཀྱི་སྙན་སེང་འབྱོར་མ་བྱུང་ལ། ཞིབ་ཕྲའི་གནས་ཚུལ་གྲལ་བཤེར་བྱེད་བཞིན་ཡོད། ས་ཡོམ་བརྒྱབ་རྗེས། རང་སྐྱོང་ལྗོངས་འགྲིམ་འགྲུལ་སྐྱེལ་འདྲེན་ཐིང་གིས་ཚད་མཐོའི་མཐོང་ཆེན་བྱས་ནས། འཕྲལ་དུ་ལྗོངས་གཞུང་ལམ་བྱ་གཞག་འཕེལ་རྒྱས་དང་འཕྲལ་སྡོམ་འགན་ལེན་ལྟེ་གནས་ལ་གཞིས་རྩེ་དང་མངའ་རིས་གཞུང་ལམ་བདག་སྐྱོང་སྡེ་ཚན་དང་ལྗོངས་རིམ་མཐོའི་གཞུང་ལམ་བདག་སྐྱོང་ཚན་པ་ནས་དུས་ཐོག་ཏུ་མི་སྣ་སོགས་གཏོང་དགོས་པའི་བཀའ་བཏང་སྟེ། ས་ཡོམ་གྱི་ཤུགས་རྐྱེན་ཐེབས་པའི་ཁྱབ་ཁོངས་ནང་གི་རྒྱལ་ཁབ་དང་ཞིང་ཆེན་གྱི་གཞུང་ལམ་ལ་གཏོར་སྐྱོན་ཐེབས་ཡོད་མེད་ལ་སྐོར་ཞིབ་གྲལ་བཤེར་བྱས་ཡོད་པ་རེད་ཅེས་ངོ་སྤྲོད་བྱས།
གྲལ་བཤེར་རགས་ཙམ་བྱས་པ་བརྒྱུད། ཚེས་13ཉིན་གྱི་ཆུ་ཚོད་23དང་སྐར་མ་30བར། རྒྱལ་ལམ་318དང་219དང་ཞིང་ཆེན་ལམ་515དང་303སོགས་ཆད་པའི་གནས་ཚུལ་ཐོན་མེད། ཡོམ་འཕྲོ་ཐོན་སྲིད་པའི་ཉེན་ཁ་སྔར་བཞིན་ཡོད་པར་དམིགས་ནས། ཞོར་ཐོན་གནོད་འཚེ་སྔོན་འགོག་བྱ་ཆེད། རང་སྐྱོང་ལྗོངས་གཞུང་ལམ་བདག་སྐྱོང་ཚན་པས་གོང་ཚེས་ཉིན་ས་ཡོམ་གྱི་ཤུགས་རྐྱེན་ཐེབས་པའི་ས་ཁོངས་གཞུང་ལམ་གྱི་རྨང་གཞིའི་སྒྲིག་བཀོད་གཏོར་སྐྱོན་ཐེབས་ཡོད་མེད་ལ་སླར་ཡང་གྲལ་བཤེར་བྱེད་རྩིས་ཡོད་པ་རེད།
ཞིབ་དཔྱད་བྱས་པ་བརྒྱུད། ཡོམ་ཁུལ་དུ་མིག་སྔར་གློག་བརྟན་པོ་ཡོད་ཅིང་། རྒྱལ་ཁབ་གློག་དྲ་བོད་ལྗོངས་གློག་ཤུགས་ཀུང་སིས་གློག་དྲའི་སྒྲིག་ཆས་འཁོར་སྐྱོད་གནས་ཚུལ་ལ་མུ་མཐུད་དོ་ཁུར་བྱས་ནས། སྐོར་ཞིབ་གྲལ་བཤེར་བྱེད་ཤུགས་ཆེ་རུ་བཏང་སྟེ་གློག་དྲ་བདེ་འཇགས་དང་བརྟན་པོ་ཡོང་བའི་འགན་ལེན་བྱ་རྒྱུ་ཡིན་པ་རེད།
