ཚེས་11ཉིན་གྱི་སྔ་དྲོར། ལྗོངས་ཡོངས་ཀྱི་སྡོད་ཁང་འཛུགས་སྐྲུན་ཁོངས་གཏོགས་ཀྱི་ཆེད་ལས་ལག་རྩལ་མི་སྣ་གཞིས་རྩེ་གྲོང་ཁྱེར་དིང་རི་རྗོང་གི་ས་ཡོམ་གྱི་གནོད་འཚེ་ཕོག་ཁུལ་དུ་ཚོད་སྐོར་ལ་སྐྱོད་པའི་མཛད་སྒོ་རང་སྐྱོང་ལྗོངས་ཨར་སྐྲུན་ཐིག་ལེན་འཆར་འགོད་ཁང་དུ་འཚོགས་པ་རེད།
ཟླ་1ཚེས་7ཉིན། གཞིས་རྩེ་གྲོང་ཁྱེར་དིང་རི་རྫོང་དུ་ས་ཡོམ་རིམ་པ་6.8བརྒྱབ་ཅིང་། ལྗོངས་ཡོངས་ཀྱི་སྡོད་ཁང་འཛུགས་སྐྲུན་ཁོངས་གཏོགས་ཀྱིས་མྱུར་དུ་བྱ་སྤྱོད་སྤེལ་ཏེ་ཆེད་ལས་ལག་རྩལ་མི་སྣ་སྐོང་འཐེན་དང་། ཨར་སྐྲུན་ཁྱབ་ཁོངས་ཀྱི་ཀྲུང་དབྱང་ཁེ་ལས་ལ་རོགས་རམ་བྱེད་པར་སྐུལ་སློང་། ཨར་སྐྲུན་གྱི་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་བ་སོགས་བྱེད་ཐབས་ནུས་ལྡན་རབ་དང་རིམ་པ་སྤྱད་དེ། གེགས་ཁུལ་དུ་བསྐྱོད་ནས་གེགས་རྗེས་ཀྱི་སྡོད་ཁང་ལ་ཚོད་སྐོར་དང་སླར་གསོ་བསྐྱར་སྐྲུན་གྱི་ལས་དོན་སྤེལ་བ་རེད།
གཞན་ཡང་། རང་སྐྱོང་ལྗོངས་སྡོད་ཁང་འཛུགས་སྐྲུན་ཐིང་གིས་ད་དུང་འབྲེལ་ཡོད་ལས་དོན་མི་སྣས་ཨར་སྐྲུན་ལྟ་སྐུལ་དོ་དམ་ལ་སྔར་བས་ཤུགས་སྣོན་རྒྱག་དགོས་པའི་བླང་བྱ་བཏོན་པ་དང་། ལྟ་སྐུལ་དོ་དམ་ཚན་པས་གེགས་རྗེས་སྡོད་ཁང་བསྐྱར་སྐྲུན་ལས་གྲྭ་ལག་བསྟར་ལ་བརྒྱུད་རིམ་ཧྲིལ་པོ་དང་ཕྱོགས་ཡོངས་ནས་ལྟ་སྐུལ་དོ་དམ་བྱེད་དགོས་པའི་བླང་བྱ་བཏོན་པ་རེད། ད་དུང་ལྟ་སྐུལ་དོ་དམ་མི་སྣས་ཨར་ལས་རྒྱུ་ཆའི་སྤུས་ཚད་ཚོད་འཛིན་ནན་པོ་བྱེད་པ་དང་། ཨར་ལས་ཀྱི་བརྒྱུད་རིམ་ཚད་དང་ལྡན་མིན་དང་བླང་བྱ་དང་མཐུན་མིན་ལ་ལྟ་སྐུལ་བྱས་ཏེ། སླར་གསོ་བསྐྱར་སྐྲུན་གྱི་ལས་གྲྭ་མཐའ་དག་ཡོམ་འགོག་གི་ཚད་གཞི་དང་མཐུན་པ་དང་། གེགས་རྗེས་སླར་གསོ་བསྐྱར་སྐྲུན་གྱི་ལས་དོན་ལ་མང་ཚོགས་ཀྱི་ཁས་ལེན་ཐོབ་པ་དང་ལོ་རྒྱུས་ཀྱི་ཉམས་སད་ཐེག་ཐུབ་པའི་འགན་ལེན་བྱེད་དགོས་པའི་བླང་བྱ་བཏོན་པ་རེད།
མིག་སྔར། ལྗོངས་ཨར་སྐྲུན་ཐིག་ལེན་འཆར་འགོད་ཁང་གི་ཞིབ་དཔྱད་ཚད་ལེན་དང་། སྒྲོམ་གཞི། ཨར་སྐྲུན། ཐིག་ལེན་སོགས་ཀྱི་ཆེད་ལས་ལག་རྩལ་མི་སྣ་དང་དེ་བཞིན་ཀྲུང་དབྱང་ཁེ་ལས་ཁག་གཅིག་གི་ཆེད་ལས་ལག་རྩལ་མི་སྣ་ཁྱོན་151གེགས་ཁུལ་དུ་ལས་དོན་སྤེལ་བར་བསྐྱོད་ཡོད་པ་རེད།
