རང་སྐྱོང་ལྗོངས་འགྲིམ་འགྲུལ་སྐྱེལ་འདྲེན་ཐིང་།
མིག་སྔར། དིང་རི་རྫོང་གི་གནོད་འཚེ་ཕོག་ཁུལ་གྱི་ལམ་དུམ་ཚང་མར་རླངས་འཁོར་ཤར་གཏོང་ཐུབ་པ་བྱས་ཡོད་པས། གེགས་སེལ་དངོས་ཟོག་སྣ་ཚོགས་དབོར་འདྲེན་བྱེད་མཁན་གྱི་རླངས་འཁོར་རྒྱུན་མི་ཆད་པར་གཞུང་ལམ་བརྒྱུད་དིང་རིའི་ས་ཡོམ་གེགས་ཁུལ་དུ་བདེ་བླག་ངང་སྐྱོད་བཞིན་ཡོད།
གུང་གཞོན་སྡེ་ཚོགས་བོད་རང་སྐྱོང་ལྗོངས་ཨུ་ལྷན།
གུང་གཞོན་སྡེ་ཚོགས་བོད་རང་སྐྱོང་ལྗོངས་ཨུ་ལྷན་གྱིས་སྒོར་ཁྲི་50བཏང་ནས་རྡོ་སོལ་ཏུན་70དང་། ཐབ་ཆས་90 སྲིང་བལ་ཕོ་ཁེབས་1025 དྲོད་སྲུང་གྱོན་ཆས་1300སོགས་ཉོས་ཏེ་མཚན་བརྒྱབ་ནས་དིང་རིའི་ས་ཡོམ་གེགས་ཁུལ་ལ་བསྐྱལ་ཡོད།
རང་སྐྱོང་ལྗོངས་སྡོད་ཁང་འཛུགས་སྐྲུན་ཐིང་།
རང་སྐྱོང་ལྗོངས་སྡོད་ཁང་འཛུགས་སྐྲུན་ཐིང་གིས་འཕྲལ་མར་ལྗོངས་ནང་ཁུལ་གྱི་ཨར་སྐྲུན་ཁེ་ལས་སྐུལ་སློང་གིས་སྟབས་བདེའི་ཁང་པ་1234གྲབས་གསོག་བྱས་ཁར། དགོས་མཁོར་གཞིགས་ནས་གནས་སྐབས་བཀོད་སྒྲིག་བྱ་ཡུལ་བསྐྲུན་ཏེ། གནོད་འཚེ་ཕོག་པའི་མང་ཚོགས་བདེ་འཇགས་དང་དྲོ་སོབ་སོབ་ངང་དགུན་ཁ་སྐྱེལ་ཐུབ་པར་འགན་ལེན་བྱས་པ་རེད།
རང་སྐྱོང་ལྗོངས་ཚོང་དོན་ཐིང་།
རང་སྐྱོང་ལྗོངས་ཚོང་དོན་ཐིང་གིས་ནུས་ཤུགས་ཡོད་རྒུས་འཚོ་བའི་མཁོ་ཆས་འཕྲལ་དུ་གནོད་འཚེ་ཕོག་ཁུལ་དུ་དབོར་འདྲེན་བྱས་པ་མ་ཟད། སི་ཁྲོན་སོགས་ཞིང་ཆེན་དང་མཐུན་སྦྱོར་བྱས་ཏེ་ཞིང་ཆེན(རང་སྐྱོང་ལྗོངས)བརྒྱད་དབར་མཉམ་འབྲེལ་འགན་ལེན་དང་མཉམ་འབྲེལ་མཁོ་སྤྲོད་ཀྱི་ལམ་སྲོལ་ལག་ལེན་བསྟར་བའི་གྲ་སྒྲིག་ལས་དོན་ཡག་པོ་སྤེལ་བ་དང་། སྤྱི་བདེ་དང་། འགྲིམ་འགྲུལ། ཁྲོམ་ར་ལྟ་འདོམས་སོགས་སྡེ་ཚན་དང་མཐུན་སྦྱོར་བྱས་ནས་དངོས་ཟོག་དབོར་འདྲེན་ཤར་གཏོང་ཐུབ་པ་དང་ཚོང་ཁང་དང་སྒོ་རྩིས་ཚོང་ཁང་གི་སྒྲིག་ལམ་སྲུང་སྐྱོང་སོགས་ཀྱི་ལས་དོན་ཡང་ཡག་པོ་བསྒྲུབས་པ་རེད།
