སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་ཙུང་ལི་ལི་ཆང་གི་བླང་བྱ་གཞིར་བཟུང་། ཚེས་7ཉིན་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཀྲང་གོ་ཆིང་གིས་འབྲེལ་ཡོད་སྡེ་ཚན་གྱི་འགན་འཁུར་བློ་མཐུན་གྱི་སྣེ་ཁྲིད་དེ་བོད་ལྗོངས་གཞིས་རྩེའི་ས་ཡོམ་གེགས་ཁུལ་གྱི་ས་གནས་ས་ཐོག་ཏུ་འཕྲལ་སྡོམ་རོགས་སྐྱོབ་ཐག་གཅོད་ཀྱི་ལས་དོན་ལ་མཛུབ་ཁྲིད་གནང་བར་ཕེབས་པ་རེད།

     ཀྲང་གོ་ཆིང་གཞིས་རྩེར་འབྱོར་རྗེས། གནོད་འཚེ་ཚབས་ཆེ་ཤོས་ཕོག་པའི་དིང་རི་རྫོང་གི་གྲམ་སོ་ཤང་དུ་ཕེབས་ཏེ་སྔ་རྗེས་སུ་ཉེན་སེལ་ཐག་གཅོད་བྱ་ཡུལ་དང་། གནས་སྐབས་བཀོད་སྒྲིག་ས་ཚིགས། སྨན་ཁང་བཅས་སུ་ཕེབས་ནས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཚབ་ཞུས་ཏེ་གནོད་འཚེ་ཕོག་པའི་མང་ཚོགས་དང་རྨས་མར་གཟིགས་པ་དང་འཚམས་འདྲི་ཞུས་པ་དང་། མི་སྣ་འཚོལ་སྐྱོབ་དང་། སྨན་བཅོས། དངོས་ཟོག་འགན་ལེན། འཚོ་བ་བཀོད་སྒྲིག གཏོར་སྐྱོན་ཕོག་པའི་སྒྲིག་ཆས་མྱུར་བཟོ་སོགས་ཀྱི་གནས་ཚུལ་ལ་གཟིགས་ཞིབ་གནང་བ་རེད། དེ་རྗེས་ཚོགས་འདུ་གཙོ་སྐྱོང་གནང་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་འགོད་མཛུབ་སྟོན་གལ་ཆེན་གྱི་དགོངས་དོན་དང་ཙུང་ལི་ལི་ཆང་གི་བླང་བྱ་བརྒྱུད་བསྒྲགས་གནང་བ་དང་གོམ་སྟབས་རྗེས་མའི་ཡོམ་འགོག་གེགས་སེལ་ལས་དོན་ལ་ཞིབ་འཇུག་བཀོད་སྒྲིག་གནང་བ་རེད། ཀྲང་གོ་ཆིང་གིས་གསུངས་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ལྗོངས་གཞིས་རྩེའི་ས་ཡོམ་གྱི་གནོད་འཚེའི་གནས་ཚུལ་ལ་དོ་ཁུར་ཧ་ཅང་ཆེན་པོ་གནང་བ་མ་ཟད་གནོད་འཚེ་ཕོག་པའི་མང་ཚོགས་ལ་ཐུགས་ཁུར་གཟབ་བཞེས་གནང་གི་ཡོད། ས་ཡོམ་བརྒྱབ་རྗེས་འཕྲལ་དུ་མཛུབ་སྟོན་དང་མཆན་འགོད་མཛུབ་སྟོན་གལ་ཆེན་གནང་སྟེ་ནུས་ཤུགས་ཡོད་རྒུས་མི་སྣ་འཚོལ་སྐྱོབ་དང་། ནུས་ཤུགས་ཡོད་རྒུས་རྨས་མ་སྐྱོབ་བཅོས། ཞོར་ཐོན་གནོད་འཚེ་བཀག་འགོག གནོད་འཚེ་ཕོག་པའི་མང་ཚོགས་བཀོད་སྒྲིག་ཡག་པོ། ཉེན་སེལ་རོགས་སྐྱོབ་ཀྱི་དངོས་ཟོག་དུས་ཐོག་ཏུ་སྤྲོད་པ། གཏོར་སྐྱོན་ཕོག་པའི་རྨང་གཞིའི་སྒྲིག་བཀོད་མགྱོགས་པོ་བཟོ་བར་དམ་འཛིན། བདེ་འཇགས་དང་དྲོ་སོབ་སོབ་ངང་དགུན་ཁ་སྐྱེལ་ཐུབ་པ་སོགས་ཀྱི་ཐད་བཀོད་སྒྲིག་གནང་ཡོད། ཙུང་ལི་ལི་ཆང་གིས་ཉེན་སེལ་རོགས་སྐྱོབ་དང་། ས་ཡོམ་གྱི་གནས་ཚུལ་ལྟ་ཞིབ་ཚད་ལེན། གནོད་འཚེ་ཕོག་པའི་མང་ཚོགས་ཀྱི་འཚོ་བའི་འགན་སྲུང་སོགས་ལ་བཀོད་སྒྲིག་གནང་ནས་བླང་བྱ་ཁ་གསལ་བཏོན་གནང་ཡོད། བོད་དང་འབྲེལ་ཡོད་ཕྱོགས་ཁག་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་འགོད་མཛུབ་སྟོན་གལ་ཆེན་གྱི་དགོངས་དོན་དང་ཙུང་ལི་ལི་ཆང་གི་བླང་བྱ་ལག་བསྟར་དང་དོན་འཁྱོལ་མཐའ་གཅིག་ཏུ་བྱས་ཏེ། “གོང་དུ་བཀུར་བ་གཉིས”མཐའ་འཁྱོངས་ཀྱིས་མུ་མཐུད་ནུས་ལྡན་དང་། གོ་རིམ་ལྡན་པ། ཕན་འབྲས་ཐོན་པ་བཅས་ཀྱི་སྒོ་ནས་འཕྲལ་སྡོམ་རོགས་སྐྱོབ་བྱས་ཏེ་ཐབས་ཤེས་ཡོད་རྒུ་རྩལ་སྤྲུགས་ཀྱིས་མི་སྣ་ཤི་རྨས་དང་གནོད་འཚེའི་གྱོང་གུན་ཉུང་དུ་གཏོང་དགོས།

     ཀྲང་གོ་ཆིང་གིས་ནན་བཤད་གནང་དོན། མུ་མཐུད་ནས་ནུས་ཤུགས་ཡོད་རྒུས་མི་སྣ་འཚོལ་སྐྱོབ་བྱེད་དགོས་ཤིང་། གྲོང་ཚོ་རེ་རེ་དང་ཁྱིམ་ཚང་རེ་རེ་བཞིན་བྱས་ཏེ་མི་སྣ་འཚོལ་སྐྱོབ་བྱས་ནས་མི་གཅིག་ཀྱང་མི་ལུས་པའི་འགན་ལེན་བྱེད་དགོས། ནུས་ཤུགས་ཡོད་རྒུས་རྨས་མ་སྐྱོབ་བཅོས་བྱེད་དགོས་ཤིང་། སྨན་བཅོས་སྐྱོབ་བཅོས་ཀྱི་མི་སྣ་སྒྲིག་འཛུགས་ཞིབ་ཚགས་བྱས་ཏེ་རྨས་སྐྱོན་དབང་གིས་དབང་པོ་སྐྱོན་ཅན་དུ་གྱུར་བའི་གནས་ཚུལ་ཉུང་དུ་གཏོང་གང་ཐུབ་བྱེད་དགོས། གེགས་ཁུལ་ནི་གྲང་ངར་ཆེ་ཞིང་ས་བབ་མཐོ་བའི་རི་ཁུལ་དང་མི་རིགས་མཐའ་མཚམས་ས་ཁུལ་ཡིན་པ་མ་ཟད། དགུན་ཁར་ཉིན་མོ་དང་མཚན་མོའི་དྲོད་ཚད་ཀྱི་ཧེ་བག་ཆེན་པོ་ཡོད་པས་དྲོད་སྲུང་དྲོད་ལེན་ལས་དོན་མགྱོགས་མྱུར་དང་ཞིབ་ཚགས་ངང་ཧུར་ཐག་བསྒྲུབས་ཏེ་དྲོད་སྲུང་དྲོད་ལེན་སོགས་ཀྱི་འཚོ་བའི་དངོས་རྫས་གང་མགྱོགས་འདང་ངེས་དབོར་འདྲེན་བྱས་ནས་གནོད་འཚེ་ཕོག་པའི་མང་ཚོགས་ཚང་མའི་གཞི་རྩའི་འཚོ་བ་བཀོད་སྒྲིག་ཡག་པོ་བྱེད་དགོས། ཡོམ་འཕྲོའི་ལྟ་ཞིབ་ཚད་ལེན་དང་སྔོན་ཚུད་ཉེན་བརྡ་གཏོང་བར་ཤུགས་སྣོན་རྒྱག་པ་དང་། གཏོར་སྐྱོན་ཕོག་པའི་ཁང་པ་དང་ས་གཤིས་གནོད་འཚེའི་མངོན་མེད་རྐྱེན་ངན་ཕྱོགས་ཡོངས་ནས་གྲལ་བཤེར་བྱེད་པ། ས་གནས་ས་ཐོག་ཏུ་བདེ་འཇགས་དོ་དམ་ཚོད་འཛིན་དང་བདེ་འཇགས་སྐོར་ཞིབ་བྱེད་ཤུགས་ཆེ་རུ་གཏོང་བ་བཅས་བྱས་ནས་ཞོར་ཐོན་གནོད་འཚེ་ལས་མི་སྣ་ཤི་རྨས་མི་ཡོང་བ་མཐའ་གཅིག་ཏུ་བྱེད་དགོས། གེགས་རྗེས་བསྐྱར་སྐྲུན་ལ་མགྱོགས་མྱུར་སྐུལ་འདེད་གཏོང་བ་དང་འཕྲལ་སྡོམ་བར་བརྒལ་དུས་མཚམས་སུ་གནོད་འཚེ་ཕོག་པའི་མང་ཚོགས་ཚང་མ་དུས་ཐོག་ཏུ་གུར་ནང་སྡོད་ཐུབ་པའི་འགན་ལེན་བྱེད་དགོས་པ་དང་ཆབས་ཅིག་སྟབས་བདེའི་ཁང་པ་གང་མགྱོགས་སྐྲུན་པ་དང་གནོད་འཚེ་ཕོག་པའི་མང་ཚོགས་ཀྱི་ཁང་པ་བསྐྱར་སྐྲུན་ལས་དོན་ལ་སྤྱི་འདོམས་སྐུལ་འདེད་གཏོང་དགོས་པ་དང་། འབྲེལ་ཡོད་སྡེ་ཚན་གྱིས་མུ་མཐུད་རྒྱབ་སྐྱོར་བྱེད་ཤུགས་ཆེ་རུ་གཏོང་བ་དང་ལས་ཀའི་མྱུར་ཚད་མགྱོགས་སུ་བཏང་སྟེ་གནོད་འཚེ་ཕོག་པའི་མང་ཚོགས་སྔ་ཙམ་བདེ་འཇགས་དང་དྲོ་སོབ་སོབ་ཀྱི་ཁང་པའི་ནང་སྡོད་ཐུབ་པའི་འགན་ལེན་བྱེད་དགོས། འཕྲལ་སྡོམ་རོགས་སྐྱོབ་གནས་ཚུལ་དུས་ཐོག་དང་གནད་ལ་འཁེལ་པོས་ཁྱབ་བསྒྲགས་བྱས་ཏེ་སྤྱི་ཚོགས་ཀྱི་དོ་ཁུར་ལ་ལན་ཧུར་ཐག་སློག་དགོས།