ཟླ་1ཚེས་8ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་རང་སྐྱོང་ལྗོངས་ཏང་ཨུད་རྒྱུན་ལས་ཨུ་ཡོན་ལྷན་ཁང་གི(རྒྱ་ཆེ)ཚོགས་འདུ་གཙོ་སྐྱོང་གནང་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ལྗོངས་གཞིས་རྩེ་གྲོང་ཁྱེར་དིང་རི་རྫོང་དུ་ས་ཡོམ་བརྒྱབ་པའི་ཐད་གནང་བའི་མཛུབ་སྟོན་གལ་ཆེན་གྱི་དགོངས་དོན་དང་ཀྲུང་དབྱང་འགོ་ཁྲིད་བློ་མཐུན་གྱི་མཆན་བཀོད་མཛུབ་སྟོན་གྱི་དགོངས་དོན་སློབ་སྦྱོང་ལག་བསྟར་གཏིང་ཟབ་གནང་བ་དང་ཡོམ་འགོག་གེགས་སེལ་ལས་དོན་སྐོར་གྱི་གནས་ཚུལ་སྙན་སེང་གསན་ཏེ་འབྲེལ་ཡོད་ལས་དོན་ལ་ཞིབ་འཇུག་བཀོད་སྒྲིག་གནང་བ་རེད།
ཚོགས་འདུ་མ་འཚོགས་གོང་། ཚོགས་ཞུགས་བློ་མཐུན་ཚང་མས་ཡར་བཞེངས་ཏེ་དིང་རི་རྫོང་གི་ས་ཡོམ་རིམ་པ་6.8ཁྲོད་རྐྱེན་ལམ་དུ་ཤོར་བའི་སྤུན་ཟླ་རྣམས་ལ་ངག་བསྡམས་མྱ་ངན་ཞུས་པ་རེད།
ཝང་ཅུན་ཀྲེང་གིས་བསྟན་དོན། ས་ཡོམ་བརྒྱབ་རྗེས། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་དང་སྤྱི་ཚོགས་ལས་རིགས་ཁག་གི་དོ་ཁུར་དང་རྒྱབ་སྐྱོར་འོག རང་སྐྱོང་ལྗོངས་ཏང་ཨུད་ཀྱིས་མི་དམངས་གོང་དུ་བཀུར་བ་དང་ཚེ་སྲོག་གོང་དུ་བཀུར་རྒྱུ་མཐའ་འཁྱོངས་བྱས་ཐོག་མགྱོགས་མྱུར་བཀོད་སྒྲིག་དང་འཕྲལ་མར་བྱ་སྤྱོད་སྤེལ་ཏེ་ཡོམ་འགོག་གེགས་སེལ་གྱི་ལས་དོན་སྒྲིག་འཛུགས་བྱས་ནས་སྤེལ་ཞིང་། དེ་ཡང་ཕྱོགས་ཁག་གི་རོགས་སྐྱོབ་མི་སྣ་འཕྲལ་དུ་སྐོང་བ་དང་རོགས་སྐྱོབ་དངོས་ཟོག་སྣ་ཚོགས་དུས་ཐོག་ཏུ་ཡོམ་ཁུལ་དུ་འབྱོར་བར་བྱས་ནས། ལྗོངས་ཡོངས་ཀྱི་མི་རིགས་ཁག་གི་ལས་བྱེད་མང་ཚོགས་དང་གེགས་ཁུལ་མི་དམངས་དབར་ལྟ་རེས་སྐྱོང་རེས་ཀྱིས་དུས་ཚོད་སྐར་ཆ་ཙམ་ཡང་བརྩོན་ལེན་བྱས་ནས་ཉེན་སེལ་རོགས་སྐྱོབ་བྱེད་པའི་དམིགས་བསལ་གྱི་དམག་འཐབ་ཅིག་བརྒྱབ་ཡོད། མིག་སྔར་ཡོམ་འགོག་གེགས་སེལ་ལས་དོན་ཚན་རིག་དང་མཐུན་ལ་གོ་རིམ་ལྡན་པའི་ངང་སྤེལ་བཞིན་ཡོད་པ་དང་། བཀོད་འདོམས་བཀོད་གཏོང་མ་ལག་འཁོར་སྐྱོད་ནུས་ལྡན་དང་ཏང་སྲིད་དམག་ཉེན་དམངས་བཅས་ཀྱིས་སེམས་མཐུན་ཤུགས་སྒྲིལ་བྱས་པས། གནོད་འཚེ་ཕོག་ཚུལ་ཕྱོགས་ཡོངས་ནས་མཐིལ་རྟོགས་བྱུང་བ་དང་། རྨས་མར་དུས་ཐོག་ཏུ་སྨན་བཅོས་ཐུབ་པ། གནོད་འཚེ་ཕོག་པའི་མང་ཚོགས་བཀོད་སྒྲིག་ཡག་པོ་བྱུང་ནས་སྤྱི་ཚོགས་ཁྱོན་ཡོངས་བརྟན་ལྷིང་དང་མི་སེམས་རྣལ་ལ་འབེབས་ཐུབ་པ་བྱུང་ཡོད།
ཝང་ཅུན་ཀྲེང་གིས་ནན་བཤད་གནང་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱིས་ཡོམ་འགོག་གེགས་སེལ་ལས་དོན་ལ་གཅིག་འདོམས་བྱ་རྒྱུ་མཐའ་འཁྱོངས་བྱས་ཐོག་ཡིད་ཆེས་དང་ཆོད་སེམས་བརྟན་དུ་བཏང་ནས་ནུས་ཤུགས་ཡོད་རྒུས་ཡོམ་འགོག་གེགས་སེལ་གྱི་འགག་སྒྲོལ་དམག་འཐབ་ཡག་པོ་རྒྱག་དགོས། མི་སྣ་འཚོལ་སྐྱོབ་ལས་དོན་མུ་མཐུད་ཡག་པོ་སྒྲུབ་པ་དང་། རོགས་སྐྱོབ་དུས་ཚོད་ཡག་ཤོས་དམ་འཛིན། ཕྱོགས་ཁག་གི་དཔོན་དམག་སྒྲིག་འཛུགས་དང་ལས་བྱེད་མང་ཚོགས་སྐུལ་སློང་བྱས་ནས་རྫོང་དང་། ཤང་། གྲོང་ཚོ་བཅས་རེ་རེ་བཞིན་ལེབ་བཤེར་བྱས་ཏེ་ས་ཆ་གཅིག་ཀྱང་མི་ལུས་པ་དང་མི་གཅིག་ཀྱང་མི་ལུས་པའི་འགན་ལེན་དང་ཐབས་ཤེས་ཡོད་རྒུ་རྩལ་སྤྲུགས་ཀྱིས་མི་སྣ་ཤི་རྨས་བྱུང་ཚད་ཉུང་དུ་གཏོང་དགོས། ནུས་ཤུགས་ཡོད་རྒུས་རྨས་མ་སྐྱོབ་བཅོས་བྱེད་པ་དང་། ཆེད་ལས་སྐྱོབ་བཅོས་མི་སྣ་སྔར་བས་ཚན་རིག་དང་མཐུན་པའི་སྒོ་ནས་བཀོད་སྒྲིག་བྱེད་པ། སྐོར་སྐྱོད་སྨན་ཁང་དང་རོགས་སྐྱོབ་ས་ཚིགས་འཛུགས་པ། གེགས་ཁུལ་དུ་ཁ་ཚ་དགོས་གཏུགས་ཀྱི་རྒྱུན་སྤྱོད་སྨན་རྫས་གཏོང་སྤྲོད་བྱེད་ཤུགས་ཆེ་རུ་གཏོང་བ། རྨས་སྐྱོན་ཕོག་པའི་མང་ཚོགས་ལ་སྐོར་ཞིབ་སྨན་བཅོས་བཅས་བྱས་ནས་མང་ཚོགས་ལ་ཐག་ཉེ་ས་ནས་སྟབས་བདེ་བའི་སྨན་བཅོས་ཐུབ་པར་བྱེད་དགོས། མང་ཚོགས་ཀྱི་བདེ་ཐང་སློབ་གསོར་ཁྲིད་སྟོན་བྱེད་ཤུགས་ཆེ་རུ་གཏོང་བ་དང་། བཀོད་སྒྲིག་ས་ཚིགས་སུ་དུག་སེལ་བྱེད་པ། འཐུང་ཆུ་དང་ཟས་རིགས་ཀྱི་བདེ་འཇགས་ལ་ཞིབ་དཔྱད་ཚད་ལེན་བྱེད་པ། ངང་རྒྱུད་རིང་ལ་ཞིབ་ཚགས་པོས་རྐྱེན་ལམ་དུ་ཤོར་མཁན་ལ་རྗེས་འཇུག་ཡག་པོ་བྱེད་པ། མེ་སྐྱོན་དང་རིམས་ནད་སྔོན་འགོག་ཚོད་འཛིན་ལས་དོན་ཏན་ཏིག་སྒྲུབ་པ་བཅས་བྱས་ནས“གནོད་འཚེ་ཆེན་པོ་བྱུང་བའི་རྗེས་སུ་རིམས་ནད་ཆེན་པོ་མི་ཐོན་པ”བྱས་ཏེ་ཚེ་སྲོག་བདེ་འཇགས་ལ་འགན་ལེན་བྱེད་དགོས། གནོད་འཚེ་ཕོག་པའི་མང་ཚོགས་གནས་སྤོ་བཀོད་སྒྲིག་ཡག་པོ་བྱས་ཏེ། མང་ཚོགས་ཀྱི་གྲང་འགོག་དྲོད་སྲུང་ལས་དོན་མངོན་གསལ་དོད་པའི་གནས་བབ་ཐོག་འཇོག་རྒྱུ་མཐའ་འཁྱོངས་ཀྱིས་འཚོ་བའི་མཁོ་ཆས་སྐྱེལ་འདྲེན་ཡག་པོ་དང་། ཆེད་མི་དང་ཆེད་སྒྲུབ་ཚོགས་ཆུང་གིས་དངོས་ཟོག་དོ་དམ་དང་བཀོད་སྒྲིག་གནད་འཁེལ་བྱས་ཏེ་གནོད་འཚེ་ཕོག་པའི་མང་ཚོགས་གུར་དྲོ་པོའི་ནང་སྡོད་རྒྱུ་ཡོད་པ་དང་། ཆུ་ཁོལ་འཐུང་རྒྱུ་ཡོད་པ། ཟ་མ་ཚ་པོ་ཟ་རྒྱུ་ཡོད་པ། ཉལ་ཆས་དྲོ་སོབ་སོབ་ཡོད་པ། གཉེན་ཉེ་ལྟར་གྱི་བརྩེ་སེམས་ཚོར་ཐུབ་པ་བཅས་འགན་ལེན་བྱས་ནས་གནོད་འཚེ་ཕོག་པའི་མང་ཚོགས་ཀྱི་གཞི་རྩའི་འཚོ་བར་བརྟེན་ས་ཡོད་པ་དང་བདེ་འཇགས་དང་དྲོ་སོབ་སོབ་ངང་དགུན་ཁ་སྐྱེལ་ཐུབ་པའི་འགན་ལེན་བྱེད་དགོས། ཚན་རིག་དང་མཐུན་པའི་ངང་ཉེན་སེལ་གེགས་སེལ་ལས་དོན་སྤེལ་ནས་ཡོམ་འཕྲོ་དང་རི་ཉིལ་བ་སོགས་ལ་ལྟ་ཞིབ་ཚད་ལེན་དང་སྔོན་བརྡ་གཏོང་བར་ཤུགས་སྣོན་རྒྱག་པ་དང་། གནམ་གཤིས་འགྱུར་ལྡོག་ལ་དོ་ཁུར་ཆེན་པོ་བྱེད་པ། ས་གཤིས་གནོད་འཚེའི་མངོན་མེད་རྐྱེན་ངན་ཡོད་སར་ཕྱོགས་ཡོངས་ནས་གྲལ་བཤེར་བྱེད་པ། ཞོར་ཐོན་གནོད་འཚེ་སྔོན་འགོག་ནན་པོ་བྱེད་པ། གཏོར་སྐྱོན་ཕོག་པའི་ཆུ་དང་། གློག ལམ་སོགས་རྨང་གཞིའི་སྒྲིག་བཀོད་ནུས་ཤུགས་ཡོད་རྒུས་མྱུར་བཟོ་བྱེད་པ། གེགས་སེལ་མི་སྣ་དང་གེགས་སེལ་མཁོ་ཆས་ཚན་རིག་དང་མཐུན་པའི་ངང་བཀོད་གཏོང་བཅས་བྱས་ཏེ། ཡོམ་འགོག་གེགས་སེལ་གྱི་རླངས་འཁོར་དང་། དངོས་ཟོག མི་སྣ་བཅས་བདེ་བླག་ངང་འབྱོར་ཐུབ་པའི་འགན་ལེན་བྱེད་དགོས། ཡང་དག་པའི་གླེང་ཕྱོགས་ཀྱི་ཁྲིད་སྟོན་ལ་ཤུགས་སྣོན་བརྒྱབ་ནས་ས་ཡོམ་གནོད་འཚེའི་གནས་ཚུལ་དང་ཡོམ་འགོག་གེགས་སེལ་གྱི་འཕེལ་རིམ་དུས་ཐོག་དང་ཡང་དག་པའི་སྒོ་ནས་ཁྱབ་བསྒྲགས་བྱེད་པ་དང་། ཡོམ་འགོག་གེགས་སེལ་ལས་དོན་ཁྲོད་ཐོན་པའི་དཔེ་མཚོན་བྱས་རྗེས་དང་དཔེ་མཚོན་མི་སྣ་དྲིལ་བསྒྲགས་ཤུགས་ཆེན་བྱས་ཏེ་ཡོམ་འགོག་གེགས་སེལ་ལས་དོན་ཏན་ཏིག་བསྒྲུབ་རྒྱུར་སྤྱི་ཚོགས་ཀྱི་རྣམ་པ་བཟང་པོ་སྐྲུན་དགོས། སྤྱི་ཚོགས་སྤྱི་ཡོངས་ཀྱི་ཞི་མཐུན་བརྟན་ལྷིང་སྲུང་སྐྱོང་བྱེད་པ་དང་། སྤྱི་ཚོགས་ཀྱི་བདེ་འཇགས་དོ་དམ་དང་སྤྱི་ཚོགས་ངོས་ཀྱི་སྔོན་འགོག་དང་ཚོད་འཛིན་ལས་དོན་ཡག་པོ་སྒྲུབ་པ། འགྲོ་ལམ་དང་། ཆུ་མཛོད། གློག་ཁང་། ལྕགས་ལམ། འགག་སྒོ་སོགས་གཙོ་གནད་ཁག་ལ་ཕྱོགས་ཡོངས་ནས་ཞིབ་བཤེར་དང་སྲུང་སྐྱོང་བཅས་བྱས་ནས་བྱ་ཐབས་ནུས་ལྡན་སྤྱད་དེ་གེགས་ཁུལ་གྱི་སྤྱི་ཚོགས་སྒྲིག་ལམ་ཡག་པོ་ཡོང་བའི་འགན་ལེན་བྱེད་དགོས།
