ཀྲུང་དབྱང་གི་སྐྱེ་ཁམས་ཁོར་ཡུག་སྲུང་སྐྱོང་ལྟ་ཞིབ་ཀྱི་རེས་སྐོར་གསུམ་པའི་ལས་དོན་ཁག་གསུམ་པ་སྤེལ་བཞིན་ཡོད་པ་དང་། ཚེས་14ཉིན་དཔེ་མཚོན་གྱོད་དཔེ་ཁྱབ་བསྒྲགས་བྱས་ནས་ཨན་ཧུའེ་དང་། སི་ཁྲོན། ཀུའེ་ཀྲོའུ་བཅས་ཞིང་ཆེན་གསུམ་དུ་སྐྱེ་ཁམས་ལ་གཏོར་བཤིག་ཕོག་པ་སོགས་ཀྱི་གནད་དོན་བརྡ་ཁྱབ་བཏང་བ་རེད།
ལྟ་ཞིབ་ཚོགས་ཆུང་གིས། ཨན་ཧུའེ་ཞིང་ཆེན་འབྲི་ཆུའི་ཆུ་གཞུང་གི་མཚོ་ངོགས་སྤྱི་ལེ་གཅིག་གི་ཁྱབ་ཁོངས་སུ་ཁྲིམས་འགལ་སྒྲིག་འགལ་གྱི་འཛུགས་སྐྲུན་བྱ་སྤྱོད་ཡོད་པ་དང་། འབྲི་ཆུ་སྲུང་སྐྱོང་གི་བཅའ་ཁྲིམས་ལག་བསྟར་བྱས་ཚུན་ཨན་ཆིང་གྲོང་ཁྱེར་གྱིས་འབྲི་ཆུའི་ཆུ་གཞུང་འགྲམ་རྒྱུད་ཀྱི་སྤྱི་ལེ་གཅིག་གི་ཁྱབ་ཁོངས་ནང་རྫས་འགྱུར་བཟོ་ལས་རྣམ་གྲངས་ཀྱང་གསར་སྐྲུན་བྱས་པར་ཉེན་ཁ་དང་མི་མངོན་པའི་རྐྱེན་ངན་མངོན་གསལ་དོད་པོ་ཡོད་པ་རེད། 2021ལོ་ནས་བཟུང་། ཁྲེ་ཀྲོའུ་གྲོང་ཁྱེར་ཤར་ངོས་དཔལ་འབྱོར་གསར་སྤེལ་ཁུལ་གྱིས་འབྲི་ཆུའི་ཆུ་གཞུང་འགྲམ་རྒྱུད་ཀྱི་སྤྱི་ལེ་གཅིག་གི་ཁྱབ་ཁོངས་སུ་རྫས་འགྱུར་བཟོ་ལས་རྣམ་གྲངས་གསར་སྐྲུན་བྱས་པ་རེད།
དེ་དང་ཆབས་ཅིག ཨན་ཧུའེ་ཀྲུང་ཞིན་གྲུ་གཟིངས་ལས་གྲྭ་ཚད་ཡོད་ཀུང་སིའི་གྲུ་གཟིངས་བཟོ་སྐྲུན་རྟེན་གཞིས་འབྲི་ཆུའི་འགྲམ་རྒྱུད་དུ་གྲུ་གཟིངས་ཉམས་བཟོའི་ས་ཆ་མུའུ་18ཁྲིམས་འགལ་ངང་བཟུང་ཡོད། 2021ལོའི་ཟླ་1པོར། ཨན་ཧུའེ་ཞིང་ཆེན་གྱིས་ཨན་ཆིང་གཙང་པོའི་ཆུ་ཕག་ཞིང་ཆེན་རིམ་པའི་རང་བྱུང་སྲུང་སྐྱོང་ཁུལ་འཛུགས་རྒྱུའི་ཆོག་མཆན་སྤྲད་རྗེས། ཁེ་ལས་དེས་ཁྲིམས་འགལ་ངང་བཟུང་བའི་མཚོ་རྒྱུད་དང་གཙང་འགྲམ་ནི་སྲུང་སྐྱོང་ཁུལ་གྱི་ལྟེ་བའི་ཁུལ་དུ་གཏོགས་མོད། འོན་ཀྱང་། ཁེ་ལས་ཀྱིས་སྲུང་སྐྱོང་ཁུལ་གྱི་ལྟེ་བའི་ཁུལ་ཁྲིམས་འགལ་སྒྲིག་འགལ་ངང་བཟུང་བའི་གནད་དོན་ས་གནས་དེ་གས་ཐག་གཅོད་བྱས་མེད་པ་རེད། གྲུ་གཟིངས་ཉམས་གསོ་ཁེ་ལས་ཁག་གཅིག་གིས་ཁྲིམས་འགལ་ངང་འབྲི་ཆུའི་གཞུང་ཆུར་བཙོག་ཆུ་འབུད་བྱེད་ཀྱི་ཡོད་པ་རེད།
ལྟ་ཞིབ་ཚོགས་ཆུང་གིས་སི་ཁྲོན་ཞིང་ཆེན་དུ་འབྲི་ཆུའི་ཆུ་ལག་བརྒྱུད་ལམ་དང་དེ་བཞིན་ངོགས་རྒྱུད་བཙན་བཟུང་བྱས་པ་དང་གཏོར་བཤིག་ཕོག་པ་ཤེས་རྟོགས་བྱུང་བ་རེད། ཀོང་ཡོན་གྲོང་ཁྱེར་ཚང་ཞི་རྫོང་གིས་པའེ་ལི་ཁུལ་གསར་གྱི་ཆུ་ལམ་ཕྱོགས་བསྡུས་བཅོས་སྐྱོང་ལས་གྲྭ་ལག་བསྟར་བྱེད་རིང་། ཅ་ལིང་གཙང་པོའི་ཆུ་ལམ་དོ་དམ་ཁྱབ་ཁོངས་ནང་གི་ཆུ་ལམ་གྲམ་ཐང་མུའུ་971.6གྲོང་ཁྱེར་དང་གྲོང་རྡལ་གྱི་གསར་སྤེལ་འཛུགས་སྐྲུན་ཁྱབ་ཁོངས་ནང་ཁྲིམས་འགལ་ངང་བཅུག་པ་དེའི་ནང་ནས་མུའུ་340.6བཟོ་ལས་ས་ཆར་འཆར་འགོད་བྱས་པ་དང་། ད་ཆ་མུའུ་49.7རྣམ་གྲངས་འཛུགས་སྐྲུན་ཐད་སྤྱད་ཡོད་པ་རེད། དེ་དང་ཆབས་ཅིག རྩ་ཆེའི་ཉ་རིགས་རང་བྱུང་སྲུང་སྐྱོང་ཁུལ་གྱི་གནད་དོན་མངོན་གསལ་དོད་པོ་ཡོད་པ་རེད། གཡག་རྔ་གྲོང་ཁྱེར་ཅིའུ་ལུང་ཆུ་མཛོད་ནི་ཀྲོའུ་ཀུང་གཙང་པོའི་རྩ་ཆེའི་ཉ་རིགས་ཀྱི་ཞིང་ཆེན་རིམ་པའི་རང་བྱུང་སྲུང་སྐྱོང་ཁུལ་གྱི་ཚོད་ལྟ་ཁུལ་དུ་གནས་པ་དང་། 2024ལོའི་ཟླ་3པ་ནས་4པའི་ནང་། ཆུ་མཛོད་ཀྱི་སྣོད་བཅུད་བཞུར་ཚད་ཀྱིས་སྨད་རྒྱུད་ཀྱི་ཆུ་སྐྱེས་སྐྱེ་དངོས་དང་ལྷག་པར་དུ་རྩ་ཆེའི་ཉ་རིགས་ཀྱི་འཚོ་གནས་དགོས་མཁོ་སྐོང་ཐུབ་ཀྱི་མེད་པ་རེད།
ལྟ་ཞིབ་ཚོགས་ཆུང་གིས། ཀུའེ་ཀྲོའུ་ཞིང་ཆེན་ཨན་ཧྲུན་གྲོང་ཁྱེར་དང་། ཀུའེ་ཀྲོའུ་ལྷོ་ནུབ་ཁུལ། ཀུའེ་ཀྲོའུ་ཤར་ལྷོ་ཁུལ་སོགས་ཀྱི་གཏེར་རི་གོ་རིམ་མེད་པར་གསར་སྤེལ་བྱས་ནས་ཁྲིམས་འགལ་ངང་ནགས་ས་བཙན་བཟུང་བྱས་ཏེ་སྣོད་བཅུད་ལ་གཏོར་བཤིག་གཏོང་བའི་གནད་དོན་ཚབས་ཆེན་ཐོན་ཡོད། ཨན་ཧྲུན་གྲོང་ཁྱེར་ཙེ་ཡུན་རྫོང་ཀྲུང་ཧྲུན་རྡོ་རྒྱུ་གསར་སྤེལ་ཚད་ཡོད་ཀུང་སིས་2021ལོའི་ཟླ་4པར་ས་ཆུ་སྲུང་འཛིན་ཇུས་གཞིའི་མཆན་འགོད་བཀའ་ལན་དང་ནགས་ས་བེད་སྤྱོད་ཀྱི་འགྲོ་ལུགས་མ་ཐོབ་པའི་གནས་ཚུལ་འོག་འཛུགས་སྐྲུན་བྱེད་འགོ་བཙུགས་པ་དང་དུས་ཡུན་རིང་པོའི་ནང་ཁྲིམས་དང་འགལ་ཏེ་སྔོག་འདོན་བྱས་ཡོད་པ་རེད། ཀུང་སི་དེའི་གཏེར་ཁུལ་གྱིས་ད་དུང་ཁྲིམས་འགལ་ངང་ནགས་ས་མུའུ་349བཟུང་སྤྱོད་བྱས་པའི་ནང་འགོག་སྲུང་ནགས་ཚལ་མུའུ་92ཡོད་པ་རེད། ཙེ་ཡུན་རྫོང་ཧོ་ཚའེ་འཛུགས་སྐྲུན་རྒྱུ་ཆ་ཚད་ཡོད་ཀུང་སིས་ནགས་ས་མུའུ་114ཁྲིམས་འགལ་ངང་བཙན་བཟུང་བྱས་པ་དང་། ཆན་ལྷོ་ནུབ་ཁུལ་ཨན་ལུང་རྫོང་གསེར་དངུལ་ཀུང་སི་ཧའེ་ཙེ་གསེར་གཏེར་གྱིས་ནགས་ས་མུའུ་752བཟུང་སྤྱོད་བྱ་རྒྱུའི་ཆོག་མཆན་ཐོབ་པ་དང་དོན་དངོས་ཐོག་མུའུ་818བཟུང་སྤྱོད་བྱས་ཡོད་པ་རེད། དུས་མཚུངས་གཏེར་འདོན་ཁེ་ལས་མང་པོ་ཞིག་གིས་སྦགས་བཙོག་འགོག་བཅོས་བྱ་ཐབས་གནད་ལ་མ་འཁེལ་བར་ཁོར་ཡུག་སྦགས་བཙོག་ཚབས་ཆེན་བཟོས་ཡོད་པ་རེད།
ལྟ་ཞིབ་ཚོགས་ཆུང་གིས་འབྲེལ་ཡོད་གནས་ཚུལ་སྔར་བས་བརྟག་དཔྱད་ཞིབ་བསྡུར་བྱ་རྒྱུ་དང་འབྲེལ་བླང་བྱ་གཞིར་བཟུང་རྗེས་མཐུད་ཀྱི་ལྟ་ཞིབ་ལས་དོན་ཡག་པོར་བསྒྲུབ་རྒྱུ་ཡིན་ཞེས་བཤད་པ་རེད།
