ཟླ་11ཚེས་20ཉིན། ཡུག་རེན་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་གིས་ཡུག་རེན་དུ་ཡོད་པའི་ཀྲུང་གོའི་སྤྱི་དམངས་ཚོར་བདེ་འཇགས་ལ་དོ་སྣང་བྱེད་དགོས་པའི་དྲན་སྐུལ་གཏོང་རྒྱུའི་སྐོར་གྱི་བརྡ་ཐོ་ཁྱབ་བསྒྲགས་བྱས་དོན་དུ།
ཡུག་རེན་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་གིས། ད་ཆ་ཡུག་རེན་གྱི་མངའ་ཁོངས་ཚང་མ་དམག་འཁྲུག་གི་དུས་སུ་གནས་ཡོད་པས་བདེ་འཇགས་ཀྱི་གནས་བབ་ཧ་ཅང་ཛ་དྲག་པོ་རེད། ཉེ་ཆར་མཁའ་ཟོན་གྱི་ཉེན་བརྡ་ཡང་ཡང་བཏང་བ་དང་མཁའ་ཐོག་འཇབ་རྒོལ་སོགས་ཀྱི་བདེ་འཇགས་ཉེན་ཁ་ཆེ་རུ་ཕྱིན་ཡོད། ཀྲུང་གོའི་སྤྱི་དམངས་གནས་སྐབས་ཡུག་རེན་དུ་མ་ཡོང་རོགས། ཡུག་རེན་གྱི་ས་ཁོངས་ནང་རང་མོས་ངང་སྡོད་མཁན་ཀྲུང་གོའི་སྤྱི་དམངས་ཀྱིས་ངེས་པར་དུ་བདེ་འཇགས་ཀྱི་འདུ་ཤེས་ཟབ་ཏུ་གཏོང་བ་དང་། ཡུག་རེན་གྱི་བདེ་འཇགས་དྲན་སྐུལ་ལ་དོ་སྣང་ཧ་ཅང་ཆེན་པོར་བྱེད་པ། བདེ་འཇགས་ལ་དོགས་ཟོན་དང་དེ་བཞིན་ཕྱིར་འཐེན་གྱི་གྲ་སྒྲིག་ཡག་པོར་བྱེད་པ། མཁའ་ཟོན་ཉེན་བརྡ་བཏང་རྗེས་ངེས་པར་འཕྲལ་མ་ཉིད་དུ་མཁའ་ཟོན་ཉེན་གཡོལ་བྱ་ཡུལ་དུ་བསྐྱོད་ནས་ལྷོད་གཡེང་གི་བསམ་བློ་དང་སྟེས་དབང་གི་བསམ་པ་འཆང་མི་རུང་།
