ཉེ་ཆར། ཀྲུང་གོ་མཚོ་ཐོག་ཉེན་རྟོག་ཅུས་པེ་ཧའེ་ཡན་ལག་ཅུས་ཀྱི་ཐད་གཏོགས་ཅུས་དྲུག་པའི་ཁོངས་གཏོགས་ཧྲི་ཧྲན་དམག་གྲུས་རྒྱ་མཚོ་སེར་པོའི་དབུས་རྒྱུད་མཚོ་ཁོངས་སུ་སྐོར་ཞིབ་ཀྱི་ལས་འགན་སྒྲུབ་སྐབས། དྲག་ཤུགས་ལ་བརྟེན་ནས་འགོག་རྒོལ་བྱེད་མཁན་སྒྲིག་འགལ་ཁྲིམས་འགལ་གྱི་ཉ་གྲུ་ཞིག་རྩད་ཆོད་ལམ་ལྷོང་བྱུང་སྟེ་བཟུང་ནས། ཡུལ་དངོས་ནས་ཁྲིམས་འགལ་ཉེས་གསོག་དོགས་ཅན་17བཟུང་བ་རེད།
ཟླ་11ཚེས་16ཉིན་གྱི་ཆུ་ཚོད་10པ་ཡོལ་ཙམ་ལ། ཧྲི་ཧྲན་དམག་གྲུས་སྐོར་ཞིབ་བྱེད་རིང་དོགས་ཡོད་ཉ་གྲུ་ཞིག་རྩད་ཆོད་པ་དང་། དམག་གྲུས་འཕྲལ་མར་ཉ་གྲུ་དེའི་འགྲམ་དུ་བཅར་ནས་གྲུ་གཟིངས་གཏོང་མཚམས་འཇོག་ཏུ་བཅུག་སྟེ། ཞིབ་བཤེར་བྱ་རྒྱུའི་རེ་བ་བཏོན་པ་དང་། ཁྲིམས་འཛིན་དམག་གྲུའི་ཁྲིམས་མཐུན་བཀའ་རྒྱའི་མདུན་དུ་ཉ་གྲུ་དེས་གྲུ་གཟིངས་གཏོང་མཚམས་མི་འཇོག་པར་ཞིབ་བཤེར་ལས་གཡོལ་རྩིས་བྱས་པ་རེད།
ཉིན་དགུང་གི་ཆུ་ཚོད་12ཙམ་ལ། ཧྲི་ཧྲན་དམག་གྲུས་གོང་རིམ་གྱི་བཀའ་བཀོད་ལྟར་བྱ་ཐབས་སྣ་ཚོགས་སྤྱད་དེ་ཉ་གྲུ་གཟིངས་གཏོང་མཚམས་འཇོག་ཏུ་བཅུག་ནས་ཞིབ་བཤེར་དང་ལེན་བྱེད་དུ་བཅུག་པ་རེད། ཉ་གྲུ་དེས་གྲུ་གཟིངས་གཏོང་མཚམས་མ་བཞག་པར་དེ་ལས་ལྡོག་སྟེ་རྐང་བཙུགས་ནས་ཧྲི་ཧྲན་དམག་གྲུར་བརྡུངས་ཏེ། ཁྲིམས་འཛིན་དམག་གྲུ་དང་ཁྲིམས་འཛིན་མི་སྣའི་བདེ་འཇགས་ལ་འཇིགས་སྐུལ་ཚབས་ཆེན་བཟོས་པ་རེད། དེ་ལྟའི་ཁྲིམས་འགལ་གྱི་བྱ་སྤྱོད་ལ་ཧྲི་ཧྲན་དམག་གྲུས་བྱ་ཐབས་ནུས་ལྡན་སྤྱོད་རྒྱུའི་ཐག་བཅད།
ཆུ་ཚོད་14ཙམ་ལ། ཧྲི་ཧྲན་དམག་གྲུས་ཏུན་གྲངས་ཆེ་བར་བརྟེན་ནས་སྒྲིག་འགལ་གྱི་ཉ་གྲུ་དང་ཇེ་ཉེར་བཅར་བ་དང་། ཁྲིམས་འཛིན་མི་སྣ་གསུམ་གྱིས་སྐབས་དང་བསྟུན་ནས་ཉ་གྲུའི་ཐོག་མཆོངས་ཏེ་ཉ་གྲུ་དེ་ཚོད་འཛིན་ཐུབ་པར་བྱས། ཞིབ་བཤེར་བྱས་པ་བརྒྱུད། ཁྲིམས་འཛིན་མི་སྣས་ཉ་གྲུ་དེར་ཁྲིམས་འགལ་བྱེད་སྤྱོད་མང་པོ་ཡོད་པ་ཤེས་རྟོགས་བྱུང་བ་རེད།
ད་ཆ། གྱོད་གཞི་དང་འབྲེལ་བ་ཡོད་པའི་གྲུ་གཟིངས་ཁྲིམས་ལྟར་བཀག་ཉར་བྱས་པ་དང་གྱོད་གཞི་དེ་བརྟག་དཔྱད་སྔར་ལས་ལྷག་པར་བྱེད་བཞིན་ཡོད་པ་རེད།
