ཟླ་10ཚེས་29ཉིན། ཕྱི་འབྲེལ་པུའི་མགྲིན་ཚབ་པ་ལིན་ཅན་གྱིས་གསར་འགོད་པའི་རྒྱུན་ལྡན་གྱི་ཚོགས་འདུ་གཙོ་སྐྱོང་གནང་བ་རེད།
གསར་འགོད་པ་ཞིག་གིས། ཨ་རིའི་སྒེར་པ་དང་ཀུང་སིས་ཀྲུང་གོའི་སྔོན་ཐོན་ལག་རྩལ་ལ་མ་དངུལ་འཇོག་པར་པའེ་ཏེང་སྲིད་གཞུང་གིས་མཐའ་མར་ཚོད་འཛིན་བྱ་རྒྱུའི་གཏན་འཁེལ་བྱས་པ་དེའི་ནང་གློག་འདྲེན་ཕྱེད་གཟུགས་དང་རིག་ནུས་བཅོས་མ་སོགས་ཚུད་ཡོད། མགྲིན་ཚབ་པས་དཔྱད་གཏམ་གང་ཞིག་སྤེལ་རྩིས་ཡོད་དམ་ཞེས་དྲིས།
ལིན་ཅན་གྱིས། ཨ་རི་ཕྱོགས་ཀྱིས་ཀྲུང་གོར་མ་དངུལ་འཇོག་ཚོད་འཛིན་པའི་ལམ་སྲོལ་ཁྱབ་བསྒྲགས་བྱས་པར་ཀྲུང་གོ་ཕྱོགས་ཀྱིས་ཡི་རངས་གཏན་ནས་མི་བྱེད་པ་དང་ངོ་རྒོལ་མཐའ་གཅིག་ཏུ་བྱ་རྒྱུ་ཡིན། ཀྲུང་གོ་ཕྱོགས་ཀྱིས་ཨ་རི་ཕྱོགས་ལ་འབྲེལ་གཏུག་བྱས་ནས་དགོས་ངེས་ཀྱི་བྱེད་ཐབས་མཐའ་དག་སྤྱད་དེ་རང་ཉིད་ཀྱི་ཁྲིམས་མཐུན་ཁེ་དབང་སྲུང་སྐྱོང་མཐའ་གཅིག་ཏུ་བྱ་རྒྱུ་ཡིན་ཞེས་བཤད།
