ཟླ་11ཚེས་11ཉིན་ཕྱི་འབྲེལ་པུའི་གསར་འགོད་པའི་རྒྱུན་ལྡན་གྱི་ཚོགས་འདུའི་ཐོག ཞང་ཀང་ཀྲུང་གོ་དཔྱད་གཏམ་གསར་འགྱུར་ཁང་གི་གསར་འགོད་པས་དྲི་བ་བཏོན་དོན། གནས་འཕྲིན་སྤེལ་བར་གཞིགས་ན། ཚེས་8ཉིན། ཨ་རིའི་རྒྱལ་དོན་ཁང་གིས་གསལ་བསྒྲགས་སྤེལ་ནས་ཧྥི་ལི་ཕིན་གྱིས“རྒྱ་མཚོའི་ས་ཁོངས་ཀྱི་བཅའ་ཁྲིམས”ཁྱབ་བསྒྲགས་བྱས་པར་རྒྱབ་སྐྱོར་བྱས་པ་དང་། བཅའ་ཁྲིམས་དེས་ཧྥི་ལི་ཕིན་གྱི་རྒྱལ་ནང་གི་བཅའ་ཁྲིམས་དང《མཉམ་འབྲེལ་རྒྱལ་ཚོགས་ཀྱི་རྒྱ་མཚོའི་བཅའ་ཁྲིམས་སྐོར་གྱི་སྤྱི་ཆིངས》དང་2016ལོའི་ལྷོ་རྒྱ་མཚོའི་འདུམ་གཅོད་གྱོད་གཞིའི་ཁྲིམས་ཆད་གཉིས་གཅིག་མཐུན་བྱུང་ཡོད། ཨ་རི་ཕྱོགས་ཀྱིས་ཧྥི་ལི་ཕིན་གྱིས་རྒྱལ་སྤྱིའི་བཅའ་ཁྲིམས་སྲུང་སྐྱོང་བྱེད་པ་དང་། ལྷག་པར་དུ་ལྷོ་རྒྱ་མཚོའི་རྒྱལ་སྤྱིའི་བཅའ་ཁྲིམས་སྲུང་སྐྱོང་བྱེད་པའི་ཐད་ཀྱི་འགོ་ཁྲིད་ནུས་པར་མཐོང་ཆེན་བྱས་ནས། རྒྱལ་ཁབ་ཁག་གིས་རང་ཉིད་ཀྱི་རྒྱ་མཚོའི་ཐད་ཀྱི་འདོད་ཚུལ་དང《སྤྱི་ཆིངས》ནང་མཚོན་པའི་རྒྱལ་སྤྱིའི་རྒྱ་མཚོའི་བཅའ་ཁྲིམས་གཉིས་མཐུན་ཐབས་ཡོང་བ་བྱ་རྒྱུའི་རེ་འབོད་བྱ་རྒྱུ་ཡིན་ཞེས་བཤད། ཀྲུང་གོ་ཕྱོགས་ཀྱིས་དེའི་ཐད་དཔྱད་གཏམ་གང་ཞིག་སྤེལ་རྩིས་ཡོད་དམ།
ལིན་ཅན་གྱིས། ལོ་མང་རིང་ཨ་རིས་རང་ཉིད་ཀྱི་ས་བབ་ཆབ་སྲིད་ལ་ཞབས་འདེགས་ཞུ་བར་གཞིགས་ནས། ཧྥི་ལི་ཕིན་གྱིས་ལྷོ་མཚོར་ཁེ་དབང་ལ་བཙན་གནོད་དང་འཁྲུག་རྐྱེན་སློང་བར་ངན་སྐུལ་བྱས་པ་དང་། ལྷོ་མཚོ་ཟང་ཟིང་བཟོ་གི་ཡོད། དེའི་མ་རུངས་ཁོག་བཅུག་གི་བསམ་པ་དེ་འཛམ་གླིང་སྐྱེ་བོ་ཀུན་གྱིས་ཤེས། ཨ་རི་ཕྱོགས་ཀྱིས་ཁ་ལ་རྒྱལ་ཁབ་ཁག་གིས《མཉམ་འབྲེལ་རྒྱལ་ཚོགས་ཀྱི་རྒྱ་མཚོའི་བཅའ་ཁྲིམས་སྐོར་གྱི་སྤྱི་ཆིངས》ལ་བརྩི་སྲུང་ཞུ་དགོས་པའི་རེ་བ་འདོན་གྱི་ཡོད་མོད། འོན་ཀྱང་། རང་ཉིད་《སྤྱི་ཆིངས》ནང་ཞུགས་མེད། དེ་ནི་དཔེ་མཚོན་གྱི“ཚད་གཞི་གཉིས་ཅན" རེད། ལྷོ་རྒྱ་མཚོའི་འདུམ་གཅོད་གྱོད་གཞི་དེ《སྤྱི་ཆིངས》ལས་འགལ་བ་ཞིག་ཡིན་པ་དང་། ཆབ་སྲིད་ཀྱི་ཟིང་ཆ་འཁྲུལ་མེད་ཅིག་ཡིན་པས། ཁྲིམས་ཆད་ཟེར་བ་ནི་ཁྲིམས་འགལ་དང་ཕན་མེད་ཅིག་རེད།
