ཟླ་11ཚེས་15ཉིན། ཕྱི་འབྲེལ་པུའི་མགྲིན་ཚབ་པ་ལིན་ཅན་གྱིས་གསར་འགོད་པའི་རྒྱུན་ལྡན་གྱི་ཚོགས་འདུ་གཙོ་སྐྱོང་བྱས་པ་རེད། ལུའུ་ཐོའུ་གསར་འགྱུར་ཁང་གི་གསར་འགོད་པས། ཐའེ་ཝན་ས་ཁུལ་གྱི་འགོ་ཁྲིད་ལའེ་ཆིང་ཏེས་ཉེ་ཆར་“མཛའ་གྲོགས་རྒྱལ་ཁབ་”ཏུ་འཚམས་འདྲི་བྱེད་པ་དང་འབྲེལ་ལམ་བར་དུ་ཨ་རིའི་ཞ་ཝེ་དབྱི་དང་ཀོན་ཏའོ་གླིང་ཕྲན་“ས་མཚམས་ལས་བརྒལ་”སྲིད་པ་འདིའི་ཐད་མགྲིན་ཚབ་པས་དཔྱད་གཏམ་གང་ཞིག་སྤེལ་རྩིས་ཡོད་དམ་ཞེས་དྲིས།
ལིན་ཅན་གྱིས། ཀྲུང་གོ་གཅིག་གི་རྩ་དོན་ནི་རྒྱལ་སྤྱིའི་སྤྱི་ཚོགས་ཀྱི་ཡོངས་ཁྱབ་ཀྱི་ཐུན་མོང་ངོས་འཛིན་ཞིག་རེད། ཐའེ་ཝན་དབང་འཛིན་ལས་ཁུངས་ཀྱིས་“ཕྱི་འབྲེལ་རྒྱལ་ཁབ་”ཟེར་བར་བརྟེན་ནས་ཆབ་སྲིད་ཀྱི་གཡོ་སྒྱུ་དང་“རང་བཙན་”དོན་གཉེར་གྱི་འཁྲུག་རྐྱེན་སློང་བའི་བྱེད་སྤྱོད་དེ་ནི་ངལ་བ་འབྲས་མེད་ཅིག་ཡིན་པ་དང་། དེས་རྒྱལ་སྤྱིའི་སྤྱི་ཚོགས་ནས་ཀྲུང་གོ་གཅིག་གི་རྩ་དོན་མཐའ་འཁྱོངས་བྱེད་པའི་སྲ་ཞིང་བརྟན་པའི་རྣམ་པར་འགྱུར་ལྡོག་གཏོང་མི་ཐུབ་ལ་ཀྲུང་གོའི་ལྡོག་མེད་གཅིག་གྱུར་གྱི་ལོ་རྒྱུས་ཀྱི་འཕེལ་ཕྱོགས་ཆེན་པོ་དེ་བས་ཀྱང་བཀག་འགོག་བྱེད་མི་ཐུབ།
ལིན་ཅན་གྱིས། ཐའེ་ཝན་ས་ཁུལ་གྱི་འགོ་ཁྲིད་པས་ཨ་རིའི་“རྒྱལ་མཚམས་ལས་བརྒལ་”ཟེར་བའི་གནད་དོན་སྐོར་ལ་ཨ་རི་ཕྱོགས་ཀྱིས་“རྒྱལ་མཚམས་ལས་བརྒལ་”དེ་རིགས་བཀོད་སྒྲིག་བྱེད་པར་ང་ཚོས་སྔ་ཕྱི་བར་གསུམ་དུ་ངོ་རྒོལ་མཐའ་གཅིག་ཏུ་བྱེད་ཀྱི་ཡོད། ང་ཚོས་ཨ་རི་ཕྱོགས་ལ་ཀྲུང་གོ་གཅིག་གི་རྩ་དོན་དང་ཀྲུང་ཨའི་མཉམ་འབྲེལ་སྤྱི་བསྒྲགས་གསུམ་གྱི་གཏན་འབེབས་བརྩི་སྲུང་ཞུས་ཏེ་ལའེ་ཆིང་ཏེས་“རྒྱལ་མཚམས་ལས་བརྒལ་”མི་ཆོག་པ་དང་“ཐའེ་ཝན་རང་བཙན་”གྱི་ཕྱོགས་གཏོགས་ལ་ནོར་འཁྲུལ་གྱི་བརྡ་རྟགས་གང་ཡང་མི་གཏོང་བར་བྱ་སྤྱོད་དངོས་ཀྱི་ཐོག་ནས། ཀྲུང་ཨའི་འབྲེལ་བ་དང་ཐའེ་ཝན་མཚོ་འགག་གི་ཞི་བདེ་བརྟན་ལྷིང་སྲུང་སྐྱོང་བྱ་རྒྱུའི་སྐུལ་མ་གཏོང་རྒྱུ་ཡིན་ཞེས་ནན་བཤད་བྱས་ཡོད།
