ཀྲུང་གོའི་ཕྱི་འབྲེལ་པུའི་མགྲིན་ཚབ་པ་མའོ་ཉིང་གིས་ཚེས་4ཉིན་གསར་འགོད་པའི་རྒྱུན་ལྡན་གྱི་ཚོགས་འདུ་གཙོ་སྐྱོང་བྱས།
ཐའེ་ཝན་དང་འབྲེལ་བ་ཡོད་པའི་གནད་དོན་ཐད་འདྲི་རྩད་བྱས་ནས་ལན་འདེབས་སྐབས། མའོ་ཉིང་གིས་འཛམ་གླིང་ཐོག་རྒྱལ་ཁབ་183གྱིས་ཀྲུང་གོ་གཅིག་གི་རྩ་དོན་གྱི་རྨང་གཞིའི་ཐོག་ཀྲུང་གོ་དང་ཕྱི་འབྲེལ་འབྲེལ་བ་བཙུགས་ཡོད་པས། ཀྲུང་གོ་གཅིག་གི་རྩ་དོན་རྒྱུན་འཁྱོངས་བྱེད་པའི་ལོ་རྒྱུས་ཀྱི་འཕེལ་ཕྱོགས་ཆེན་པོ་འགོག་ཐབས་མེད་པ་རེད། ད་ལྟ་ཕ་ལའོ་སོགས་རྒྱལ་ཁབ་ཆེས་ཉུང་ཤས་ཤིག་གིས་ཐའེ་ཝན་ས་ཁུལ་དང“རྒྱལ་ཁབ་བར་གྱི་འབྲེལ་བ”ཟེར་བ་ཞིག་རྒྱུན་འཁྱོངས་བྱེད་ཀྱི་ཡོད། བྱེད་སྟངས་འདི་རིགས་ནི་རང་གི་རྒྱལ་ཁབ་དང་མི་དམངས་ཀྱི་ཁེ་ཕན་དང་རྒྱབ་འགལ་བྱས་པ་མ་ཟད། མཉམ་འབྲེལ་རྒྱལ་ཚོགས་ཚོགས་ཆེན་གྱི་གྲོས་ཆོད་ཨང་2758དང་རྒྱབ་འགལ་བྱས་པ་དང་། ཀྲུང་གོའི་རྒྱལ་ཁབ་ཀྱི་བདག་དབང་ལ་གནོད་འཚེ་བཏང་བའང་ཡིན་པས་ངེས་པར་དུ་ཡོ་བསྲང་བྱེད་དགོས།
ཀྲུང་གོ་ཕྱོགས་ཀྱིས་རྒྱལ་ཁབ་དེ་དག་ལ་རྒྱལ་སྤྱིའི་བཅའ་ཁྲིམས་ཀྱི་འོས་འགན་བསྒྲུབས་ནས་ལོ་རྒྱུས་ཀྱི་ཡང་དག་པའི་ཕྱོགས་སུ་སྔ་ཙམ་ལངས་ཏེ། རང་ངོས་ཀྱི་རྩ་བ་དང་ཕུགས་ཀྱི་ཁེ་ཕན་དང་མཐུན་པའི་ཐག་གཅོད་ཡང་དག་བྱེད་དགོས་པའི་སྐུལ་མ་གཏོང་རྒྱུ་ཡིན། ཡུལ་དུས་ཀྱི་གནས་ཚུལ་ཤེས་གྱུར་ན། སྐྱེ་བོའི་ནང་གི་ཕུལ་བྱུང་ཡིན་ཞེས་པ་ལྟར། ཀྲུང་གོ་ཕྱོགས་ཀྱིས་ཀྱང་རྒྱལ་ཁབ་དེ་དག་གི་དཔྱོད་ལྡན་ཚོས་ལོ་རྒྱུས་ཀྱི་འཕེལ་ཕྱོགས་ཆེན་པོ་དང་དུས་རབས་ཀྱི་རླབས་རྒྱུན་ངོས་འཛིན་གསལ་པོ་བྱེད་པ་དང་། ཀྲུང་གོའི་བདག་དབང་དང་མངའ་ཁོངས་ཆ་ཚང་ལ་བརྩི་འཇོག་བྱས་ནས་རྒྱལ་སྤྱིའི་དྲང་བདེན་གྱི་ཕྱོགས་སུ་སྔ་ཙམ་ལངས་རྒྱུར་དགའ་བསུ་ཞུ་རྒྱུ་ཡིན། མཛའ་བརྩེ་ལ་སྔ་རྗེས་མི་བལྟ་བས། ཀྲུང་གོ་ཕྱོགས་ཀྱིས་ཀྲུང་གོ་གཅིག་གི་རྩ་དོན་གྱི་རྨང་གཞིའི་ཐོག་རྒྱལ་ཁབ་དེ་དག་དང་འབྲེལ་བའི་ལེའུ་གསར་པ་ཞིག་རྩོམ་འདོད་ཡོད།
