گۈزەل ھايات 11-بۆلۈم4-قىسىم _ ئوغلىڭىز ئۈستىدىمۇ

4-قىسىم

  -    ئوغلىڭىز ئۈستىدىمۇ؟ - دېدى دىلنار تۇيۇقسىز ئېغىز ئېچىپ.

ئۆمەرنىڭ پۈتۈن بەدىنى خۇددى باشقىلار تەرىپىدىن بىگىز سانجىلغاندەك ئەندىكىپ، بۇرۇلۇپ  غەزەپ بىلەن:

  -  يەنە تېخى مەن ئەمەس دەيسىز؟ -  دېدى.

- مېنىڭ سەبىرە ئەمەسلىكىم،  ئۇنى تونۇمايدىغانلىقىمغا ۋەكىللىك قىلمايدۇ. مەن ئۇنىڭدىن بۇرۇنقى ئىشلىرىنى ئاڭلىغان ... - دېدى دىلنار.

  -  ئۇنىڭ باشقىلارغا بۇ  ئىشنى دەپ بېرىدىغان يۈزى بارمىكەن؟ ! - دېدى ئۆمەر ھاياجانلىنىپ .  دىلنار ئۇنىڭ تېنىنىڭ تىترەۋاتقانلىقىنى ئېنىق كۆردى.

  -  ئەگەر ئۇ بولمىغان بولسا، مېنىڭ ئوغلۇم ئۆلۈپ كەتمەيتتى، مېنىڭ پەقەت بىرلا ئوغلۇم بار ئىدى! خوتۇنۇم ئوغلۇمنىڭ كېسىلىنى داۋالىتىش ئۈچۈن پۇل غەملەپ، ئوغلۇمنى داۋالىتىپ ساقايتىشنى ئارزۇ قىلغان، ئەمما ئەڭ ئاخىرىدا  كۆزى ئۇچۇق كېتىپ قالدى! ! -  ئۆمەرنىڭ ھاياجان ئىچىدىكى غەزەپلىك ئاۋازىدىن ئۆكۈنۈش ۋە چەكسىز نەپرەت چىقىپ تۇراتتى، ماشىنا ئىچىدىكى بۇرۇقتۇرمىچىلىق ئىچىدە ئاۋازى خۇددى  گۈلدۈرمامىدەك ئاڭلاندى.

دىلنارنىڭ كۆزلىرى يېنىك تىترەپ كەتتى، ئۆمەرنىڭ بۇ تۇرقىدا، قاتتىق ھاياجان ئىچىدە نېمە ئىش قىلىدىغانلىقىنى جەزملەشتۈرەلمىدى.

 - ئەينى يىلى  يامان تەستە يۈرەك مەنبەسىگە ئېرىشكەنىدۇق، ئەمما  يېرىم يولدا باشقىلار تەرىپىدىن بۇلاپ كەتتى...  ئوغلۇم ئەسلى ھايات قالاتتى،مەن... مەن...  ئوغلۇمغا، ئايالىمغا يۈز كېلەلمەيمەن ... - دېدى ئۆمەر.

  -  ھەقىقەتەن نەپرەتلىنىشكە تېگىشلىك ئىكەن،  بىراق، سىز بۇ يەرگە ئاران كەلدىڭىز، ئوغلىڭىزنى كۆرۈشنى ئويلاشمىدىڭىزمۇ؟ - دېدى   دىلنار. ئاۋازى بىلىنەر-بىلىنمەس تىترەپ چىقتى.

ئۆمەر يۈزىدىكى ياشنى سۈرتتى، پۈتۈن بەدىنى ئاستا-ئاستا تىنچلاندى.

دىلنار سۆزىنى داۋاملاشتۇرۇپ:

   -  ئاۋۇ يەردە پۇل بار، سىز ئۇنى ئېلىپ نەرسە-كېرەك سېتىۋالسىڭىز بولىدۇ، ئوغلىڭىز ھەقىچان ئۇششاق-چۈششەك يېمەكلىكلەرنى ناھايىتى ئاز يەيدۇ، سىز ئۇنىڭغا كۆپرەك ئېلىپ بېرىڭ، ئاندىن ئايالىڭىزغا بىر دەستە گۈل ئېلىۋېلىڭ... -  دېدى .

ئۆمەر بىردەم تۇرۇۋالغاندىن كېيىن، نەرسە ساقلاش ساندۇقىنى ئاچتى، ئىچىدە ھەقىقەتەن  چوڭ سوممىلىق  پۇلنىڭ بارلىقىنى بايقىدى.

بۇرۇلۇپ ئۇنىڭغا قاراپ:

   -   قانداق نەيرەڭ ئىشلەتمەكچىسىز؟  - دېدى.

دىلنار كۈلۈپ تۇرۇپ:

   -  ماڭا بىر بوتۇلكا سۇ ئالغاچ كېلىڭ...  مەن ھازىر سىزنىڭ يېنىڭىزدا قاپسىلىپ قالدىم، سىزنىڭچە  قانداق ھىيلە-مىكىر قىلالايمەن؟ - دېدى.

ئۆمەر بىردەم ئويلانغاندىن كېيىن، ئاخىرى ئىشىكنى ئېچىپ ماشىنىدىن چۈشتى، ئۇ تەبىئىيلا ئېھتىيات بىلەن ماشىنىنىڭ ئاچقۇچىنى  ئېلىپ ماڭدى.

دىلنار قوشۇمىسىنى تۈردى،  ئۇنىڭ يىراقلاپ كەتكەنلىكىنى جەزملەشتۈرگەندىن كېيىن،  دەرھال ئايىغىنى سېلىۋېتىپ، ئىككى پۇتى بىلەن ئۆمەر بايا بىر تەرەپكە تاشلىغان سومكىسىنى ئېلىپ، سىيرىتمىنى ئېچىپ، تېلېفوننى تاپتى.

يان تېلېفوننىڭ ئالاقىلىشىش خاتىرىسىدە ھەقىقەتەن كۆپ ئادەم يوق بولۇپ، سۆزلىشىش خاتىرىسىنىڭ بىرىنچىسى سەبىرە، ئىككىنچىسى ئەنسەر ئىدى.

بۇ چاغدا ئۇ سەبىرەنىڭ كېلىپ  ئۆزىنى قۇتقۇزۇشىنى ئۈمىد قىلمايدۇ، شۇڭا ئەنسەرنىڭ نومۇرىنى باستى.

تېلېفون بىردەم جىرىڭلىدى، بىر نەچچە سېكۇنت ئىچىدە دىلنارنىڭ پېشانىسىدىن بىر قەۋەت نېپىز تەر چىقىپ كەتتى.

يىراققا نەزەر سېلىپ، تاغ باغرىدىكى ماگىزىنغا قارىدى.

ھېلىمۇ ياخشى تېلېفون ئاخىرى ئۇلاندى:

- ئەنسەر، سىز ... - دېدى دىلنار.

  -  دىلنار ئاچا، ئەنسەر ئاكامنىڭ ئىشى چىقىپ قېلىپ چىقىپ كەتكەن، يان تېلېفون مېنىڭ يېنىمدا قاپتۇ... - دېدى سەبىرە. 

دىلنارنىڭ يۈرىكى تۇيۇقسىز جىغغىدە قىلىپ قالدى.

بەزى قالايمىقان خىياللار  كاللىسىدا پەيدا بولدى.

ئۇ سەبىرەنىڭ يېنىغا بېرىپ قايتىپ چىقىپ ئۇزۇن ئۆتمەي، ئەنسەر  دوختۇرخانىغا يېتىپ بېرىپتۇ.

گەرچە ئۇ ئەنسەرنىڭ سەبىرەنى ئەتىۋارلايدىغانلىقىنى ئاغزى-ئاغزىغا تەگمەي سۆزلەپ تۇرسىمۇ، لېكىن ھەر قېتىم مۇشۇنداق ئەمەلىي پاكىتقا دۇچ كەلگەندە، كۆڭلى يەنىلا يېرىم بولۇپ قالاتتى.

كۆڭلى يېرىم بولۇپ قالىدۇ دېگەندىن كۆرە، ئەنسەرگە يەنىلا كۆڭۈل بۆلىدىغانلىقىنى ئېتىراپ قىلىدۇ دېگەن تۈزۈك.

ئەمەلىيەت  ئاغزىدا دەپ قويغانغا قارىغاندا، ئەمەلىيەت ئۇنىڭغا ئېغىر زەربە بولدى.

  -  دىلنار ئاچا، بىرەر ئىشىڭىز بارمىدى؟ - دېدى سەبىرە.

دىلنارنىڭ گەپ قىلغۇسى كەلمەي قالدى، بۇنداق چاغدا ئەنسەرنى ئىزدەش خاتالىقتەك ھېس قىلدى.

لېكىن بۇ ۋاقىتتا، ئۇنىڭ يەنە ئىككىلىنىدىغان ۋاقتى يوق.

بۇنداق مۇھىم پەيتتە، ئۇ ئۆزىنىڭ ھاياتى بىلەن مۇھەببەت رەقىبىنىڭ قايسىسىنىڭ مۇھىملىقىنى تەبىئىي ھالدا ئېنىق ئايرىيالايدۇ.

  -  ئەنسەرچۇ؟  - دېدى دىلنار.

  - ھە... ئۇ بايىلا دوختۇرنى ئىزدەپ چىقىپ كەتتى، مېنىڭ ئەھۋالىمنى بىلىپ باقماقچىكەن، دىلنار ئاچا  بىرەر ئىشىڭىز بولسا مەن يەتكۈزۈپ قوياي.  - دېدى سەبىرە.

ئۇ يەتكۈزۈپ قويمامدۇ؟

ئۇنىڭدىن كۆرە  بىۋاسىتە جېنىنى سېلىپ بەرگىنى ياخشى.

  -  مېنىڭ ھازىر ناھايىتى مۇھىم ئىشىم بار، ئۇنىڭغا يان تېلېفوننى بېرىڭ، - دېدى دىلنار. 

- بىراق، ئۇ ھازىر كېسەلخانىدا ئەمەس  ... - دېدى سەبىرە.

  -    مېيىپ بولۇپ قالمىغانسىز؟ ! - دېدى دىلنار. 

ئۇنىڭ ھەقىقەتەن سەۋر-تاقىتى قالمىدى!

ھايات-ماماتلىق ئىشىدا ئىككىلىنىشكە بولمايدۇ،  ئۆزى شۇنچە يىل مەغرۇرلىنىپ ياشاپ، ئاخىرىدا بۇنداق ئۇۋالچىلىقتا كېتىپ قېلىشىنى ئويلاپمۇ باقمىغان ئىدى.

سەبىرە  دىلنارنىڭ بۇنداق غەزەپلەنگەن ئاۋازىنى كۆپ ئاڭلىمىغاچقا، خېلى ئۇزاققىچە ھاڭۋىقىپ تۇرۇپ قالدى.

بۇ چاغدا كېسەلخانىنىڭ ئىشىكى تۇيۇقسىز ئېچىلىپ، بىر جۈپ ئۇزۇن پۇتنىڭ  كېلىۋاتقانلىقىنى كۆرۈپ، سەبىرە ئىختىيارسىز تېلېفوننى قويۇۋەتتى.

ئەنسەرنىڭ ياردەمچىسى كىرگەن پېتى ئۇنىڭغا قاراپ:

   -  سەبىرە خانقىز، بىرەر ئىش بولدىمۇ؟ - دەپ سورىدى. 

سەبىرە تېلېفوننى تۇتۇپ تۇرغان قولىنى مىدىرلىماي يوتقاننىڭ ئىچىگە تىقىۋېتىپ:

-  ھېچ ئىش يوق. نېمە بولدى؟  - دېدى.

 ياردەمچى كېسەلخانىغا  بىر قۇر كۆز يۈگۈرتۈپ چىقتى،چىرايىدا گۇمان پەيدا بولۇپ:

- باياتىن سىزنىڭ گەپ قىلغىنىڭىزنى ئاڭلىدىم. - دېدى. 

- ھە، بايا بىر تېلېفون كەلدى. - دېدى سەبىرە.

ياردەمچى ئۇنىڭدىن گۇمانلانماي، بېشىنى لىڭشىتىپ چىقىپ كەتتى.

سەبىرە يان تېلېفونىنى يەنە بىر قېتىم چىقىرىپ، يان تېلېفوندىكى دىلنارنىڭ سۆزلىشىش خاتىرىسىگە قاراپ، بارماقلىرىنى ئىشقا سالدى، ئېكراندا سۆزلىشىش خاتىرىسىنى ئۆچۈرۈۋېتىش ياكى ئۆچۈرمەسلىك ئەسكەرتمىسى چىقتى.

ئۇ بايا زادى نېمە ئويلىغانلىقىنى ئۆزىمۇ بىلمەيتتى، لېكىن ئويلىمىسىمۇ بىلىدۇ، ئەگەر ئەنسەر  مۇشۇ ۋاقىتتا دىلنارنىڭ تېلېفونىنى قوبۇل قىلسا، چوقۇم دەرھال ئىزدەپ بارىدۇ.

گەرچە دىلنار ئاغزى - ئاغزىغا تەگمەي ئەمدى بولدى قىلىدىغانلىقىنى ئېيتقان بولسىمۇ، لېكىن ئىككىسى كۆرۈشۈپ قالسا، ئۇنداقتا ...

ئايرىلىپ كېتىشىمۇ ياكى داۋاملىق ئەپلىشىپ قېلىشىمۇ مۇمكىن.

چۈنكى ئەنسەر  ئاسانلىقچە دىلناردىن ۋاز كەچمەيدۇ.

ئۇلار ئەپلىشىپ قالسا، ئۇنىڭ ئەنسەر بىلەن ئازراقمۇ پۇرسىتى بولمايدۇ، شۇڭا دىلنارنىڭ ئەنسەرنىڭ يېنىدا داۋاملىق تۇرۇشىغا ھەرگىز يول قويسا بولمايدۇ...

ئەگەر ئۇلار ئايرىلىپ كەتىسىلا، ھېچقانداق ئىش بولمايدۇ.

بەلكىم ئۇ ئىلگىرى راستتىنلا خاتالاشقان بولسا كېرەك، پۈتۈن ۋۇجۇدى بىلەن ئەنسەرنىڭ بەختلىك بولۇشىنى ئويلاپ، ئۇنى ئېرىشمەكچى بولغان نەرسىگە ئېرىشتۈرۈشنىلا ئويلاپتۇ.

ئەمما ھازىر دىلنارنى ئەنسەرگە بەخت ئېلىپ كېلىدۇ دەپ قارىمىدى.

ئەگەر بۇ قېتىم ئەنسەر دىلنارنى ئىزدەپ بارمىسا، ئۇنىڭ ئاشۇ مىجەزى بىلەن، ئەنسەرگە  قايتا پۇرسەت بەرمەسلىكى مۇمكىن.

ئۇلار ئايرىلىپ كەتسە، بارلىق مەسىلىلەر ئەڭ ئاددىي، بىۋاسىتە ھەل قىلىش ئۇسۇلىدا پۈتۈنلەي ھەل بولىدۇ.

ئۇ نېمىشقا ئىشنى شۇنچە چوڭ دائىرىدە  ئايلاندۇرۇپ قىلىدۇ؟

دىلنار ئۈزۈلۈپ كەتكەن تېلېفونغا قاراپ، ھاڭۋىقىپ تۇرۇپ قالدى.

ئەكسىچە ئۇنىڭ چىرايىدا ئارتۇقچە ئىپادە يوق بولۇپ، سەبىرەنىڭ بۇ ھەرىكىتى ئۇنىڭغا نىسبەتەن ھەيران قالارلىق ئىش ئەمەس ئىدى.

مانا ئەمدى ئۇلارنىڭ ئوتتۇرىسىدىكى پەردەشاپ يىرتىلدى، پەسكەش ئادەم بولۇش سۈپىتى بىلەن، سەبىرەنىڭ بۇ كىچىككىنە ھەرىكىتىنىڭ ھەيران قالغۇچىلىكى يوق.

لېكىن شۇ تاپتا، ئەھۋال ۋە ۋاقىت ئۇنىڭ بۇ يەردە بۇ ئىشلار بىلەن ھېسابلىشىپ ئولتۇرۇشىغا يول قويمايدۇ.

ماشىنىنىڭ توختىلغان يۆنىلىش تاغ باغرىدىكى ماگىزىنغا قارىتىلغان، ئورنىمۇ ئانچە يىراق ئەمەس، ئەنسەر بىلەن  ئالاقىلىشالمىغاچقا،  باشقا ئادەم تاپماقچى بولدى.

ئەنسەر قايتىپ كەلگەندە، ياردەمچى ئۇنىڭغا دۈمبىسىنى قىلىپ كارىدورنىڭ بېشىدا تېلېفون سۆزلىشىۋاتاتتى.

كېسەلخانىغا كىرگەندە، سەبىرە  قولىدا سۇ ئىستاكانىنى تۇتۇپ يەردە تۇراتتى.

ئەنسەر يېنىغا كېلىپ، چاپىنىنى سېلىپ، يانفونىنى قولىغا ئېلىپ، ئېغىر ئاۋازدا :

  -   كارىۋاتتا ياتماي، نېمىشقا قالايمىقان مېڭىپ يۈرىسىز، - دېدى. 

سەبىرە ئۇنىڭ يانفونىنى يانچۇقىغا سالغانلىقىنى كۆرۈپ، ئىستاكاننى تۇتقان قولى ھەم چىڭىپ، ھەم سوۋۇدى.

چىرايىمۇ ئىختىيارسىز تاتىرىپ كەتتى.

  -   كارۋاتقا چىقىپ يېتىڭ، - دېدى ئەنسەر  ئۇنىڭغا تاپىلاپ قويدى-دە، ئارقىسىغا بۇرۇلۇپ كەتمەكچى بولدى.

- ئەنسەر ئاكا!  - ئۇنىڭ كېتىۋاتقانلىقىنى كۆرگەن سەبىرە دەرھال ئۇنى چاقىردى.

ئەنسەر قوشۇمىسىنى تۈرۈپ ئۇنىڭغا قاراپ:

   -  يەنە باشقا ئىش بارمۇ؟ - دەپ سورىدى.

سەبىرە بىردەم تۇرۇۋالغاندىن كېيىن:

   -  ھە...  دوختۇرنىڭ سىزگە نېمە دېگەنلىكىنى بىلگۈم بار.  - دېدى.

  -   ھېچ ئىش يوق، ھازىرقى سالامەتلىك ئەھۋالىڭىزدا بۇ بالىنى ئالدۇرۋېتىشىڭىز ھېچقانداق تەسىر كۆرسەتمەيدىكەن، - دېدى ئەنسەر. 

سەبىرە لېۋىنى چىشلەپ تۇرۇپ:

   -  ئەنسەر ئاكا، مەن...  بۇ بالىنى راستتىنلا تۇغسام بولمامدۇ؟ - دېدى.

 ئەنسەر قوشۇمىسىنى تۈردى.

سەبىرە ئۇنىڭغا ئىككى قەدەم يېقىنلىشىپ:

  -  سىزنىڭ بۇ بالىنى ئالدۇرۋېتىڭ دېيىشىڭىز سەۋەب ،  مەندىن قۇتۇلالماسلىقتىن ئەنسىرەمسىز، ياكى  سالامەتلىكىمنى ئويلاۋاتامسىز؟  - دېدى.

ئەنسەر كەينىگە بۇرۇلۇپلا، قاش-كۆزلىرى قىسىلىپ،  چىرايىدا ئازراقمۇ ھارارەت قالماي:

- سەبىرە، - دېدى.

 ـ بولدى،  بۇ گەپنى سورىمىغان بولاي،  بالىنى ئالدۇرۋەتمەيمەن! شۇنداقلا ياخشى ئارام ئالىمەن، كېسىلىمنى ئېغىرلاشتۇرۋالمايمەن، شۇنداق بولغاندا، تۇغقۇچە چاتاق چىقمايدۇ دەپ ئويلايمەن. 

ئەگەر بۇنىڭدىن كېيىن سىز  يېنىمدا بولمىسىڭىز، ماڭا ھەمراھ بولىدىغانغا ئۇ بار! ئۇ مېنىڭ بالام، مېنىڭ بۇ دۇنيادىكى بىردىنبىر تۇغقىنىم، بىردىنبىر مېنى تاشلىۋەتمەيدىغان تۇغقىنىم.  - دېدى.

ئەنسەر چىرايىنى پۈرۈشتۈرۈپ ئۇنىڭ قورسىقىغا قاراپ:

   -  ئۇ بىردىنبىر  تۇغىنىڭىز ئەمەس، پەقەت سىز ساغلام ياشىسىڭىزلا، ھەر قانداق مۇمكىنچىلىك بار... - دېدى. 

  -  سىزنىڭ مېنى ياخشى كۆرۈپ قېلىشىڭىزنىمۇ ئۆز ئىچىگە ئالامدۇ؟ - دېدى سەبىرە.  

ئەنسەرنىڭ چىرايى بىردىنلا يەنە ئۆڭۈپ:

- سەبىرە، - دېدى.

  -  ئەنسەر دىرېكتور! -  كېسەلخانىنىڭ ئىشىكى تۇيۇقسىز ئېچىلدى، ياردەمچى قولىدا يان تېلېفوننى تۇتۇپ، ئىشىكتىن تېز سۈرئەتتە كىردى، ئۇنىڭ  بۇرۇنقى تەمكىن ھالىتى قالمىغانىدى.

ئەنسەر ئۆزىنىڭ يېنىدىكى ياردەمچىسىنىڭ بۇنداق ئۆزىنى تۇتۇۋالماي، ئەنسىزلىككە كۆچۈپ  قالغانلىقىنى كۆرۈپ باقمىغان.

شۇڭا ئېغىر ئاۋازدا:

   -  نېمە ئىش بولدى؟ - دەپ سورىدى.

ياردەمچى سەبىرەنىڭ سەل ھودۇقۇپ كەتكەن چىرايىنى كۆرۈشكە ئۈلگۈرەلمەي:

   -  بايا دىلنار خانقىزنىڭ تېلېفونىنى تاپشۇرۇۋالدىم، ئۇنىڭغا بىرەر ئىش بولغاندەك قىلىدۇ... - دېدى. 

ئەنسەرنىڭ چىرايى بىردىنلا تۇتۇلۇپ، ئاۋازى تېخىمۇ سوۋۇپ:

- نېمە ئىش بوپتۇ؟ - دەپ سورىدى. 

ياردەمچى ئالدىراپ-تېنەپ:

   -  ئۇ كۆپ گەپ قىلىشقا ئۈلگۈرەلمىدى، پەقەت ماڭا ئۆزىنىڭ ھازىر غەربىي شەھەر ئەتراپىدىكى قەبرىستانلىقتا ئىكەنلىكىنى، سىز بىلەن ئالاقىلىشالمىغانلىقىنى ئېيتتى، بۇ ئۇچۇرنى سىزگە دەرھال يەتكۈزۈپ قويۇشنى تاپىلىدى، - دېدى.

ئۇنىڭ گېپى تۈگىمەيلا، سەبىرەنىڭ قولىدىكى ئەينەك ئىستاكان يەرگە چۈشۈپ چېقىلىپ كەتتى.

ئەنسەر چىرايىنى پۈرۈشتۈرۈپ يانفونىنى چىقىرىپ، ئالاقىلىشىش خاتىرىسىگە قارىدى، لېكىن دىلنارنىڭ  بۈگۈن  قىلغان تېلېفون نومۇرى يوق ئىدى.