تۇيۇقسىز كەلگەن مۇھەببەت 86-قىسىم_ئوغۇل دوستۇم

86 - قىسىم  ئوغۇل دوستۇم

نادىرنىڭ پىراۋىسى تۇتۇپ قىلىنغاندىن كېيىن مۇنىرە نادىرنى ئاپىرىپ قوياتتى، بىر بىناغا كۆچۈپ كىرگەندىن بۇيان، نادىر مۇنىرەنى ئاپىرىپ قويىدىغانغا ئايلىنىپ قالدى.

لىفىت بىلەن چۈشسىلا بولىدىغان ئىشتىن ئەسلىدە ھېچقانداق چاتاق چىقمايتتى، پەقەت ئىككىسى قىزغىن مۇھەببەتلىشىۋاتقان بولغاچقا، بىر-بىرى بىلەن ئىككى مىنۇت بولسىمۇ بىللە تۇرغۇسى كېلىپ، بىر-بىرىگە قىيمايۋاتاتتى.

- ئەتە ئەتىگەن ئون مىنۇت بۇرۇن كېلىپ ناشتا قىلىڭ، - دېدى نادىر. 

مۇنىرە ئىككى بارمىقىنى چىقىرىپ:

  - بولىدۇ.  - دېدى.

 نادىر ئۇنىڭ چېچىنىڭ ئۇچىنى سىلاپ قويۇپ، كەينىگە بۇرۇلدى.

مۇنىرە كۈلكىسىنى يىغىشتۇرغاندىن كېيىن،  يۈزىنى سىلاپ، ئۆزىنىڭ يېقىندىن بۇيان بارغانسېرى گۆدەكلىشىپ كېتىۋاتقانلىقىنى، بەزىدە گەپ قىلغاندىكى تەلەپپۇزىمۇ سوزۇلۇپ، ئەقلىي ئاجىز ئادەمدەك قىلىقلارنى قىلغاندەك ھېس قىلدى. بۇنداق قىلسا بولمايدۇ، كونترول قىلىشى كېرەك، كونترول قىلمىسا بولماپتۇ.

ئىشىكنى ئېچىپ كىرگىنىدە، مېھمانخانىنىڭ كەيپىياتى بىر ئاز بۇرۇقتۇرما بولۇپ، ئىس-تۈتەكنىڭ سۇس پۇرىقى كېلىپ تۇراتتى.

ئالىيە  تاماق ئۈستىلىنىڭ يېنىدا ئېغىر-بېسىقلىق بىلەن تۇراتتى، ئۇنىڭ ئوغۇل دوستى بولسا ئىككى پۇتىنى ئالماپ ساپادا زېرىكىشلىك قىياپەتتە ئولتۇراتتى.

ئۇنىڭ كىرگىنىنى كۆرۈپ، يىگىت ئادەتتىكىگە ئوخشاش ئالىقىنىنى كۆتۈرۈپ ھاي دەپ قويدى، ئەمما ئالىيە ياتاقدىشىغا قولايسىزلىق كەلتۈرگەنلىكىدىن ئوڭايسىزلىنىپ قالدى.

ئۇمۇ مۇنىرەگە سالام قىلدى، ئاندىن يىگىتىگە قاراپ:

- يوقىلىڭ، يوقىلىڭ! - دېدى. 

ئەر ئىغاڭلاپ ماڭدى، مۇنىرە ئۇنىڭغا بىر قاراپ قويدى، ھەمىشە بۇ ئەر كېيىنكى سېكۇنتتا نېمىلەرنىدۇر دەيدىغاندەك بىلىنەتتى، بۇ قېتىملىق ھىجىيىپ تۇرۇپ:

  - ئۆتكەن شەنبە كۈنىدىكىدەك يوقىلامدىم؟ ئاندىن  ئىككىمىز يەنە سافانىڭ ئۈستىدە  بەدەن چىنىقتۇرامدۇق؟ - دېگەنلىكىنى ئاڭلىدى.

تازىمۇبىر...  مۇنىرە  ئالدىنقى قېتىم كۆرۈپ قالغان تولىمۇ بىئەپ ھالەتنى ئېسىگە ئېلىپ  ھېچنېمىنى ئاڭلىمىغان، ھېچنېمىنى كۆرمىگەن قىياپەتتە، ئۆيگە كىرىپ ئىشىكنى گۈپ يېيىپ، ئىچىدىن تەتۈر قۇلۇپلاپ قويدى.

روشەنكى، ئۇنىڭ ياتاقدىشى داشقال ئەرگە ئۇچراپ قاپتۇ، گەرچە قايسىسىنىڭ توغرا، قايسىسىنىڭ خاتا ئىكەنلىكى تېخى ئېنىق بولمىسىمۇ، لېكىن ئۇ ئەرنىڭ بىر يات ئادەمنىڭ ئالدىدا بۇنداق گەپ قىلىشى  <داشقال> لىقتىن باشقا نەرسە ئەمەس.

 - ۋۇي ھايۋان، كۆزۈمدىن يوقال ...

ۋارقىرىغان ئاۋاز ئىشىك يېپىق بولسىمۇ ئېنىق ئاڭلاندى.  مۇنىرە كۆزىنى يۇمۇپ، ئېغىر ئۇھ تارتتى.

گەرچە ئۇ ئوتتۇرىغا چىقىپ،  داشقال ئەرنى ئەدەپلەپ قويۇشنى ئويلىغان بولسىمۇ، لېكىن  ئاشىق-مەشۇقلارنىڭ ئىشىغا قول تىقسا بولمايتتى.

ئۇ ئۈستەلنىڭ بۇلۇڭىغا قويۇپ قويغان ئىنگلىزچە ماتېرىيالنى ئېچىپ، تۈنۈگۈن كۆرگەن قىسمىنى ئېچىپ قايتا كۆرۈپ چىقتى، ئاندىن قەلەمنى ئېلىپ داۋاملىق ئۆگەندى. ئىنگلىز تىلىنى قايتىدىن ئۆگىنىش يېقىندا پەيدا بولغان ئويى،  ئالىي مەكتەپتىكى ۋاقتىدا ئاران تەستە 6-دەرىجىدىن ئۆتكەن، ئۇنچىلىك سەۋىيەسىنى خىزمەت قىلغاندىن كېيىن مۇئەللىمگە قايتۇرۇپ بېرىپ بولدى، شۇڭا يەنە ئاڭلاش، سۆزلەش، ئوقۇش، يېزىشتىن باشلىدى.

ئەسلىدە بۇ بىر يۈرۈش ماتېرىيالنىڭ ئاۋازلىق ئوقۇپ بەرگەن قىسمى بار ئىدى، بىراق مۇنىرە ئالىيەگە بىرەر ئىش بولۇپ قېلىشىدىن ئەنسىرەپ، تىڭشىغۇچنى تاقىماي كىتاب كۆرگەچ سىرتتىكى شەپىگە دىققەت قىلدى.

ئىككىيلەن قاتتىق سوقۇشۇپ كەتتى، يىگىتنىڭ ئاغزىدىكى گەپلەرمۇ بارغانسېرى بىزەپلەشتى.

مۇنىرەنىڭ دىققىتىمۇ چېچىلدى،  كېيىن نادىر بىلەنمۇ سوقۇشۇپ قالارمەنمۇ دەپ ئويلاپ تۇرغاندا، جېدەل  كۈچىيىپ يەر-جاھاننى زىلزىلىگە سېلىپ، دېمىگەن گېپى ئاز قېلىشتى. كاللىسىدىكى پەسكەش ئادەم ئۇنىڭ يوشۇرۇن ئېڭىدا ئۆزلۈكىدىن ئىككىگە ئايلىنىپ، زىددىيەتلىشىپ قالدى،

ئۇ ئۆزى: [رەھىمسىز،  يولسىزلىق قىلىپ جېدەل چىقاردىڭىز، مەن سىزدىن بەك  تويدۇم!...  تېز يوقىلىڭ، تېز يوقىلىڭ، ئايرىلىپ كېتەيلى! ....  گېپىمنى ئاڭلىمىدىڭىزمۇ؟  نېمىشقا زۇۋان سۈرمەيسىز! ... ] دېدى.

نادىر: [سىزگە ۋاقىت بېرىۋاتىمەن ] - دېدى.

ئۇ ئۆزى:  [نېمە قىلىۋاتىسىز؟ ! ] - دېدى.

نادىر: [سىزنىڭ ھوشىڭىزغا كېلىشىڭىزگە ۋە دېگەنلىرىڭىزنى قايتۇرۇۋېلىشىڭىزغا يېتەرلىك ۋاقىت بېرىمەن.] - دېدى.

مۇنىرە يۈزىنى ئېتىۋالدى، ۋاي ئانامەي ... نېمىلەرنى ئويلاپ كەتتى . كىيىنكى ئىشلار كېيىنگە قالسۇن.

تۇيۇقسىز ئۇنىڭ ياتىقىنىڭ ئىشىكى تىترەپ كەتتى، مۇنىرە ئېسىگە كېلىپ، ئىتتىك كەينىگە بۇرۇلدى.

شۇنداق ئۇلار مۇنىرەدىن ئەيمىنىپمۇ قويمىدى.ئاڭلىيالماي قالمىسۇن دېگەندەك ئىشىكى ئالدىدا ئادەمگە يات ئىشلارنى قىلدى.

بىچارە مۇنىرەنى بىر كېچە قارا بېسىپ چىقتى  .

چۈشىدە ياندۇرۋەتكىلى تاس قالدى.

مۇنىرە ئەتىگەندە ئۆيدىن چىققاندا مېھمانخانا يەنىلا قالايمىقان ئىدى،ئىككىسى  سافانىڭ ئالدىدىكى گىلەمدە لايدەك ئېزىلىپ ئۇخلاپ قاپتۇ.

ئۇ سىرتقا چىقىشتا پۇتىنىڭ ئۇچىدا دەسسەپ، يەر  بىلەن ئۇچرىشىش يۈزىنى ئىمكانقەدەر ئازايتتى.

بۇنداق كۆڭلى ئېلەشتۈرىدىغان كۆرۈنۈش ئۇنىڭ ئىشتىھاسىغا بىۋاسىتە تەسىر كۆرسەتتى، مۇنىرە ئەسلىدە تۆت تال مانتا، يەنە بىر ئىستاكان يېڭى سىقىلغان پۇرچاق سۈتى ياكى بىر كىچىك قاچا ئۇماچ يېيەلەيتتى، بۈگۈن پەقەت يېرىمىنى يەپلا يېگۈسى كەلمىدى.

نادىر ئۇنىڭ كۆز ئەتراپىنىڭ قارىداپ كەتكەنلىكىنى كۆرۈپ:

  - ئاخشام ياخشى ئۇخلىيالمىدىڭىزمۇ؟ - سورىدى.

 - مەن ئەزەلدىن بۇنداق يۈزى قېلىن ئادەمنى كۆرۈپ باقمىغان. - دېدى مۇنىرە روھسىز ھالدا كىچىك قاسقان مانتىسىنى چوكىسى بىلەن نادىرغا ئىتتىرىپ بېرىپ، -  نادىر ئەپەندى، يەمسىز؟ يېمىسىڭىز  كەچتە ئىسسىتىپ يەي.  - دېدى.

نادىر مانتىنى قولىغا ئېلىپ، بېشىنى تۆۋەن سېلىپ يەۋېتىپ:

 - قايسى يۈزى قېلىن ئادەم؟ - دەپ سورىدى. 

 ـ  ھىم، - دېدى  مۇنىرە بېشىنى لىڭشىتىپ، - ياتاقدىشىم بىلەن ئۇنىڭ ئوغۇل دوستى مېھمانخانىدا  ... - دەپ توختاپ قالدى.

 خىجىل بولۇپ دېيەلمەي، يۈزلىرى قىزارغان ھالدا ۋىلكىنى بىلىكىگە ئۇرۇپ:

  - ھېلىقى...  مەن تۇرۇۋاتقان ئۆينىڭ ئاۋاز توسۇش ئۈنۈمى ئانچە ياخشى ئەمەس. - دېدى .

 نادىر قاپىقىنى تۈرۈپ:

  - ئۇ يەردە تۇرماي، ئۆيگە قايتىپ كېلىڭ، -  دېدى. 

 - بىراق ئۆينىڭ ئىجارە  ۋاقتى تېخى توشمىدى. - دېدى مۇنىرە  پۇلغا ئىچى ئاغرىپ، -  ئاران ئۈچ ئاي بولدى. - دېدى. 

- سىز يەنە مۇشۇنداق مۇھىتتا  تالىشىپ تۇرماقچىمۇ؟ - دېدى نادىر. 

 مۇنىرە  تۇرۇسقا قاراپ:

  - خىزمەت قىلغاندىمۇ دەم ئالىدىغان كۈن بولىدىغۇ، ئۇلارمۇ ئارام ئېلىپ قېلىشى مۇمكىن.  - دېدى.

نادىر سوغۇق كۈلۈپ قويۇپ:

- ھەقىقەتەن كىشىنى قايىل قىلىدىغان ئىرادىسى باركەن، - دېدى. 

 ـ  ھى ھى ھى ھى بەك ماختىۋەتتىڭىز.  - دېدى مۇنىرە مەسخىرىلەرنى ئاڭلىمىغان قىياپەتكە كىرىۋالدى، ئۇنى كۆچۈرۈپ چىقىرىش ھەرگىز مۇمكىن ئەمەس. ئۇ نېمىلا دېگەن بىلەن پۇل تاپشۇرغان، ياتاقدىشىنىڭ شەخسى ئىشى ئۈچۈن ھوقۇقىدىن ۋاز كەچسە بولمايدۇ.