【ལམ་སྟོན་བཀའ་སློབ།】
ཆོས་བྱེད་དགོས་པའི་རྒྱུ་མཚན།
དེ་ལ་འགྲོ་བ་ཐམས་ཅད་བདེ་བ་འདོད་པ་དང༌། སྡུག་བསྔལ་མི་འདོད་པ་མཉམ་ཞིང༌། དེ་ཡང་རང་རེ་ཤེས་རིག་བཀྲ་བའི་མི་ཙམ་མ་ཟད། བླུན་ཞིང་གཏི་མུག་པ་ཐ་ན་སྲོག་ཆགས་འབུ་སྲིན་ཕྲ་མོ་ཡན་ཆད་ཀྱང་བདེ་བ་ཞིག་འདོད་པ་དང༌། སྡུག་བསྔལ་ཕྲ་མོ་ཡང་མི་འདོད་པ་ཤ་སྟག་ཡིན། དེས་ན་རང་གཞན་སུ་ཡིན་ཡང་བདེ་བ་འབྱུང་བ་དང༌། སྡུག་བསྔལ་མི་འབྱུང་བའི་ཐབས་ཤིག་བྱ་དགོས། དེ་མིན་རང་ལ་བདེ་བ་ཞིག་བྱུང་ན་སྙམ་པ་དང༌། སྡུག་བསྔལ་དེ་མེད་ན་ཅི་མ་རུང་སྙམ་པའི་རེ་འདོད་ཆེན་པོས་སྒུག་ནས་བསྡད་པ་ཙམ་གྱིས་བདེ་བ་འབྱུང་བ་དང༌། སྡུག་བསྔལ་སེལ་མི་ནུས་པས། བདེ་བ་གང་ལས་འབྱུང་བའི་རྒྱུ་སྒྲུབ་པ་དང༌། སྡུག་བསྔལ་འབྱུང་བའི་གཞི་སྤོང་ནུས་པ་ཞིག་དགོས།
ཕན་པ་བདེ་བའི་རྒྱུ་སྒྲུབ་བྱེད་དང༌། གནོད་པ་སྡུག་བསྔལ་སྤོང་བའི་ཐབས་ནི་ཆོས་ལ་བརྟེན་ནས་བསྒྲུབས་པ་དང་འདྲ་བ་ཐབས་ཚུལ་གཞན་ཇི་ལྟར་བྱས་ཀྱང་ཡང་དག་པ་དང༌། མཐར་ཕྱིན་པ་སྒྲུབ་མི་ནུས། ཆོས་ཀྱི་སྟེང་ནས་ཚེ་འདི་དང༌། སྐྱེ་བ་ཕྱི་མ། དེའི་ཡང་ཕྱི་མ་སོགས་འདི་ཕྱི་ཚེ་རབས་མང་པོའི་བདེ་བ་སྐྱེད་ཐུབ་ཅིང༌། སྡུག་བསྔལ་སེལ་ནུས། ཚེ་འདི་ལ་མཚོན་ནའང་བདེ་བ་སྐྱེད་པ་དང༌། སྡུག་བསྔལ་སྤོང་བ་ལ་ཆོས་ལས་ལྷག་པར་མེད་པ་ནི། དཔེར་ན་ལུས་ལ་ན་ཚ་ཞིག་བྱུང་ན་ཡང༌། ཆོས་ཀྱི་གནད་དོན་རྟོགས་པ་དང་མ་རྟོགས་པ་གཉིས་ལ་ལུས་སེམས་ཀྱི་སྡུག་བསྔལ་ཆེ་ཆུང་དང་དེ་སེལ་ནུས་མིན་གྱི་ཁྱད་པར་ཤིན་ཏུ་ཆེ་སྟེ། ཆོས་ཀྱི་གནད་མ་རྟོགས་པ་དང༌། ཆོས་ཀྱི་བྱིན་རླབས་ཀྱི་རྩི་གང་ཡང་མེད་པའི་མི་དེར་ལུས་ཀྱི་ནད་ཀྱི་ཚོར་བ་དྲག་པོའི་སྟེང་དུ་སེམས་ལ་ནད་དེ་མི་བཟོད་པའི་སྡུག་བསྔལ་ཆེན་པོ་ཞིག་གིས་ནོན་ནས་ལུས་སེམས་གཉིས་ཀ་བདེ་བའི་གོ་སྐབས་མེད་པར་སྡུག་བསྔལ་གྱིས་མནར་བ་རེད།
ཆོས་ཀྱི་གནད་དོན་རྟོགས་པ་ཞིག་ཡིན་ན། ལུས་ལ་ན་ཚ་བྱུང་བ་དེ། སྔོན་བསགས་སྡིག་པའི་འབྲས་བུ་ཡིན་པ་དང༌། འཁོར་བའི་རང་བཞིན་དུ་མཐོང་ནས་ལས་བདག་གིར་བྱ་འདོད་ཀྱི་བསམ་པ་སོགས་ལ་བརྟེན་ནས་སྡུག་བསྔལ་དང་དུ་བླངས་པས་ཡིད་ཀྱི་སྡུག་བསྔལ་མི་འབྱུང༌། དེ་མི་བྱུང་བས་ཕྱི་ལུས་ཀྱི་ནད་ཀྱི་སྡུག་བསྔལ་དེ་ནང་བསམ་པའི་སྟོབས་ཀྱིས་ཟིལ་གྱིས་མནན་ནས་སྡུག་བསྔལ་སེལ་ནུས་པ་འབྱུང༌། དེའི་རྒྱུ་མཚན་ལུས་སེམས་གཉིས་ཀྱི་ནང་ནས། སེམས་དེ་ལུས་ལ་དབང་སྒྱུར་བའི་གཙོ་བོ་ལྟ་བུ་དང༌། ལུས་དེ་སེམས་ཀྱི་དབང་བསྒྱུར་བྱ་ལྟ་བུར་གནས་པས་བདེ་སྡུག་གི་ཚོར་བ་སེམས་ཀྱི་དེ་མཐུ་ཆེ་བ་ཡིན།
དེ་བཞིན་དུ། འགའ་ཞིག༌གིས་ཕྱུག་པོའི༌བདེ་སྐྱིད་ཅིག་འདོད་ནས་རྒྱུ་ནོར་གསོག་སྲུང་བྱེད་ཀྱང༌། ཐོག་མར་ལུས་སེམས་ཀྱི་ངལ་བ་ཆེན་པོས་འབད་རུང་རེ་འདོད་ལྟར་བསག་མི་ནུས་པའི་སྡུག་བསྔལ། བར་དུ་གཞན་གྱིས་འཕྲོག་པ་དང༌། བོར་སྟོར་འབྱུང་བ་དང༌། ཆུད་ཟོས་སུ་འགྲོ་བ་སོགས་ཀྱིས་བསྲུང་མི་ནུས་པའི་སྡུག་བསྔལ།ཐ་མར་ཇི་ལྟར་བྱས་ཀྱང་གཞན་གྱི་རྫས་སུ་གྱུར་ནས་རང་ཉིད་གཏན་འབྲལ་བྱེད་དགོས་པའི་སྡུག་བསྔལ་སོགས་ནོར་ལོངས་སྤྱོད་ལ་བརྟེན་པའི་སྡུག་བསྔལ་མཐའ་དག་ཀྱང་ཆོས་ཀྱི་གནད་དོན་མ་རྟོགས་པས་ལན། དེ་རྟོགས་ན་རྒྱུ་ནོར་མཐའ་དག་རྩྭ་རྩེའི་ཟིལ་པ་ལྟར་སྙིང་པོ་མེད་པར་མཐོང་ནས་ངལ་བ་བརྒྱ་ཕྲག་གིས་གསོག་སྲུང་དང༌། མི་འདོད་བཞིན་དུ་བྲལ་བ་བརྟེན་པའི་སྡུག་བསྔལ་གང་ཡང་མི་འབྱུང།
དེ་བཞིན་དུ། རང་ལ་གཞན་གྱིས་འཕྱ་སྨོད་དང༌། སྤྱོ་ཞིང་གཤེ་བ་སོགས་ཀྱི་ཚིག་མི་སྙན་པ་སྨྲས་ཚེ་སྙིང་ལ་ཚེར་མ་ཟུག་པ་ལྟར་མི་བཟོད་པའི་སྡུག་བསྔལ་འབྱུང་བ་ཡང༌། ཆོས་ཀྱི་གནད་དོན་རྟོགས་ན་དེ་ཐམས་ཅད་བྲག་ཅ་བཞིན་དུ་སྙིང་པོ་མེད་པའི་རང་བཞིན་ཤེས་ནས་སེམས་མེད་བེམ་པོ་ལ་འཕྱ་བ་སོགས་བྱེད་པ་ལྟར་ཡིད་མི་བདེ་བའི་སྡུག་བསྔལ་ཕྲ་མོའང་མི་འབྱུང་ཞིང༌། དེ་མཚུངས་ཚེ་འདིར་དགྲ་མི་ཐུལ་བའི་སྡུག་བསྔལ། གཉེན་མི་འཁྱོང་བའི་སྡུག་བསྔལ། གཞན་རྒྱལ་ཞིང་རང་ཕམ་པའི་སྡུག་བསྔལ་སོགས་མདོར་ན། རྙེད་དང་མ་རྙེད། བདེ་དང་མི་བདེ་སོགས་ལ་བརྟེན་པའི་རེ་དོགས་དང་ལུས་སེམས་ཀྱི་གདུང་བ་ཅི་མཆིས་དང༌། དེར་མ་ཟད་རྒྱལ་ཁབ་ཕན་ཚུན་འཁོན་རྩོད་ཀྱིས་འཇིགས་དངངས་ཅན་གྱི ་དམག་འཁྲུག་བྱུང་སྟེེ་སྐྱེ་འགྲོ་གྲངས་མེད་ཀྱི་བདེ་སྐྱིད་མིང་གི་ལྷག་མར་བཅོམ་ནས་སྡུག་བསྔལ་ཆུ་ལྟར་འཁྲུགས་པ་སོགས་མདོར་ན་ཚེ་འདིར་སྡུག་བསྔལ་ཆེ་ཆུང་གང་བྱུང་བ་དེ་དག་ཀྱང་ཆོག་མ་ཤེས་པ་དང༌། ཤེས་ཀྱང་ལག་ལེན་དུ་མ་བསྟར་བའི་སྐྱོན་ཡིན།
ཆོས་ཤེས་ཤིང་བསྒྲུབས་ན་སྡུག་བསྔལ་དེ་ཐམས་ཅད་ཀྱི་རྒྱུན་གཅོད་ནུས། ཇི་ལྟར་ནུས་ན་དེ་འདྲའི་སྡུག་བསྔལ་ཐམས་ཅད་ང་རྒྱལ་དང། སེར་སྣ། ཕྲག་དོག་དང༌། ཆགས་སྡང་རྨོངས་གསུམ་སོགས་ལ་བརྟེན་ནས་བྱུང་བ་འབའ་ཞིག་ཡིན་ཞིང༌། ཆོས་ཀྱི་མཐུས་གཙོ་བོ་སེམས་ཀྱི་སྐྱོན་དེ་རྣམས་ཞི་ཞིང་བཟློག་པ་ལ་བརྟེན་ནས། ཆོག་ཤེས་པ་དང༌། ངོ་ཚ་ཤེས་པ་དང༌། ཁྲེལ་ཡོད་པ། བག་ཡོད་པའི་བྱ་བ་བསྒྲུབས་ཏེ་ལུས་སེམས་རྟག་ཏུ་ཞི་འཇམ་བདེ་བ་འབའ་ཞིག་གིས་འདའ་བ་ལས་གདུང་བ་མི་བཟོད་པ་མི་འབྱུང་བས་ཚེ་འདིར་བདེ་ཞིང་སྐྱིད་པར་འདོད་ཅིང་སྡུག་བསྔལ་མི་འདོད་ན་ཡང་ཆོས་ཀྱི་གནད་དོན་རྟོགས་པར་བྱས་ནས་ལག་ལེན་དུ་བསྟར་བ་ཉིད་གལ་ཆེ།
