ཟླ་12ཚེས་27ཉིན། བོད་ལྗོངས་ཟློས་གར་མཐུན་ཚོགས་ཀྱིས“ཀྲུང་གོའི་ལོ་ཆུང་བྱིས་པའི་ཟློས་གར་དཔྱིད་འགོའི་མེ་ཏོག་ཆུང་ངུའི”བྱེད་སྒོ་སྐབས་ཉེར་བརྒྱད་པའི་བྱ་དགའ་ཐོབ་པའི་བརྩམས་ཆོས་ལ་བྱ་དགའ་སྤྲོད་པའི་བཞུགས་མོལ་ཚོགས་འདུ་འཚོགས་ནས། བོད་རང་སྐྱོང་ལྗོངས་མང་ཚོགས་སྒྱུ་རྩལ་ཁང(ལྗོངས་མངོན་མིན་རིག་གནས་ཤུལ་བཞག་སྲུང་སྐྱོང་ལྟེ་གནས)གི་སློབ་གཉེར་བ་བཀྲ་ཤིས་རྡོ་རྗེ(ལྷ་ས་གྲོང་ཁྱེར་ཁྲེང་ཀོན་ཆུས་སློབ་འབྲིང་བརྒྱད་པའི་སློབ་མ)དང་བློ་བཟང་རྣམ་རྒྱལ(ལྷ་ས་གྲོང་ཁྱེར་པེ་ཅིང་ཚོད་ལྟའི་སློབ་འབྲིང་གི་སློབ་མ)ལ་ཀྲུང་གོའི་ཟློས་གར་མཐུན་ཚོགས་ཀྱིས་གནང་བའི“དཔྱིད་འགོའི་མེ་ཏོག་ཆུང་ངུའི”གཟི་བརྗིད་མཚན་སྙན་གྱི་ལག་ཁྱེར་སྤྲད་པ་རེད།
ཤེས་རྟོགས་བྱུང་བར་གཞིགས་ན། “ཀྲུང་གོའི་ལོ་ཆུང་བྱིས་པའི་ཟློས་གར་དཔྱིད་འགོའི་མེ་ཏོག་ཆུང་ངུའི”བྱེད་སྒོ་སྐབས་ཉེར་བརྒྱད་པའི་ཁྲོད་བཀྲ་ཤིས་རྡོ་རྗེ་དང་བློ་བཟང་རྣམ་རྒྱལ་གྱིས་གཙོ་འཁྲབ་བྱས་པའི་ལྷ་མོ《གཅུང་པོ་དོན་ཡོད་དོན་གྲུབ·སྤུན་ཟླའི་བརྩེ་སེམས་ཟབ་མོ》ཞེས་པ་དེ་ལེ་ཚན་102ནང་ནས་འབུར་དུ་ཐོན་ཏེ་མི་སྒེར་གྱི་རྣམ་གྲངས་ཀྱི་ལས་ཞོར་ཚོགས་ཆུང་གི“དཔྱིད་འགོའི་མེ་ཏོག་ཆུང་ངུའི”གཟི་བརྗིད་མཚན་སྙན་ཐོབ་སྟེ། བོད་ཀྱི་ཟློས་གར་བྱ་གཞག་ལ་སླར་ཡང་གཟི་བརྗིད་མཚན་སྙན་གསར་པ་ཞིག་བསྣན་ཡོད།
གཞན་ཡང་། སྟོད་ལུང་བདེ་ཆེན་ཆུས་གཞོན་ནུ་ལོ་ཆུང་བྱེད་སྒོ་ལྟེ་གནས་ཀྱིས་འཁྲབ་སྟོན་བྱས་པའི་ལྷ་མོ《སྣང་ས་འོད་འབུམ·བཙན་གྱིས་གཉེན་སྒྲིག》ཅེས་པའི་ལེ་ཚན་ཡང་མཉམ་སྡེབ་རྣམ་གྲངས་80ཡི་ནང་ནས་འབུར་དུ་ཐོན་ཏེ“ཀྲུང་གོའི་ལོ་ཆུང་བྱིས་པའི་ཟློས་གར་དཔྱིད་འགོའི་མེ་ཏོག་ཆུང་ངུའི”བྱེད་སྒོ་སྐབས་ཉེར་བརྒྱད་པའི“དཔྱིད་འགོའི་མེ་ཏོག་ཆུང་ངུའི་ཕུལ་བྱུང་མཉམ་སྡེབ་ལེ་ཚན་གྱི་བྱ་དགའ”ཐོབ་ཡོད།
གྲུབ་འབྲས་བཟང་པོ་འདི་འདྲ་ཐོབ་པར་བརྟེན་བོད་རང་སྐྱོང་ལྗོངས་ཟློས་གར་མཐུན་ཚོགས་ལའང“ཀྲུང་གོའི་ལོ་ཆུང་བྱིས་པའི་ཟློས་གར་དཔྱིད་འགོའི་མེ་ཏོག་ཆུང་ངུའི”བྱེད་སྒོ་སྐབས་ཉེར་བརྒྱད་པའི་“ཕུལ་བྱུང་རྩ་འཛུགས་བྱ་དགའ”ཐོབ་པ་རེད།
