2025ལོའི་ཟླ་1ཚེས་1ཉིན་གྱི་ཆུ་ཚོད་15དང་སྐར་མ་4ལ། ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་ལྷ་ནག་མྱུར་བགྲོད་གཞུང་ལམ་རུ་ཆེན་གྱིས་རྒྱུན་གཏན་གྱི་སྐོར་གཡེང་བྱེད་སྐབས། G6ཅིང་བོད་མྱུར་བགྲོད་གཞུང་ལམ་གྱི་སྤྱི་ལེ་3793དང་སྨི་500ཡི་སར། ཟོག་འདྲེན་རླངས་འཁོར་ཞིག་མྱུར་བགྲོད་གཞུང་ལམ་ཐོག་རྒྱབ་བཤིག་བརྒྱབ་ནས་ཡོང་བ་མཐོང་བས། ཉེན་རྟོག་པས་འཕྲལ་དུ་ཉེན་བརྡ་བཏང་སྟེ་རླངས་འཁོར་དེ་ཁ་བཀག་ནས་བདེ་འཇགས་ཁུལ་དུ་ཁྲིད་པ་རེད།
བརྟག་དཔྱད་བྱས་པ་བརྒྱུད། ཁ་ལོ་བ་དེ་སེམས་གཡེང་ནས་ཐོན་སྒོ་ཡོལ་བས་དུས་ཚོད་གྲོན་ཆུང་བྱ་ཆེད་རླངས་འཁོར་རྒྱབ་བཤིག་བརྒྱབ་ནས་ཡང་བསྐྱར་ཐོན་སྒོའི་སར་ཡོང་བ་ཞིག་རེད་འདུག མི་དམངས་ཉེན་རྟོག་པས་འགྲིམ་འགྲུལ་ཁྲིམས་འགལ་གྱི་བྱེད་སྤྱོད་ལ་སྐྱོན་བརྗོད་དང་སློབ་གསོ་ནན་པོ་བྱས་ཏེ། མྱུར་བགྲོད་གཞུང་ལམ་ཐོག་རླངས་འཁོར་རྒྱབ་བཤིག་བརྒྱབ་ན་རྒྱབ་ཕྱོགས་ནས་ཡོང་བའི་རླངས་འཁོར་དང་ལས་འཛོལ་ཐོན་སླ་བས། མཇུག་འབྲས་ཚབས་ཆེན་བཟོས་ནས་རང་གཞན་ཀུན་གྱི་ཚེ་སྲོག་ལ་ཉེན་ཁ་བཟོ་སྲིད་ཅེས་བཤད།
ཁ་ལོ་བ་དེའི་འགྲིམ་འགྲུལ་ཁྲིམས་འགལ་གྱི་བྱེད་སྤྱོད་ལ་དམིགས་ནས། ལྷ་ས་སྤྱི་བདེ་འགྲིམ་འགྲུལ་དོ་དམ་ཚན་པས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འགྲོ་ལམ་འགྲིམ་འགྲུལ་བདེ་འཇགས་བཅའ་ཁྲིམས》དང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འགྲོ་ལམ་འགྲིམ་འགྲུལ་བདེ་འཇགས་བཅའ་ཁྲིམས་ལག་བསྟར་སྲོལ་ཡིག》གི་འབྲེལ་ཡོད་གཏན་འབེབས་གཞིར་བཟུང་། ཁྲིམས་ལྟར་ཁ་ལོ་བའི་ལག་ཁྱེར་ནས་སྐར་མ་12འཐེན་པ་དང་དངུལ་ཆད་སྒོར་200བཏང་བ་རེད།
