བཀྲ་ཆེ་གེ་མོར་འཁོར་རྟགས་ཡག་པོ་ཞིག་དགོས་འདོད་ཡོད་པ་ནོར་ཆེ་གེ་མོས་ཤེས་རྗེས། རང་ཉིད་ལ་འཁོར་རྟགས་ཡག་པོ་རག་ཐབས་ཡོད་ལུགས་བཤད་པས་བཀྲ་ཆེ་གེ་མོས་ནོར་ཆེ་གེ་མོར་གྲོན་དངུལ་སྒོར་2500སྤྲད། དེ་རྗེས་ནོར་ཆེ་གེ་མོ་གར་སོང་ཆ་མེད་དུ་གྱུར།
2024ལོའི་ཟླ་12ཚེས་12ཉིན། བཀྲ་ཆེ་གེ་མོས་ནོར་ཆེ་གེ་མོར་འབྲེལ་བ་ཐེངས་མང་བྱས་ཀྱང་འབྲེལ་བ་བྱེད་མི་ཐུབ་པས། ཁྲེང་ཀོན་སྤྱི་བདེ་ཡན་ལག་ཅུས་ཉང་བྲན་མངགས་གཏོང་ཁང་གི་གྱོད་སྒྲུབ་རུ་ཁག་ལ་གྱོད་དོན་སྙན་སེང་ཞུས། སྙན་སེང་འབྱོར་རྗེས་ཉང་བྲན་མངགས་གཏོང་ཁང་གི་གྱོད་སྒྲུབ་མི་དམངས་ཉེན་རྟོག་པས་འཕྲལ་མར་བརྟག་དཔྱད་དཔང་ལེན་བྱས་པ་རེད།
མི་དམངས་ཉེན་རྟོག་པས་མྱུལ་ཞིབ་ཞིབ་ཚགས་དང་འབད་བརྩོན་ལྷོད་མེད་བྱས་པ་བརྒྱུད། 2024ལོའི་ཟླ་12ཚེས་15ཉིན་གྱི་ཐོ་རེངས་ཆུ་ཚོད་5པར་མི་དམངས་ཉེན་རྟོག་པས་སྟོད་ལུང་གི་མགྲོན་ཁང་ཞིག་ནས་ཁ་བསླུས་རྒྱག་མཁན་ནོར་ཆེ་གེ་མོ་བཟུང་བ་མ་ཟད། གྱོད་གཞི་དང་འབྲེལ་བ་ཡོད་པའི་དངུལ་སྒོར་2500བདེ་བླག་ངང་ཚུར་བླངས་པ་རེད།
བཀྲ་ཆེ་གེ་མོས་ཐེངས་འདིའི་བསླབ་བྱ་དང་དུ་བླངས་ནས་ལུགས་མཐུན་དང་ཁྲིམས་མཐུན་ངང་འཁོར་རྟགས་རེ་ཞུ་བྱ་རྒྱུ་ཡིན་ཞེས་བཤད།
ཁྲེང་ཀོན་སྤྱི་བདེའི་དྲན་སྐུལ།
གཞུང་ལམ་འགྲིམ་འགྲུལ་བདེ་འཇགས་སྐོར་གྱི་བཅའ་ཁྲིམས་དང་སྤྱི་བདེ་པུའུ་ཡི་འབྲེལ་ཡོད་གཏན་འབེབས་ལྟར་ན། འཕྲུལ་སྒུལ་འཁོར་རིགས་ཀྱི་འཁོར་རྟགས་ནི་སྤྱི་བདེ་ལས་ཁུངས་ཀྱི་འགྲིམ་འགྲུལ་དོ་དམ་སྡེ་ཚན་གྱིས་ཁྲིམས་ལྟར་སྤྲོད་ཀྱི་ཡོད། སྤྱི་བདེ་ལས་ཁུངས་ཀྱི་འགྲིམ་འགྲུལ་དོ་དམ་སྡེ་ཚན་ཕུད་པའི་སྡེ་ཚན་གང་རུང་ངམ་མི་སྒེར་གང་རུང་གིས་འཕྲུལ་སྒུལ་འཁོར་རིགས་ཀྱི་འཁོར་རྟགས་སྤྲོད་ཆོག་གི་མེད། དེ་བས་འཁོར་རྟགས་ཡག་པོ་རག་ཐབས་ཡོད་ཟེར་བ་ཚང་མ་ཁ་བསླུས་རྒྱག་མཁན་ཡིན་སྲིད་པས་རྒྱ་ཆེའི་ཁ་ལོ་བ་ཚོས་དོགས་ཟོན་བྱས་ནས་ཁ་བསླུས་མི་ཐེབས་པ་བྱེད་དགོས།
