དར་ལག་རྫོང་སྨར་འབྲིང་ཞང་གིས་འབྲོག་པ་མང་ཚོགས་རྩ་འཛུགས་བྱས་ཏེ2024ལོའི་མགོ་ལོག་ཁུལ་གྱི་སྤུས་ཚད་མཐོ་བའི་རོང་འབྲོག་གསོ་སྦྱོང་ལས་གཞིར་ཞུགས་པ།
མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་སྨར་འབྲིང་ཞང་གིས་ཞིང་ཆེན་ཏང་ཨུའི་ཧྲུའུ་ཅི་ཁྲེན་ཀང་གིས“ལས་བྱེད་པས་བསྒྲུབ་དགོས་ལ། རིག་ལམ་གསལ་དགོས་པ་དང་། རང་གཅུན་ནན་དགོས”ཞེས་པའི་བྱ་བའི་བླང་བྱ་གཟབ་ནན་གྱིས་ལག་ལེན་དུ་བསྟར་བ་དང་། རང་ས་གནས་ཀྱི་དངོས་ཡོད་གནས་ཚུལ་དང་ཟུང་འབྲེལ་བྱས་ཏེ། མགོ་ལོག་ཁུལ་ཞིང་ཕྱུགས་དང་ཚན་རྩལ་ཅུས་དང་ཧུར་ཐག་འབྲེལ་གཏུག་བྱས་ནས། “འབྲེལ་གཏུག་བཞི་དང་རྒྱུགས་ཤོག་གསུམ”གྱི་བྱ་བའི་ནང་རྐྱེན་ལ་བརྟེན་ནས་སྨར་འབྲིང་ཞང་གི་ཕྱིར་ཕ་ཡུལ་ལོག་སྟེ་ལས་གཏོད་བྱེད་པའི་སློབ་ཆེན་པ་དང་། རྩྭ་ཐང་ལྟ་སྲུང་དོ་དམ་པ། དམངས་ཁྲོད་ཕྱུགས་སྨན། སྡེ་བ་དང་སྡོད་ཁུལ་གྱི་ལས་བྱེད་པ་དང་ཕྱུགས་ལས་ངལ་རྩོལ་པ་སོགས་རོང་འབྲོག་མང་ཚོགས་ཁྱོན་སྡོམ་མི50འོས་འདེམ་བྱས་ཤིང་། 2024ལོའི་མགོ་ལོག་ཁུལ་གྱི་སྤུས་ཚད་མཐོ་བའི་རོང་འབྲོག་གསོ་སྦྱོང་འཛིན་གྲྭར་ཞུགས།
ཐེངས་འདིའི་གསོ་སྦྱོང་དུ་ཕྱོད་མཐོའི་ནོར་གནག་གསོ་སྤེལ་གྱི་ལག་རྩལ་ལ་དམིགས་བཙུགས་ཏེ། རོང་འབྲོག་པའི་ཆེད་ལས་ནུས་རྩལ་དང་ཚོང་གཉེར་དོ་དམ་གྱི་ནུས་པ་མཐོར་འདེགས་བྱེད་པ་ལ་བརྟེན་ནས། ནོར་ནག་གི་རིགས་རྒྱུད་མི་འདྲ་བ་གསོ་སྤེལ་དང་སྐྱེ་འཕེལ་ལུས་ཁམས་དང་བཅས་པའི་སྙོམ་སྒྲིག་ལག་རྩལ་དང་གཟན་གསོའི་ལག་རྩལ། རྒྱུན་མཐོང་ཕྱུགས་ནད་དང་དེའི་གསོ་བཅོས་བྱེད་ཐབས་དང་ནོར་ནག་གི་གཟན་རྩྭའི་རིགས་དང་དེའི་ཐོན་སྐྱེད་ལག་རྩལ་སོགས་ཀྱི་ཐད་ནས་འགྲེལ་བཤད་བྱས། སློབ་ཁྲིད་ཀྱི་ནང་དོན་རྣམས་ནོར་ནག་གསོ་སྤེལ་གྱི་མ་ལག་རང་བཞིན་དང་ཚན་རིག་རང་བཞིན། དངོས་སྤྱོད་རང་བཞིན་དང་སྔོན་ཐོན་རང་བཞིན་བཅས་ཀྱི་དངོས་ཡོད་དང་ཟུང་འབྲེལ་དམ་ཟབ་བྱས་ཏེ། སྲོལ་རྒྱུན་གྱི་གཟན་གསོའི་ཁྲོད་ཀྱི་གནད་དོན་ནུས་ལྡན་སྒོས་ཐག་གཅོད་བྱས་ཤིང་། དངོས་གནས་ནོར་ནག་གསོ་སྤེལ་གྱི་ཕན་འབྲས་མཐོར་འདེགས་བཏང་ལ། སྤུས་ཚད་མཐོ་བའི་རོང་འབྲོག་པ་གསོ་སྐྱོང་སྟེགས་བུའི་ཆེད་མཁས་པའི་ཁྲོད་ནས་ནོར་ནག་གསོ་སྤེལ་དང་ལག་རྩལ་ཁྱབ་གདལ། ཕྱུགས་རྒྱུད་ལེགས་སྒྱུར་དང་ཕྱུགས་ནད་སྔོན་འགོག་ཚོད་འཛིན་སོགས་ཁྱབ་ཁོངས་ཀྱི་ཆེད་མཁས་རྒན་པའི་ཞབས་ཞུའི་དཔུང་སྡེ་འདེམ་སྒྲུག་བྱས་ཏེ། གསོ་སྦྱོང་ལ་ཚན་རིག་དང་མཐུན་པའི་མཛུབ་སྟོན་འདོན་སྤྲོད་བྱས་ཤིང་། སློབ་མ་རྣམས་ཀྱིས“གོ་བདེ་བ་དང་། སློབ་བདེ་བ། སྤྱོད་བདེ་བ། འབྲས་བུ་འབྱུང་བ”བཅས་ལ་ཁག་ཐེག་བྱས། ཐེངས་འདིའི་གསོ་སྦྱོང་བརྒྱུད་དེ། སྨར་འབྲིང་ཞང་གི་རོང་འབྲོག་པའི་ཆེད་ལས་ནུས་རྩལ་མངོན་གསལ་གྱིས་མཐོར་འདེགས་བྱུང་བ་དང་། དབུལ་ཐར་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་བསྐྱེད་གཏོང་བ་དེ་གྲོང་གསེབ་དར་སྤེལ་དང་འབྲེལ་མཐུད་ནུས་ལྡན་གཏོང་བ་ལ་སྨར་འབྲིང་གི་སྟོབས་ཤུགས་ཕུལ་ཡོད།
འདྲ་པར་མནན་ནས་མཚོ་སྔོན་བོད་ཡིག་གསར་འགྱུར་ཚགས་པར་ཀློགས།
