རྒྱལ་སྲིད་སྤྱི་ཁྱབ་ཁང་གི་བདེ་འཇགས་ཐོན་སྐྱེད་དང་མེ་ཟོན་བྱ་བའི་དཔྱད་ཞིབ་སྐོར་ཞིབ་ཚན་ཆུང་གི་ཚན་ཆུང་དགུ་པ་མཚོ་སྔོན་དུ་ཡོང་ནས་དཔྱད་ཞིབ་སྐོར་ཞིབ་བྱ་རྒྱུ་རེད།
རྒྱལ་སྲིད་སྤྱི་ཁྱབ་ཁང་གི་གཅིག་གྱུར་བཀོད་སྒྲིག་ལྟར། ཟླ11པའི་ཚེས10ནས་ཚེས20ཉིན་བར། རྒྱལ་སྲིད་སྤྱི་ཁྱབ་ཁང་བདེ་འཇགས་ཐོན་སྐྱེད་དང་མེ་ཟོན་བྱ་བའི་དཔྱད་ཞིབ་སྐོར་ཞིབ་ཚན་ཆུང་དགུ་པས་རང་ཞིང་དུ2024ལོའི་ལོ་འཁོར་གྱི་བདེ་འཇགས་ཐོན་སྐྱེད་དང་མེ་ཟོན་བྱ་བར་དཔྱད་ཞིབ་སྐོར་ཞིབ་བྱ་རྒྱུ་རེད། ཟླ11པའི་ཚེས11ཉིན། དཔྱད་ཞིབ་སྐོར་ཞིབ་ཀྱི་ཆེད་དོན་བཞུགས་མོལ་ཚོགས་འདུ་ཟི་ལིང་དུ་འཚོགས། ཞིང་ཆེན་ཏང་ཨུའི་ཧྲུའུ་ཅིའམ་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཁྲེན་ཀང་དང་། དཔྱད་ཞིབ་སྐོར་ཞིབ་ཚན་ཆུང་གི་ཚན་ཆུང་དགུ་པའི་ཚན་གཙོའམ་ཆུ་བེད་པུའུ་ཡི་པུའུ་ཀྲང་གཞོན་པ་ཝང་པའོ་ཨེན་གཉིས་ཀྱིས་གཏམ་བཤད་པ་དང་། ཞིང་ཆེན་ཏང་ཨུའི་ཧྲུའུ་ཅི་གཞོན་པའམ་ཧྲེང་ཀྲང་ཝུའུ་ཞའོ་ཅུན་གྱིས་ཞིང་ཆེན་ཡོངས་ཀྱི་བདེ་འཇགས་ཐོན་སྐྱེད་དང་མེ་ཟོན་བྱ་བའི་སྐོར་གྱི་གནས་ཚུལ་སྙན་སེང་ཞུས།
ཝང་པའོ་ཨེན་གྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བདེ་འཇགས་ཐོན་སྐྱེད་བྱ་བར་ཚད་མཐོའི་མཐོང་ཆེན་གནང་བ་དང་། ད་ལོའི་ཚུན་དུ་མཆན་བཀོད་མཛུབ་སྟོན་གལ་ཆེན་ཐེངས་མང་གནང་ནས་ང་ཚོར་འབད་འཐབ་ཁ་ཕྱོགས་གསལ་སྟོན་དང་རྩ་བའི་གཞི་འཛིན་ས་མཁོ་འདོན་གནང་ཡོད། བསམ་བློ་དང་བྱ་སྤྱོད་དེ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་དང་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་ཐོག་གཅིག་གྱུར་མཐའ་གཅིག་ཏུ་བྱེད་པ་དང་། བདེ་འཇགས་ཐོན་སྐྱེད་ཀྱི་འགན་འཁྲིའི་མ་ལག་སྔར་བས་འཐུས་ཚང་དུ་བཏང་ནས། མི་དམངས་མང་ཚོགས་ཀྱི་ཚེ་སྲོག་བདེ་འཇགས་འགན་ལེན་བྱ་རྒྱུ་དེ་ཨང་དང་པོར་བཞག་ནས་དོན་ཐོག་ཏུ་འཁྱོལ་བར་བྱེད་དགོས། དཔྱད་ཞིབ་སྐོར་ཞིབ་ཚན་ཆུང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་སློབ་སྦྱོང་དང་ལག་བསྟར་བྱས་ཚུལ། བདེ་འཇགས་ཐོན་སྐྱེད་ཀྱི་འགན་འཁྲི་དོན་འཁྱོལ་བྱས་ཚུལ། གཙོ་གནད་ཆེད་དོན་ལས་དོན་ལ་སྐུལ་འདེད་དང་དོན་འཁྱོལ་བྱས་ཚུལ། ལས་འཛོལ་ཚབས་ཆེན་གྱི་མངོན་མེད་རྐྱེན་ངན་དང་མང་ཚོགས་ཉེ་འགྲམ་གྱི་མངོན་མེད་རྐྱེན་ངན་བཅས་གཙོ་བོར་བཟུང་ནས་དཔྱད་ཞིབ་བྱ་རྒྱུ་རེད། མཚོ་སྔོན་ཞིང་ཆེན་གྱི་རིམ་པ་སོ་སོའི་ལས་བྱེད་པས་དཔྱད་ཞིབ་སྐོར་ཞིབ་བྱ་བར་རྒྱབ་སྐྱོར་དང་གཞོགས་འདེགས་ཧུར་ཐག་བྱ་རྒྱུའི་རེ་བ་ཡོད་ལ། ཕྱོགས་སོ་སོས་དཔྱད་ཞིབ་སྐོར་ཞིབ་ཚན་ཆུང་བྱ་བའི་བརྒྱུད་རིམ་ཧྲིལ་པོར་ལྟ་སྐུལ་བྱས་ཏེ། ཐེངས་འདིའི་དཔྱད་ཞིབ་སྐོར་ཞིབ་ལས་མཚོ་སྔོན་ཞིང་ཆེན་གྱི་འབྲེལ་ཡོད་ལས་དོན་གྱི་ཕན་འབྲས་དངོས་ཡོད་དང་མཐུན་པའི་ངང་མཚོན་ཐུབ་པར་འགན་ལེན་བྱེད་དགོས། རེ་བར་མཚོ་སྔོན་ཞིང་ཆེན་གྱིས་ཐེངས་འདིའི་དཔྱད་ཞིབ་སྐོར་ཞིབ་དཔྱད་གཞིའི་མེ་ལོང་དུ་བྱས་ནས་ཏང་ཨུ་དང་སྲིད་གཞུང་གི་འགོ་ཁྲིད་བརྟན་པོའི་འོག ཕྱོགས་སོ་སོའི་བདེ་འཇགས་ཐོན་སྐྱེད་དང་མེ་ཟོན་བདེ་འཇགས་འགན་འཁྲི་སྔར་བས་ནན་དུ་བཏང་སྟེ། དཔལ་འབྱོར་དང་སྤྱི་ཚོགས་སྤུས་ཚད་མཐོན་པོའི་སྒོ་ནས་འཕེལ་རྒྱས་འགྲོ་བར་ཐུན་མོང་ཐོག་བདེ་འཇགས་ཀྱི་ཁོར་ཡུག་བཟང་པོ་ཞིག་གཏོད་དགོས།
ཁྲེན་ཀང་གིས་བཤད་རྒྱུར། མཚོ་སྔོན་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་ངེས་པར་དུ་ཆབ་སྲིད་ཀྱི་ལངས་གནས་མཐོ་རུ་བཏང་སྟེ། ཆབ་སྲིད་ཀྱི་འགན་འཁྲི་དང་ལས་འགན་མཐའ་གཅིག་ཏུ་ཕྲག་ཏུ་འཁུར་བ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལ་ལྟོས་བསྡུར་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་བཀོད་སྒྲིག་ལ་ལྟོས་བསྡུར། དཔྱད་ཞིབ་སྐོར་ཞིབ་ཀྱི་གཙོ་གནད་ལ་ལྟོས་བསྡུར་བཅས་བྱས་ཏེ། མཚོ་སྔོན་གྱི་བདེ་འཇགས་ཐོན་སྐྱེད་དང་མེ་ཟོན་བྱ་བ་སྤུས་འདེགས་ཕན་འཕར་དང་དངོས་སྒྲུབ་ཟབ་སྤེལ་ཡོང་བར་སྐུལ་འདེད་གཏོང་དགོས། ཏང་གི་ཆབ་སྲིད་སྒྲིག་ལམ་སྲུང་སྐྱོང་དང་ཏང་ཀྲུང་དབྱང་གི་སྲིད་བཀའ་ཐོགས་མེད་ངང་འགན་ལེན་བྱེད་པའི་མཐོ་ཚད་ནས། དཔྱད་ཞིབ་སྐོར་ཞིབ་བྱ་བར་ནུས་ཤུགས་ཡོད་རྒུས་རྒྱབ་སྐྱོར་དང་གཞོགས་འདེགས་བྱས་ཏེ། དཔྱད་ཞིབ་སྐོར་ཞིབ་ཁྲོད་བཏོན་པའི་མི་འདང་ས་དང་ཚུར་སྣང་བྱས་པའི་གནད་དོན་ལ་རྗེས་སྙེག་ལྟ་སྐུལ་བྱེད་ཤུགས་ཆེ་རུ་བཏང་ནས། མཐའ་གཅིག་ཏུ་དག་ཐེར་དོན་འཁྱོལ་བྱེད་དགོས། ཞབས་ཞུ་འགན་ལེན་བྱ་བ་ནུས་ཤུགས་ཡོད་རྒུས་ལེགས་པོར་བསྒྲུབས་ཏེ། འགྲུལ་བཞུད་བཀོད་སྒྲིག་དང་དཔྱད་གཞིའི་ཡིག་རིགས་ལ་ལྟ་བཤེར། རྒྱབ་ཕྱོགས་མཁོ་སྒྲུབ་འགན་ལེན་སོགས་ཀྱི་ཐད་འབྲེལ་མཐུད་ཡག་པོ་བྱས་ནས། དཔྱད་ཞིབ་སྐོར་ཞིབ་ཚན་ཆུང་གིས་བྱ་བ་ཕན་མཐོའི་ངང་སྤེལ་བར་ཁོར་ཡུག་དང་ཆ་རྐྱེན་བཟང་པོ་བསྐྲུན་དགོས། ས་གནས་སོ་སོ་དང་སྡེ་ཁག་སོ་སོས་དངོས་ཐོག་བདེན་འཚོལ་གྱིས་བྱ་བའི་སྙན་སེང་ཞུ་བ་དང་། གནས་ཚུལ་ཡང་དག་པའི་ངང་ཡར་ཞུ་བྱེད་པ། དུས་ཐོག་དང་ཁྱོན་ཡོངས་ནས་དཔྱད་གཞིའི་ཡིག་རིགས་མཁོ་འདོན་བཅས་བྱས་ཤིང་། དཔྱད་ཞིབ་སྐོར་ཞིབ་དང་ལེན་བྱེད་པའི་བརྒྱུད་རིམ་དེ་ཞན་ཆ་གསབ་པ་དང་ཉམས་ཞན་སྟོབས་ལྡན་དུ་གཏོང་བ། ཉེན་ཁ་འགོག་པ་བཅས་ཀྱི་བརྒྱུད་རིམ་དུ་བརྩིས་ནས། ཞིང་ཆེན་ཡོངས་ཀྱི་བདེ་འཇགས་ཐོན་སྐྱེད་དང་མེ་ཟོན་བྱ་བའི་རྨང་གཞི་ཧུར་ཐག་གིས་ཇེ་བརྟན་དུ་གཏོང་དགོས།
ཚོགས་འདུའི་སྟེང་བདེ་འཇགས་ཐོན་སྐྱེད་ཀྱི་མངོན་བཤེར་ལྐོག་ཞིབ་གནས་ཚུལ་གྱི་ཆེད་དོན་བརྙན་རིས་ལ་བལྟས། དཔྱད་ཞིབ་སྐོར་ཞིབ་ཚན་ཆུང་གི་ཚན་ཆུང་དགུ་པའི་ཁོངས་མིའམ་ཞིང་ཆེན་གྱི་མགོ་ཁྲིད་ཝང་ལིན་ཧུའུ་དང་ཀྲུའུ་ཞང་ཧྥེང་ཚོགས་འདུར་ཞུགས་ཤིང་། ཞིང་ཆེན་སྲིད་གཞུང་གི་དྲུང་ཡིག་ཆེན་མོ་དང་འབྲེལ་ཡོད་དྲུང་ཡིག་ཆེན་མོ་གཞོན་པ། ཞིང་ཆེན་བདེ་འཇགས་ཨུ་ཡོན་ལྷན་ཁང་གི་ཁོངས་ཞུགས་ལས་ཁུངས་གཙོ་བོའི་འགན་འཁུར་བློ་མཐུན་གཙོ་བོ་བཅས་ཀྱང་ཚོགས་འདུར་ཞུགས།
མཚོ་སྔོན་དུ་སྡོད་པའི་རིང་ལ། དཔྱད་ཞིབ་སྐོར་ཞིབ་ཚན་ཆུང་གིས་ཐེར་འདོན་ཁ་པར་ཨང་གྲངས་དང་གློག་རྡུལ་སྦྲག་སྒམ། སྦྲག་སྲིད་ཡིག་སྒམ་སོགས་ཐེར་འདོན་ཐབས་ལམ་བཙུགས་ནས། བདེ་འཇགས་ཐོན་སྐྱེད་དང་འབྲེལ་བའི་གནད་དོན་གལ་ཆེན་གྱི་མངོན་མེད་རྐྱེན་ངན་ཐེར་འདོན་དང་སྙན་ཞུ་བདག་སྤྲོད་བྱ་རྒྱུ་རེད། ཐེར་འདོན་ཁ་པར་ནི། 15011241016(ལས་ཀའི་དུས་ཚོད་ནི་ཆུ་ཚོད8:00ནས12:00བར་དང་། 14:00ནས18:00བར)ཡིན་ལ། གློག་རྡུལ་སྦྲག་སྒམ་ནི། QH2024KHXC@mem.gov.cnཡིན་པ་དང་། སྦྲག་སྲིད་ས་གནས་ནི། མཚོ་སྔོན་ཞིང་ཆེན་ཟི་ལིང་གྲོང་ཁྱེརA208རྟགས་ཅན་གྱི་སྦྲག་སྲིད་ཡིག་སྒམ-རྒྱལ་སྲིད་སྤྱི་ཁྱབ་ཁང་བདེ་འཇགས་ཐོན་སྐྱེད་དང་མེ་ཟོན་བྱ་བའི་དཔྱད་ཞིབ་སྐོར་ཞིབ་ཚན་ཆུང་ཡིན། སྦྲག་ཨང810000ཡིན། །
འདྲ་པར་མནན་ནས་མཚོ་སྔོན་བོད་ཡིག་གསར་འགྱུར་ཚགས་པར་ཀློགས།
