جۇڭگو-قازاقىستان ئۆزئارا ۋىزا كەچۈرۈم قىلىش كېلىشىمىنىڭ كۈچكە ئىگە بولغىنىغا بىر يىل بولدى. ئىككى دۆلەت خادىملىرىنىڭ بېرىش-كېلىشى تېز ئاشتى
ئۈرۈمچى چېگرادىن كىرىش-چىقىش چېگرا مۇداپىئە تەكشۈرۈش پونكىتىنىڭ ئىستاتىستىكىسىغا ئاساسلانغاندا، 2023-يىل 11-ئاينىڭ 10-كۈنى «جۇڭخۇا خەلق جۇمھۇرىيىتى ھۆكۈمىتى بىلەن قازاقىستان جۇمھۇرىيىتى ھۆكۈمىتىنىڭ ئۆزئارا ۋىزا كەچۈرۈم قىلىش كېلىشىمى» رەسمىي كۈچكە ئىگە بولغاندىن بۇيان، 2024-يىل 11-ئاينىڭ 10-كۈنى سائەت 0 دە ئۈرۈمچى خەلقئارا ئايروپورتى ئارقىلىق جۇڭگو، قازاقىستان ئىككى دۆلەتكە بېرىپ-كەلگەن ئادەم سانى 182 مىڭ ئادەم قېتىمدىن ئېشىپ، پورتنىڭ ئوخشاش مەزگىلدىكى چېگرادىن كىرگەن-چىققانلار ئومۇمىي سانىنىڭ ％27.6ىنى ئىگىلىگەن.
بۇلتۇر كېلىشىم كۈچكە ئىگە بولغاندىن بۇيان، ئۈرۈمچى خەلقئارا ئايروپورتى ئارقىلىق قازاقىستانغا بارغان جۇڭگو پۇقرالىرىنىڭ سانى 53 مىڭ 600 ئادەم قېتىمغا يېتىپ، چېگرادىن چىققان جۇڭگو پۇقرالىرى ئومۇمىي سانىنىڭ %31ىنى ئىگىلىدى؛ ئادەتتىكى پاسپورت بىلەن چېگرادىن ۋىزىسىز كىرگەن قازاقىستانلىق يولۇچىلار سانى 38 مىڭ 500 ئادەم قېتىمدىن كۆپرەككە يېتىپ، چېگرادىن كىرگەن چەت ئەللىكلەر ئومۇمىي سانىنىڭ %35ىنى ئىگىلەپ، ئوخشاش مەزگىلدىكىدىن %365 ئاشتى. ۋىزا كەچۈرۈم قىلىش سىياسىتىنىڭ تۈرتكىسىدە، جۇڭگوغا كېلىپ سەيلە-ساياھەت قىلغان، ئارام ئالغان ۋە سودا پائالىيىتى بىلەن شۇغۇللانغانلار جەمئىي 35 مىڭ ئادەم قېتىم بولۇپ، ئادەتتىكى پاسپورت بىلەن چېگرادىن ۋىزىسىز كىرگەنلەرنىڭ %92.5 ىنى ئىگىلەپ، ئىككى دۆلەتنىڭ ساياھەت بازىرى ۋە ئىقتىساد-سودا ئالاقىسىگە تېخىمۇ كۆپ ھاياتىي كۈچ قوشتى.
نۆۋەتتە، بېرىپ-كېلىدىغان نۆۋەتچى ئايروپىلانلارنىڭ ئۇچۇش ۋەزىپىسىنى جۇڭگو-قازاقىستان ئىككى دۆلەتنىڭ ئۈچ ئاۋىياتسىيە شىركىتى ئىجرا قىلىۋاتىدۇ، ئىككى دۆلەت ئوتتۇرىسىدىكى نۆۋەتچى ئايروپىلانلار ھەر ئايدا 130 نەچچە قېتىم ئەتراپىدا بېرىپ-كېلىۋاتىدۇ، ئىككى دۆلەت چېگراسىدىن كىرىپ چىقىدىغان ئادەم سانى 22 مىڭ ئادەم قېتىمدىن ئارتۇق بولۇۋاتىدۇ.
