ཟབ་དོན་དྲན་པའི་མགུར་ཚིག་བྱིས་པའི་རྡོལ་གཏམ། དགེ་འདུན་བསྟན་འཛིན།

ཟབ་དོན་དྲན་པའི་མགུར་ཚིག་བྱིས་པའི་རྡོལ་གཏམ་ཞེས་བྱ་བ།

དགེ་འདུན་བསྟན་འཛིན།

ན་མོ་མ་དྷྱ་མ་ཀཱ་ཡ།

རྟེན་འབྲེལ་གྱིས་སྟོང་བ་རྗེན་པར་གཟིགས།།

སྟོང་ཉིད་ཀྱིས་རྟེན་འབྱུང་ངང་གིས་འདྲེན།།

སྣང་སྟོང་གཉིས་གྲོགས་སུ་འཇུག་པའི་གཏམ།།

རང་དབང་དུ་འདོམས་པ་དེ་ལ་འདུད།།

དེ་འཛིན་གྱི་ཐུ་བོ་འཇམ་དབྱངས་དང་།།

ཀླུ་སྒྲུབ་དང་ཟླ་བ་གྲགས་པའི་ཞབས།།

གངས་ཅན་གྱི་སྟོན་པ་བློ་བཟང་གྲགས།།

བླ་མ་རྣམས་ཟབ་མོ་གླུ་ཡིས་མཆོད།།

ལས་ཉོན་གྱིས་དཀྲིགས་པའི་སྡུག་བསྔལ་ཀུན།།

དགྲ་བདག་འཛིན་འགོང་བོས་བསྐྱེད་པས་ན།།

དེ་ཡེ་ནས་འབྱིན་པའི་ཐབས་ལམ་ལ།།

དུས་ད་ནས་བརྩོན་པ་བགྱིད་པར་འཐད།།

ཆོས་བརྒྱད་ཁྲི་བཞི་སྟོང་སྙིང་བོའི་བཅུད།།

དབྱིིངས་སྤྲོས་བྲལ་ཟབ་མོ་དབུ་མའི་ལམ།།

དོན་འདི་ལ་དོན་འགྱུར་ཐེ་ཚོམ་ཡང་།།

སྲིད་འཁོར་བ་ཧྲུལ་པོར་བྱེད་པར་གསུངས།།

ལར་ཨ་འཐས་རྨོངས་པའི་ཞེན་པ་འདིས།།

ཆོས་ཅི་ཙམ་འབད་པས་བསྒྲུབས་ན་ཡང་།།

རྒྱུ་ཀུན་འབྱུང་རང་དུ་འཁོར་བ་ལས།།

མཆོག་ཐར་བའི་ལམ་ཞིག་རྙེད་པར་དཀའ།།

དོན་དེ་ཕྱིར་གདོད་མའི་གནས་ལུགས་ལ།།

གདེང་ཟབ་མོའི་སྐབས་ཤིག་མ་རྙེད་ན།།

གནས་སྲིད་པ་གསུམ་གྱི་གྲོང་ཁྱེར་འདིར།།

མགལ་མེ་ཕུང་བཞིན་དུ་བརྒྱུད་མར་འཁོར།།

ནང་ཚོགས་དྲུག་སྣང་བ་གང་མཆིས་དེ།།

ཡུལ་རང་ནས་གྲུབ་གྲུབ་ལྟ་བུ་ལ།།

བདེན་བདེན་དུ་བཟུང་བ་འདི་ལྟར་ན།།

རྒྱལ་བས་ཀྱང་སྐྱོབ་ཐུབ་མི་འདུག་པས།།

མཚན་འཛིན་གྱི་དམིགས་གཏད་མ་ལུས་པ།།

རྟེན་འབྱུང་གི་རིགས་པས་མཐིལ་བཤིག་ནས།།

ཆོས་ཉིད་ཀྱི་ཞལ་རས་མཛེས་མའི་གདོང་།།

ད་ལྟ་ནས་མཐོང་ན་དགའ་བ་ལ།།

ཡོངས་ཕོངས་སུ་འཇུག་པའི་འགོང་བོའི་བུ།།

རང་ཚུགས་སེ་འཛིན་པའི་བློ་ཉེས་པོ།།

ཆོས་རྟེན་འབྲེལ་རིགས་པའི་རྒྱལ་བོ་ཡིས།།

རྒྱུན་ས་བོན་བཅས་པ་ཁེགས་ན་སྙམ།།

སྔོན་གོམས་པ་མེད་པའི་གང་ཟག་ལ།།

ཟབ་སྟོང་ཉིད་གཏམ་དེ་བསྐལ་ན་ཡང་།།

ཡིད་མོས་གུས་རུམ་པའི་ཉམ་ཐག་ལ།།

ཕ་བླ་མས་བྱིན་རླབས་རྒྱང་ནས་སྩོལད།།

དབྱིངས་རྟེན་འབྱུང་ལྟ་བའི་ལྷ་ལམ་ངོས།།

སྤྱོད་འཚེ་མེད་ཕིབས་པའི་འཇའ་ཚོན་དབུས།།

ཐབས་ཤེས་རབ་ཉི་ཟླ་འབར་བའི་སྟེང་།།

ཐུགས་བརྩེ་ཆེན་ཀྱོ་བས་མ་གཏོང་ཞིག།

གཡང་སྲིད་ཞིའི་མཐའ་ལས་སྒྲོལ་བ་ལ།།

མགོན་ཁྱེད་ལས་རེ་ས་གཞན་མེད་པས།།

རིངས་མྱུར་བའི་སྟབས་ཀྱིས་རྗེས་བཟུང་ལ།།

དགྲ་བདག་འཛིན་གཡུལ་ལས་རྒྱལ་དུ་གསོལ།།

རང་སོ་སྐྱེས་ས་ལ་སྣང་བ་འདིར།།

ཐོ་མ་རིག་རང་དགར་རློམ་པ་ཡི།།

བློས་བཅོས་པའི་དགག་བྱ་འགོག་པ་འདིས། ། 

བདག་ལྷན་སྐྱེས་རྨང་ནས་བརྟན་པར་བྱས། ། 

ཡུལ་རང་གི་སྟེང་ནས་ལིང་ལིང་དུ། ། 

བློ་གདོད་མའི་ངོ་ལ་འཆར་བ་གང་། ། 

བཏགས་དངོས་པོའི་ལུས་ལ་མ་རེག་པར། ། 

དེས་སྟོང་པའི་ཆོས་ཤིག་རྙེད་མ་ཡིན། ། 

བྱད་མེ་ལོང་ངོས་ལ་ཤར་བ་བཞིན། ། 

སྤྲོས་དངོས་ཀུན་རྟོག་པས་བཏགས་ཙམ་ལས། ། 

ཡུལ་དངོས་པོོ་རྡུལ་ཙམ་མ་མཆིས་པ། ། 

སྣང་རྟེན་འབྱུང་སྟོང་བའི་གཤིས་སུ་འཁུམས། ། 

ལར་རྒྱུ་འབྲས་ལ་ལྟོས་རྟེན་འབྱུང་ཙམ། ། 

འདི་དངོས་པོ་སྨྲ་བ་ཀུན་འདོད་ཀྱང་། །

ཀུན་ཕན་ཚུན་ལྟོས་པའི་བཏགས་ཡོད་ནི། ། 

དཔལ་ཀླུ་སྒྲུབ་དགོངས་པ་མཐར་ཐུག་ཉིད། ། 

ཡུལ་སྣང་བའི་དངོས་པོ་གང་ཤར་ལ། ། ། 

མཚན་འཛིན་གྱིས་སྤྲོས་པས་མ་བསླད་པར། ། 

རང་ཀུན་རྫོབ་བརྫུན་པར་སྣང་བ་ལ། ། 

བློ་རྟག་འཛིན་མཐའ་ལས་ངང་གིས་གྲོལ། ། 

དབྱིངས་སྤྲོས་བྲལ་ངེས་པའི་ངེས་ཤེས་ཀྱིས། ། 

ལས་བྱ་བྱེད་བསླུ་བ་མེད་མཐོང་བས། ། 

ཆོས་སྡིག་སྤོང་དགེ་སྒྲུབ་ལྷུར་ལེན་པ། ། 

འདིས་ལྟ་ངན་ཆད་མཐའི་གཡང་ལས་འདྲོངས། ། 

སྣང་སྟོང་བ་རེས་སུ་མ་བཞག་པར། ། 

གང་སྣང་བ་སྟོང་བའི་གཤིས་སུ་ཤེས། ། 

རང་སྟོང་བས་སྣང་བ་གང་ཤར་ལ། ། 

མཐའ་གཉིས་ཀའི་གཡང་ལས་ཅིག་ཅར་གྲོལ། ། 

གང་རྐྱེན་ལས་སྐྱེས་པ་དེ་མ་སྐྱེས། ། 

དེར་སྐྱེ་བའི་རང་བཞིན་ཡོད་མ་ཡིན། ། 

རྐྱེན་གཞན་ལ་ལྟོས་པས་སྟོང་བ་ཞེས། ། 

གསུང་འདི་ལས་ཡ་མཚན་གང་ན་ཞིག། ། 

རྒྱུད་མཚན་འཛིན་འཁྲུལ་བ་ཀུན་རྟོགས་ནས། ། 

བདེན་སྣང་བའི་བག་ཆགས་སྦྱོང་བའི་ཐབས། ། 

མཐའ་བྲལ་བའི་དབུ་མའི་ལམ་བསྟེན་ན། ། 

ས་ཆེན་པོའི་འཕགས་ལམ་རྙེད་པར་གསུངས། ། 

ལང་ཚོ་ནི་པདྨའི་མདངས་ལྟར་གཡོ། ། 

འདོད་ཡོན་ནི་སྒྱུ་མ་བཤིག་འདྲ་བས། ། 

རང་གཅེས་སུ་འདོད་ན་ད་ལྟ་ནས། ། 

ལམ་སྣེ་ཞིག་ཟིན་ན་མི་ལེགས་སམ། ། 

སྤྱིར་སྙིགས་མས་སྦགས་པའི་དུས་མཐའ་འདིར། ། 

ཆོས་ཚུལ་བཞིན་སྒྲུབ་པ་ཤིན་ཏུ་དཀོན། ། 

སྒོས་ཆོས་གཟུགས་སྙེག་པའི་སྐྱེ་བོ་རྣམས། ། 

ཆོས་རྣལ་མར་འཇུག་པ་ཉིན་སྐར་ཙམ། ། 

ནང་རྟོག་གེར་རློམ་པ་བདག་འདྲ་ཡང་། ། 

ཚིག་འགྲིག་འགྲིག་འདྲ་ཞིག་བསྒྲིགས་ནའང་། ། 

རྒྱུད་གྱོང་པོ་རྭ་ལྟར་མཁྲེགས་པོར་ལུས། ། 

འདིས་ཤིན་ཏུ་སྐྱོ་ཞིང་ངོ་ཡང་གནོངས། ། 

ལུས་འདུ་འཛིས་ཁོལ་བོར་ལུས་པ་འདིས། ། 

ཆོས་སྒྲུབ་པའི་གོ་སྐབས་ཕྲ་བ་འདི། ། 

ཕ་བླ་མའི་བྱིན་མཐུས་མྱུར་བསལ་ནས། ། 

ཚེ་ལྷག་མ་དོན་ལྡན་ཡོང་བར་ཤོག། ། 

རང་ཉམས་མྱོང་ཅུང་ཙམ་མེད་པའི་ཁར། ། 

ལར་ཧམ་བཤད་ཆུ་ཡི་ཝུ་བ་འདི། །

རོ་འཛིན་མའི་འདབ་མ་གྱི་ནར་དུ། ། 

གཡོ་བརྡར་ལས་སྐལ་བ་བཟང་སྙམ་དྲན། ། 

དེ་ལྟར་དུ་བླ་མའི་བཀའ་དྲིན་ལས། ། 

རང་ཉིད་ལ་དྲན་པའི་གསོས་སུ་བཏབ། ། 

དགེ་གང་མཆིས་དོན་དམ་ཡེ་མེད་པའི། ། 

རང་ཞལ་དེ་རྗེན་པར་མཐོང་ཕྱིར་བསྔོ། ། 

    ཞེས་ཟབ་དོན་དྲན་པའི་མགུར་ཚིག་བྱིས་པའི་རྡོལ་གཏམ་ཞེས་པ་འདི་ནི་ལས་ཀ་ཙག་ཙིག་གིས་ཅུང་ཟད་སུན་སྣང་སྐྱེས་པའི་སྐབས་ཤིག་ལ་འཕྲལ་དུ་བྲིས་པ་དགེ་བར་གྱུར་ཅིག།

འཕྲིན་སྟེགས་སུ་ཚོགས་པ་དང་མི་སྒེར་གང་རུང་གི་ཁེ་དབང་ལ་གནོད་པའི་ནང་དོན་ཅན་ཡོད་ཚེ་མྱུར་དུ་འབྲེལ་གཏུགས་བྱོས་དང་དྲྭ་ལམ་ནས་བསུབ་ཆོག 

རྩོམ་པ་བོ་དག་གིས་ཡིད་གཟབ་གནང་རྒྱུ་ཞིག་ལ། སྐུ་ཉིད་ཀྱི་བརྩམས་ཆོས་གང་ཡིན་གཞན་གྱི་འཕྲིན་སྟེགས་སུ་བསྐུར་ཟིན་པ་དག་འདིར་མི་བསྐུར་བར་ཞུ། རྒྱུ་མཚན་བརྩམས་ཆོས་དེ་སྟེགས་བུ་གཅིག་ལ་དབང་ན་ལེགས་པ་དང་དེ་མིན་འགོད་མི་ཐུབ་པའི་དཀའ་ལས་སུ་འཕྲད་པས་དེའི་ལུགས་ལ་ཡིད་འཇགས་འཚལ།