ཟས་ཞིམ་པོ་ལྕེ་ཡི་ལོངས་སྤྱོད། མ་བྱན་རྩེ་གྲ་ཀུན་གྱི་བསྟོད་ས།

སློབ་འབྲིང་ཐོན་པའི་རྗེས། དཀར་ཕྲུག་ལ་ཞིམ་ཟས་ལག་རྩལ་དང་འབྲེལ་བའི་གོ་སྐབས་ཞིག་འཕྲད། ཐོག་མའི་ཚལ་སྐྱེལ་མཁན་ཆེས་དཀྱུས་མི་ཞིག་ནས་རིམ་བཞིན་ཁོང་གིས་ཚལ་གཏུབས་སྟངས་དང་། སྡེར་མ་སྡིག་སྟངས། ཚལ་བརྔོ་སྟངས་སོགས་ཀྱི་ལག་རྩལ་བྱང་ཆུབ་པར་གྱུར། ཚལ་གཏུབས་སྟངས་སྦྱོང་རིམ་ལ་དྲན་གསོ་བྱེད་སྐབས། བརྗེད་པར་དཀའ་བའི་ལོ་རྒྱུས་མང་པོ་ཡོད་ཅིང་། རྩེར་སོན་གྱི་མ་བྱན་ཞིག་སྦྱངས་པར་ཐོག་མར་ཚལ་གཏུབས་སྟངས་ལེགས་པར་སྦྱངས་དགོས་པ་ནི་ཐོག་མའི་སྔོན་འགྲོར་གྱུར། ཐོག་མར་ཚལ་གཏུབས་སྟངས་ཀྱི་ལག་རྩལ་ལ་འཇུག་སྐབས་ལག་མཛུབ་ཐོག་རྨ་ཁ་མང་པོ་བཟོ་མྱོང་ཡོད་ལ། ལག་མཐིལ་ཐོག་ཆུ་གང་མང་པོ་སྐྱེ་མྱོང་ཡོད། འོན་ཀྱང་ཁོང་གིས་ཕྱི་བཤོལ་རྩ་བ་ནས་བྱེད་མྱོང་མེད།

མ་བྱན་གྱི་ལས་ལ་ཐོག་མར་འཇུག་སྐབས། དཀར་ཕྲུག་གིས་བཟོས་པའི་ཚལ་རིགས་ལ་གསོལ་ཚིགས་ལ་ཕེབས་མཁན་སྐུ་མགྲོན་འགའ་ཤས་ཀྱིས་ཚྭ་མང་དྲགས་པ་དང་། བྲོ་བ་ཅང་ཅང་ཡིན་པ་སོགས་བློ་མོས་མེད་པའི་བསམ་འཆར་འདྲ་མིན་བཏོན་མྱོང་ཡོད། འོན་ཀྱང་ཁོང་གིས་ཡིད་ཐང་ཆད་ནས་མ་བསྡད་པར་བློ་སྟོབས་ཆེན་པོས་སྐུ་མགྲོན་གྱི་བསམ་འཆར་བསྡུ་ལེན་ཧུར་ཐག་བྱས་པའི་རྨང་གཞིའི་ཐོག་དགེ་སྤེལ་སྐྱོན་སྤངས་ཀྱི་བསམ་བློ་བརྟན་པོར་བཅངས་ཏེ་དགེ་རྒན་དང་ལས་རོགས་ཚོའི་ས་ནས་སློབ་སྟོན་སྐྱབས་འཇུག་གང་མང་ཞུ་བ་དང་། དུས་ཐོག་ཏུ་རང་ཉིད་ཀྱི་ལག་རྩལ་ལ་ལེགས་སྒྲིག་མཐར་ཕྱིན་བྱས།

ཐིགས་པ་བསགས་ན་རྒྱ་མཚོ་འགྲུབ། ཆུ་ཐིགས་ཡིན་ཀྱང་བྲག་རི་བརྟོལ་བའི་སྙིང་སྟོབས་ལས། དཀར་ཕྲུག་གི་མ་བྱན་ལག་རྩལ་ལ་ཡར་རྒྱས་ཆེན་པོ་བྱུང་སྟེ། 2010ལོར། མ་བྱན་དགེ་རྒན་གཞོན་པར་བཀོད་སྒྲིག་བྱས་པ་དང་། 2020ལོར་མགྲོན་ཁང་གི་ཅིང་ལི་གཞོན་པར་བཀོད་སྒྲིག་བྱས་པ་རེད།

བྱང་ཆུབ་ལ་རྩེར་སོན་གྱི་ལག་རྩལ་ཞིག་ཤེས་པ་བྱ་ཆེད། ཁོང་གིས་ཚལ་སྣ་གསར་གཏོད་ཐད་འཚོལ་ཞིབ་བྱེད་འགོ་ཚུགས། དེ་རྗེས་ལྷོ་ཁའི་རྫོང་ངམ་ཆུས་ཁག་ཏུ་ཟབ་འཇུག་བྱས་ནས་ས་ཁོངས་ཀྱི་རོ་བཅུད་ཚོར་བའི་བཟའ་བཅའི་རྒྱུ་ཆ་མང་པོ་ཞིག་མཁོ་བསྡུ་བྱས་མཚམས། རྒྱ་ཚྭའི་སྟར་ཁའི་ནང་ཤ་དང་། སྣ་དཀར་རྩེའི་སོ་མཁས་ལུག་ཤ། གོང་དཀར་ཕྲེང་འགོའི་ཞོག་ཁོག་སོགས་ཁྱད་ལྡན་བཟའ་བཅའི་རྒྱུ་ཆ་ཁག་ཚལ་རིགས་ནང་མཉམ་འདྲེས་བྱས་ཏེ་དམིགས་བསལ་གྱི་ཁྱད་ཆོས་ལྡན་པའི་གཡོས་སྦྱོར་ཐབས་ལམ་གསར་པ་གཏོད།

འདི་ལོའི་ཟླ་9པར། ངེད་གྲོང་ཁྱེར་གྱིས་གཙོ་གཉེར་བྱས་པའི་2024ལོའི་ཀྲུང་ཧྭ་ཡི་ཞིམ་ཟས། བོད་ཀྱི་རོ་བཅུད། ཡར་ཀླུང་དུ་ཁྱབ་ཅེས་པའི་གསར་གཏོད་དང་འབྱུང་འགྱུར་གྱི་ཞིམ་ཟས་འགྲན་བསྡུར་ཆེ་མོའི་ཁྲོད། དཀར་ཕྲུག་གི་བློ་གྲོས་དང་ལག་རྩལ་ལས་ཐོན་པའི་ཡར་ཀླུང་གི་བྲོ་ཞིམ་སོ་མཁས་ལུག་ཤ་བཀྲག་མ་དང་། བོད་འབྱུང་སྤགས་རྡོག་དང་ཚགས་ཤ་བཙོས་མ་ཞེས་པར་གསར་གྱི་བྱ་དགའ་ཐོབ་པ་རེད།

དེ་རྗེས། ཁོང་གིས་ལྷོ་ཁའི་ཚབ་ཞུས་ཏེ་ལྷ་སའི་རྟིང་རྩོད་འགྲན་བསྡུར་ནང་ཞུགས་པ་མ་ཟད། ཡར་ཀླུང་གི་དྲི་ཞིམ་འཐུལ་བའི་གཡག་མགོ་ཞེས་པའི་བརྩམས་བྱར་ཀུན་གྱི་དོ་ཁུར་ཐོབ་ཅིང་། ཚལ་དེ་ནི་ལྷོ་ཁའི་རིག་གནས་ཀྱི་གཞིས་རྒྱུ་ཕུན་སུམ་ཚོགས་ཅིང་། ཚགས་ཤ་མ་རྒྱུ་བྱས་པའི་རྨང་གཞིའི་ཐོག་ལྷོ་ཁའི་ས་ཁོངས་ཀྱི་ཁྱད་ལྡན་རི་སྐྱེས་སྨན་རྒྱུ་སྦྱོར་སྡེབ་བྱས་པ་ཞིག་ཡིན་པས་སྲོལ་རྒྱུན་གྱི་བློ་བ་ལྡན་པ་ཙམ་མ་ཟད། འབྱུང་འཕྲོད་ལུས་གསོའི་བྲོ་བ་ལྷག་པར་མངོན་ཡོད་པ་རེད།

དཀར་ཕྲུག་གིས་བཟོས་པའི་ཚལ་སྣ་གཉིས་པ་དེ་ནི། བོད་འབྱུང་སྤགས་རྡོག་དང་བོད་ཕག་བཙོས་མ་ཞེས་པ་དེ་ཡིན་ཅིང་། ཚལ་དེ་ནི་ལྷོ་ཁའི་སྤུས་ལེགས་ནས་རྩམ་དང་བོད་ཕག་གཉིས་མ་རྒྱུ་བྱས་པའི་རྨང་གཞིའི་ཐོག་ནས་རྩམ་གྱི་འཚོ་བཅུད་དང་ཁྱད་ལྡན་བྲོ་བ་སོར་འཇོག་བྱས་པ་ཞིག་ཡིན་པ་དང་། བོད་ཕག་དག་མེ་ཆུང་ཆུང་བཏང་ནས་ག་ལེར་བཙོས་རྗེས་བོད་ཕག་གི་མངར་སིལ་ལྡན་པའི་བྲོ་བ་སོར་འཇོག་བྱས་པ་ཞིག་རེད། དཀར་ཕྲུག་གིས་སྲོལ་རྒྱུན་གཡོས་སྦྱོར་ཐབས་རྩལ་དང་དེང་རབས་གསར་གཏོད་རིག་གཞུང་ཕྱག་རྩལ་ཟུང་དུ་སྦྲེལ་བའི་ཐབས་ལམ་ལས། དུས་རབས་གསར་པའི་ལྷོ་ཁའི་ཞིམ་ཟས་ཀྱི་སྣེ་མང་རང་བཞིན་དང་ཁྱད་ལྡན་རང་བཞིན་ཆེས་ཆེར་མངོན་པར་བྱས་ཡོད།

དཀར་ཕྲུག་གི་བློ་ངོར། ཕན་ཚུན་སློབ་སྦྱོང་ཞུ་རྒྱུ་ནི་ཡར་ཐོན་གྱི་སྐས་ཀ་ལྟ་བུ་ཡིན། ཤམ་ཆུའི་མགྲོན་ཁང་གི་ཟ་ཁང་ནང་། མི་རིགས་ཁག་གི་མ་བྱན་ཚོས་རང་ཉིད་ཀྱིས་བཟོ་རྩལ་ལས་ཐོན་པའི་ཚལ་གྱི་བྲོ་བར་ཕན་ཚུན་མྱོང་ལེན་དང་གྲོས་བསྡུར་བྱེད་ཀྱིན་ཡོད། དཀར་ཕྲུག་གིས། བོད་ཟས་དང་རྒྱ་ཟས་བཟོ་སྟངས་སོ་སོར་ཁྱད་ཆོས་མི་འདྲ་བ་ཡོད། ངས་རྒྱུན་གཏན་ནས་ནང་སའི་རྒྱ་ཟས་བཟོ་མཁན་མ་བྱན་ཚོའི་ས་ནས་རྒྱ་ཟས་བཟོ་སྟངས་སྦྱོང་གི་ཡོད། ཁོང་ཚོས་ཀྱང་ང་ཚོའི་ས་ནས་བོད་ཟས་བཟོ་སྟངས་སྦྱོང་གི་ཡོད་པས། ང་ཚོས་ཕན་ཚུན་སློབ་སྦྱོང་དང་ཐུན་མོང་ཡར་རྒྱས་ཡོང་བ་བྱེད་ཀྱི་ཡོད་ཅེས་བཤད།

མ་གཞི་དཀར་ཕྲུག་ལ་མཐོ་རིམ་མ་བྱན་གྱི་ལག་ཁྱེར་དང་། གཡོས་སྦྱོར་ལས་རིགས་ཀྱི་རྩལ་ནུས་ཤན་འབྱེད་པའི་ལག་ཁྱེར་སོགས་རག་མྱོང་ཡོད་རུང་། ཁོང་གིས་འདི་དག་ལ་བློ་ཡིད་ཚིམ་ནས་མ་འདས་པར་ལས་ཞོར་དུ། མཐོ་རིམ་མ་བྱན་གཞན་དག་དང་ལྷན་དུ་མྱོང་ཚོར་སྤེལ་རེས་བྱེད་པ་དང་། ལྗོངས་ཕྱིའི་མ་བྱན་མཁས་པ་གདན་ཞུས་བྱས་ཏེ་སློབ་ཁྲིད་བྱས་ཐོག་ཚལ་སྣ་ཟམ་མི་ཆད་པར་གསར་གཏོད་བྱེད་ཀྱི་ཡོད་པ་རེད། ཁོང་གི་བསམ་པར། སྐུ་མགྲོན་ཚོས་བདེ་ཐང་འབྱུང་འཕྲོད་ཀྱི་ཟས་རིགས་ལ་མཐོང་ཆེན་གནང་གི་ཡོད་པ་དང་བསྟུན་ནས་ང་ཚོས་ཀྱང་དེ་བསྟུན་གྱི་ཚལ་སྣ་ཞིབ་འཇུག་བྱས་ཐོག་བདེ་ཐང་འབྱུང་འཕྲོད་དང་། ཤ་ཚལ་དང་སྔོ་ཚལ་མཉམ་སྡེབ། ཚིལ་ཞག་བཟའ་ཚྭ་ཉུང་འདྲེས་ལ་དོ་སྣང་ཐོག་ལྗགས་སྨིན་བཅུད་ཆེའི་ཞིམ་ཟས་མཁོ་འདོན་བྱེད་རྒྱུ་དེ་ནི་དགོས་གཏུགས་སུ་གྱུར་བ་ཞིག་ཡིན་པའི་ཚོར་སྣང་ཡོང་གི་ཡོད།

ལོ་མང་རིང་། དཀར་ཕྲུག་གིས་ཞིམ་ཟས་གཡོས་སྦྱོར་གྱི་ལག་རྩལ་ལ་བྱང་པ་དང་འཚོལ་ཞིབ་བྱ་རྒྱུ་དེ་རྒྱུན་པ་ཆད་མྱོང་མེད་ཅིང་། ཁོང་གི་བློ་སྟོབས་ཀྱི་ཚོད་ལྟ་དང་འབད་འབུངས་ཀྱི་གསར་གཏོད་འོག་ཡར་ཀླུང་ཞིམ་ཟས་རིག་གནས་ལ་སྐྱེ་སྟོབས་ཀྱི་དཔལ་འབར་ལ་གསོན་ཤུགས་ཀྱི་འདབ་ལོ་རྒྱས་ཅིང་། ཡར་ཀླུང་ལྗགས་སྨིན་ཞིམ་ཟས་རིག་གནས་འདི་ཉིད་མི་ཉམས་གོང་འཕེལ་དང་ཉམས་པ་གསར་གཏོད་ཀྱི་ངོ་མཚར་རླབས་རྒྱུན་མུ་མཐུད་འཕྱུར་བཞིན་ཡོད་དོ། ། 

བསོད་ནམས་བསྟན་པས་བསྒྱུར། བསོད་དོན་དང་ཡེ་བཟང་གིས་ཞུས།